1 Corintios 5:3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

^3-4 Amaꞌt napaꞌ ama alloꞌtsenno parro, tharraña eꞌñe neyerpoeñothespaꞌ alloꞌtseney parro. Amaꞌt ama alloꞌtsennopaꞌ napaꞌ oꞌch notas necartoth ñeñth pokteꞌ nenten na, atthekma ñerraꞌm alloꞌtseney parro. Napaꞌ oꞌ neñoch ñeñthchaꞌ ateth sepeꞌ ñeñth ochñaꞌtets ateth. Oꞌch notas ñeñthchaꞌ ateth sepeꞌ: Oꞌch sapxha allowenes eꞌñe sameꞌñeñoth Yepartseshar Jesús; napaꞌxhoꞌña eꞌñe neyerpoeñothespaꞌ alloꞌtseneychaꞌ parro. Allochñapaꞌ eꞌñe Yepartseshar Jesús poꞌwamenkothpaꞌ

1 Corintios 5:3 Iomraidhean Croise

1 Corintios 5:12

Ñewa, añekop ateth oꞌ notwas, tharroꞌmar yokoppaꞌ ama pokteyaye oꞌch yotteñeꞌcheñ ñeñth ama ameꞌñetso. Yokoppaꞌ añña eꞌñe pokteꞌ oꞌch yotteñeꞌcheñ ñeñth pameꞌñeñothet attherach es pantenet.

2 Corintios 10:1

Ñewa, theꞌpaꞌ na Pablon oꞌch alla nokthapeꞌchaterrserr eꞌñe nemoereñothes atthen ñerraꞌm Cristo ñeñth nanak amoerañtostsa. Poemoereñothey ya ñapaꞌ eꞌñe pokteꞌ eñcheꞌth oꞌch ateth enteñet ñerraꞌm ñapaꞌ ama esosheꞌmayaye. Ñewa, sapaꞌ patantaꞌttsospaꞌ atthach sentenen ama erroth notenso atsrreꞌmoxhen ñerraꞌm esempo alloꞌtsenen sesho. Tharraña ñerraꞌm esempo allapharoꞌtsenen, allempo nekellkënnas cartapaꞌ allempoña sapaꞌ ateth sentenen ñerraꞌmrratheꞌ ama xhoyeꞌ nemhchaꞌtenso amaꞌt eꞌñe mamesha, eꞌñech echeꞌxharr notenes necartoth. Tharraña ñeñthpaꞌ ama attheyaye. Amaꞌt allempo alloꞌtsenen sesho, ñerraꞌm nemneñeñ ateth neꞌñoronasapaꞌ eꞌñetheꞌ echeꞌxharr neꞌñorennasa. Ñeñthoꞌmarña theꞌpaꞌ eꞌñe neyoxhrokmañen oꞌch notas, sokthapeꞌcherr kowen eꞌñe thayekma allochñapaꞌ ñerraꞌm esempoch nexherr seshopaꞌ amach xha seꞌñoratno echeꞌxharr. Tharroꞌmar ñerraꞌm ama sokthapeꞌcherro kowen, poꞌñoxh ñerraꞌm esempo nexherr seshopaꞌ xhach seꞌñoraten echeꞌxharr, ñeñthes noteneꞌ napaꞌ eꞌñoꞌ nañeña nokthaphñoth ateth es nephatseꞌtyen ñeñth ateth phaꞌyena acheñeneshaꞌ arr patsro, ñeñthpaꞌ eꞌñe ñokpoeta sherben. Tharraña napaꞌ ama attheyeꞌ nepeno.

2 Corintios 10:11

Tharraña acheñeneshaꞌ ñeñth ateth otetspaꞌ eñochetepaꞌch ñerraꞌm erroth notas necartoth amaꞌt atarr allapharoꞌtsenen atethchaꞌxhoꞌ poꞌñoxh nepennas ñerraꞌm esempoch nexherr sesho.

2 Corintios 13:2

Awañmoꞌcha allempo poepocheño nexherr sesho, ñeñth atthera phatseꞌtyetsa ñeñth ama pokteyaye, napaꞌ oꞌ notwanet allempo ñeñthchaꞌ ateth apharethtet ñerraꞌm attheretach. Ñewa, theꞌpaꞌ necartothpaꞌ oꞌch alla noterraneterr ñet, amaꞌt eꞌñe allowenes oꞌch notas, ñerraꞌm esempo nexherrerr poꞌpocheñopaꞌ oꞌch neꞌñotareꞌtwerres allowenes ñeñthes atthera phatseꞌtyetsa.

Colosenses 2:5

Amaꞌtchaꞌ ama alloꞌtsenno eꞌñe na tharraña neyerpoeñothes neyoxhropaꞌ eꞌñe parroꞌtsaꞌyenakmay. Sapaꞌ eꞌñech noksheñeshaꞌ nentyenes attho eꞌñe kowenareꞌ es sorrtatyen. Ñamha nentenes attho eꞌñe sameꞌñeñoth Cristo oꞌ eꞌñe womenk sephaꞌyen seyoxher ñokop.

1 Tesalonicenses 2:17

Ñamha oꞌch, masheñneshachaꞌ ñamha noxhaneshachaꞌ, notas: Yaña poꞌñoxh allempo xhaꞌnmataterryet seshoth allempotheñña amaꞌt esempapaꞌ ama yabhchannaꞌterro eꞌñe themeꞌttsen. Chemerrña theꞌ yapaꞌ oꞌ eꞌñe yapthamerra. Tharraña amaꞌt ama allameꞌttsa yabhchannenopaꞌ yeyoxhroñapaꞌ eꞌñe parrokmatetsey. Yapaꞌ xhokma yesechenañ oꞌch yabhcherrsaꞌ amaꞌt napaꞌ allponocheꞌtats nesechenañ. Tharraña oneñethñapaꞌ xhokma epatareꞌteney.