1 Corintios 4:1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñeñthoꞌmarña theꞌpaꞌ notenes, epsheñoꞌmarey na epan masheñ Apolos, añ pokteꞌ oꞌch senteney ateth ñerraꞌm ñeñthey thorretsa Cristokop. Ñamha añ pokteꞌ oꞌch senteney ateth ñerraꞌm yapaꞌ eyecharethey oꞌch yaꞌpothoñ Yompor poꞌkowenña.

1 Corintios 4:1 Iomraidhean Croise

San Mateo 13:11

Jesúsñapaꞌ ateth oterraneterr: —Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ñeñth ateth penaña Yompor poꞌkowenña attho ayochreshathtena ña poeꞌntañoth. Tharraña poꞌpotantañexhnoñapaꞌ ñeñth attha es poexhaꞌyetsa, ñokpoetñapaꞌ amach errothenoth eñoterrñañeto Yompor poꞌkowenña.

San Mateo 24:45

Jesúsñapaꞌ alla tomaꞌntaterraneterr poꞌpoñoneth, ateth oterraneterr: —Allowenespaꞌ atethchaꞌ sepha eꞌñe kowen ateth ñerraꞌmrratheꞌ poesheñarr yakma ñeñth atarr ameꞌñañathtetsa ñamha eꞌñech eñotenan ñeñth atarr sherbets. Ñeñthña yakmarpaꞌ añ yechenaya pamoꞌmteꞌ eꞌñe alla paꞌpakllo. Añchaꞌ poꞌtarwas pen xhokmach apaꞌyesan allowen poꞌpotantañ pamoꞌmteꞌ paꞌtarwasañer poerraret allpon ñeñth poktetsa poesheñaꞌttsokop. Ñapaꞌ atthekmach penanet, xhokmach apoenanet ñerraꞌm esempoch xherrerr allempo ateth anareth ñokop oꞌch alla apaꞌyerraneterr poꞌpocheño. Ñapaꞌ xhokmach ateth pena amach kexhpoenaneto tharroꞌmar ñapaꞌ eꞌñe eñoteñ atthoch eꞌñe koshatenan pamoꞌmteꞌ.

San Marcos 4:11

Jesúsñapaꞌ ateth oterraneterr: —Sa theꞌpaꞌ Yomporña semnateneꞌ atthoch señoterr ñeñth ama eñotpawoyaye amaꞌt awathotheñ ateth penaña Yompor poꞌkowenña attho ayochreshathtena ña. Tharraña poꞌpotantañexhno ñeñth attha es poexhaꞌyetsa, ñokpoetpaꞌ ama eñoteñeto ñeñth ateth atmaꞌntatareth ñoñets.

San Lucas 12:42

Partseshaꞌñapaꞌ alla tomaꞌntaterraneterr poꞌpoñoneth, ateth oterraneterr: —Allowenespaꞌ atethchaꞌ sepha eꞌñe kowen ateth ñerraꞌmrratheꞌ poesheñarr yakma ñeñth yechena ñeñth pamoꞌmteꞌ pen all paꞌpakllo. Ñeñthchaꞌ poꞌtarwas peneꞌ xhokmach apaꞌyesan allowen poꞌpotantañ pamoꞌmteꞌ paꞌtarwasañer poerraret allpon ñeñth poktetsa poesheñaꞌttsokop. Ñapaꞌ atthekmach pena xhokmach apoenanet ñerraꞌm esempoch xherrerr allempo ateth anareth ñokop oꞌch alla apaꞌyerraneterr poꞌpocheño. Ñapaꞌ xhokmach ateth pena amach kaxhpoere tharroꞌmar ñapaꞌ eñoteñ atthoch eꞌñe koshatenan pamoꞌmteꞌ.

San Lucas 8:10

Jesúsñapaꞌ alla oterraneterr: —Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ateth penaña Yompor poꞌkowenña attho atarr ayochreshathtena ña. Tharraña poꞌpotantañexhnoña ñeñth attha es poexhaꞌyetsa, ñokpoetpaꞌ ama eñoteñeto ñeñth ateth atmaꞌntatareth ñoñets. Atthoña amaꞌt enteñetañ ñetñapaꞌ amach es xhenaweto poeyoxhreto. Amaꞌt eꞌmoeñetañ amaña xhenanetoña poeyoxhreto ñeñth ateth yexhateney Yompor poꞌkowenña.

Romanos 11:25

Theꞌpaꞌ oꞌch, masheñneshachaꞌ ñamha noxhaneshachaꞌ, neñotatas ñeñth awathotheñ ama eñotpawoyaye. Ñeñthes ama judioneshayayso napaꞌ nemneñ oꞌch eꞌñe señoch allochñapaꞌ atthoch amach sotaphsaꞌtatsto sapaꞌ atarroꞌ es señoten. Ñeñth ateth athpareꞌtena patantarr israelenaꞌtarpaꞌ ñeñthpaꞌ mamekpa ateth moenatenanet Yompor tharrempowach allempoch eꞌñe etsotwa atthoch ameꞌñaꞌwerra allpon acheñeneshaꞌ ñeñth ama judioneshayaye.

Romanos 16:25

Theꞌñapaꞌ yaꞌyeꞌchoxhtatoñepaꞌch Yompor tharroꞌmar ñapaꞌ ñach awamenkath sepeneꞌ, ñeñth eꞌñe ateth oten añ kowen ñoñets alloch yekeshperra. Ñeñthara añ kowen kothaphñats ñeñth neserrpareꞌtatenes ñeñth eꞌñe ateth pena Jesucristo ñeñth awathotheñ ama eñotpawo.

1 Corintios 2:7

Yomporepaꞌchña pokthaphña yaꞌpotha ñeñth atarr es eñotets, ñeñthara amaꞌt awathotheñpaꞌ ama eñotpawo pokthaphña. Tharraña amaꞌt allempo ama ayexhkatarethtenaꞌ patspaꞌ ñeñthñapaꞌ oꞌ anarethetwa atthoch kowenchaꞌ yaꞌkeshphatarethterra esempowañen.

1 Corintios 3:5

Ñamha oꞌch notas, yapaꞌ ama esoyayye amaꞌt Apolos, amaꞌt na, añayakaꞌye ñeñthey thorretsa Yomporekop. Yapaꞌ amñaretheya atthoch oꞌch yameꞌñatasa. Poesheñaꞌttsoypaꞌ añ yethorraꞌyena Yomporekop ñeñth ateth yechyenya.

1 Corintios 4:13

Ñamha ñerraꞌm esempo sochatseꞌtenyetpaꞌ yañapaꞌ xhach yamoꞌtstanet kowen. Ñamha amaꞌt themeꞌttsen entenyet ateth ñerraꞌmrratheꞌ es awaporeꞌtareth, ñeñth ama es sherbetso amaꞌt mamesha arr patsro.

1 Corintios 4:2

Ñewa, yeñoteñ ñerraꞌm erraꞌtseney eyecharetheypaꞌ añchaꞌña ateth yepena ateth yechenyet.

2 Corintios 11:23

Ñetpaꞌ pommoꞌcheñothet otenet ñetpaꞌ atarroꞌ thorrenet Cristokop. Ñewa, napaꞌxhoꞌña elloña atarr nanak nethorrena Cristokop. Amaꞌt eꞌñe notatseꞌteñotha noten, ñeñthpaꞌ eꞌñe poꞌñoxh ateth. Amaꞌt allpon thorrenet ñet, elloña napaꞌ atarr nanak nethorrena na. Ñamha amaꞌt allpon amoeroxhtatarethetyenet ñet elloña napaꞌ atarr nanak amoeroxhtatarethen. Allpon ayottamphsarethen all koñchatennet, ñeñthpaꞌxhoꞌña nanak atonocheꞌtats. Ñamha allpon ashtennetpaꞌ ñeñthpaꞌxhoꞌña atarr nanak atonocheꞌtats. Ñamha ñeñth allpon awtsanchaꞌ rromoetseñ, ñeñthpaꞌxhoꞌña atarr nanak atonocheꞌtats.

2 Corintios 12:6

Ñewa, ñeñth ateth apharetheneñ allempo ñeñthpaꞌ eꞌñe pokteñ oꞌch kowen neñoseñ eꞌñe nokop, ñeñthpaꞌ ama xhoyeꞌ notatseꞌteno, tharroꞌmar ñeñthpaꞌ eꞌñe poꞌñoxh ateth apharethen. Tharraña napaꞌ ama nemno oꞌch kowen neños eꞌñe nokpa. Añachña nemnen ñeñthchaꞌ kowen entapretennet ñeñth eꞌñe allpona entapretennet ñeñth ateth es nephaꞌyen kowen ñamha ñeñth eꞌñe allpona eꞌmhñotapretennet ñeñth ateth eꞌñe kowen neserrpareꞌten.

2 Corintios 4:5

Tharroꞌmar ñeñthey eꞌñe yeñmañeshokmañen seserrpareꞌtateneꞌpaꞌ ñeñthpaꞌ ama añekpayeꞌ ateth yepeno atthoch senteney ya ñerraꞌmrratheꞌ samoꞌmteꞌ sepeney. Añchaꞌña yeserrpareꞌtatenes Jesucristo, ñachña Separtseshar sepen. Yapaꞌ añña atarr yethorrena sokop eꞌñe yemorrenteñoth Jesús.

2 Corintios 6:4

Yapaꞌ añña yemnen amaꞌt errothenoꞌtsenya xhokmach yemneñ oꞌch yeñotach acheñeneshaꞌ poꞌñoxh eꞌñe kowen yethorrena Yomporekop ñeñth ateth poktetsa yokop ñeñthey thorretsa Yomporekop. Ñeñthpaꞌ añexhno ñeñthchaꞌña eñotaterrawet: allpon es yewapoyapaꞌ xhokmach yaꞌwanteñ eꞌñe kowen, amaꞌt allpon attho yemoeroxhtameꞌtyena, amaꞌt allpon ñeñth yepalltaꞌyena, xhokmach yaꞌwanteñ allowen. Amaꞌt ora allowen ñeñth allpon ñeñth allkatañtetsa, tharraña ñeñthpaꞌ xhokmach yaꞌwanteñ.

Efesios 6:19

Napaꞌxhoꞌña xhokmoepaꞌchña semaꞌyochampenna. Oꞌch senamon Yompor nokop allochñapaꞌ ñachña neꞌñorateneꞌ atthoch amach nemhchaꞌnañotha neserrpareꞌteññañe poꞌñoñ. Allochñapaꞌ atthochña neñotatyesanet kowen ñoñets ñeñth alloch eꞌñe yekeshphaꞌwerra alloweney; ñeñthpaꞌ ama eñotpawoyaye, amaꞌt awathotheñ.

Colosenses 2:2

Allochñapaꞌ atthochña eꞌñe soksherra seyoxhrowen attho eꞌñe semorrentannaꞌteñothpaꞌ oꞌch eꞌñe separrokmaterr. Atthochña xhaponasa seyoxhro atthoch atarr es señotyerr. Oꞌch señoterr ñeñth ama eñoteteꞌthe awathotheñ, ñeñthpaꞌ ñapthaña Yompor eñoteneꞌ. Ñeñthpaꞌ eꞌñepaꞌtkaꞌye Cristeshoꞌtsenña

Colosenses 4:3

Ñamha oꞌch semaꞌyocheña Yompor yokop, oꞌch senamonay atthoch eñalleta allchaꞌ yeserrpareꞌtoñ poꞌñoñ, allchaꞌ eꞌñe yaꞌpotwa ñeñth awathotheñ ñeñth amaꞌt poesheñarrapaꞌ ama eseshayeꞌ eñotenaye ñeñth ateth penaña Cristo. Ñeñthoꞌmarña na theꞌpaꞌ ayottamphsarethen cárcelo.

1 Timoteo 3:16

Ñamha yapaꞌ yeñoteñ ñeñth ateth kothapeꞌchateney Yompor attho yameꞌñerapaꞌ ñeñthpaꞌ nanak koxhneshaꞌ amaꞌt awathotheñpaꞌ ama eseshayeꞌ eñotenaye. Añpaꞌ ñeñth ateth yaꞌxhoteñ Cristo: Amaꞌt Paretspaꞌ oꞌ acheñetos añe patsro, tharraña Yompor Poekamkëñothña nanak awamenkathtosa ñeñth eñotateneꞌña acheñeneshaꞌ ñapaꞌ eꞌñe poꞌñoxh kowen. Amaꞌt allowen mellañotheñnaneshaꞌpaꞌ eꞌñe entwoñeteꞌth ñeñth ateth phaꞌyeseꞌth añ patsro, ñamha ñeñth ameꞌñayeꞌthpaꞌ xhokma aꞌpothet Cristo errakmañen arr patsro amaꞌt all ama judioneshayaye. Ñamha shonteꞌ acheñ ameꞌñerraya Cristo, allothña Yompor poꞌkowenñothpaꞌ oꞌ alla agër poeꞌntaño.

1 Timoteo 3:6

Ñamha ñeñthchaꞌ amhchaꞌtarethtatsapaꞌ amach aña senatsto ñeñth errteꞌ ameꞌñetsa, tharroꞌmar ñerraꞌm aña senaꞌ amhchaꞌtareth ñeñth errteꞌ ameꞌñetsapaꞌ ñeñthpaꞌ amach eꞌñe eñotwenano ñeñth kowentetsa Yomporekop, allempopaꞌ eꞌñe ña paꞌmhchaꞌtarethteñothpaꞌ xhatheꞌ atarr ommoꞌcha. Tharroꞌmar ñerraꞌm xha yommoꞌchapaꞌ ñeñthpaꞌ ama pokteyeꞌ enteñe Yompor. Xhatheꞌ awaporeꞌtarethey ateth pet awath oneñeth eꞌñe pommoꞌcheñothpaꞌ awoꞌt waporeꞌchet.

1 Timoteo 3:9

Ñamha ñeñthchaꞌ sherbhats Yompor paꞌpakllopaꞌ añchaꞌ seꞌn ñeñth eꞌñech poeñmañeshaꞌ maꞌyoxhrenaya ora ñeñth ateth yameꞌñera Cristo ñeñth eꞌñe poꞌñoxh kowen.

Tito 1:7

Tharroꞌmar ñeñthchaꞌ paꞌmhchaꞌtarether phaꞌ ñeñth ameꞌñetsapaꞌ añchaꞌ penaꞌyes acheñ ñeñth eꞌñe kowenareꞌ es phaꞌyets, ñeñth amach eñalle atthoch thanmareꞌteña acheñeneshaꞌ, tharroꞌmar ñapaꞌ anareth ñach aꞌpoktatyeneꞌ paꞌnamen ñeñth poktetsa Yomporekop. Ñamha ñeñthchaꞌ paꞌmhchaꞌtarether phaꞌyes ñeñth ameꞌñetsapaꞌ amach añeyaye acheñer ñeñth añach pokteꞌ enten oꞌch xhokma phatanet ñeñth ateth moenen eꞌñe ña, ñamha amach xha atsrreꞌmoxhen entweno, ñamha ñeñth ama posaꞌtareꞌtetso, ñamha ñeñth amach orroñatheyaye, ñamha ñeñth ama nanak yeꞌchapretetso kelle ñeñth apenkoxhenoth oꞌch gana.

1 San Pedro 4:10

Yompor poemoereñothpaꞌ oꞌ eꞌñe apaꞌyeswas atthoch sethorraꞌyesa eꞌñe ñokop. Theꞌñapaꞌ oꞌch notas, oꞌch seyenpannaꞌta año ñeñth apoenes Yompor. Atthochña sesherbhatyesñañña Yompor poemoereña.