1 Corintios 2:9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁹ Tharroꞌmar ateth anwarethta Yompor poꞌñoñ awath, ñeñthpaꞌ ateth oten: Amaꞌt awatha ya ñeñthey arromñatheypaꞌ ama yentare ñeñth oꞌpatatenya Yompor ñeñth koxhneshaꞌtetsa yokop, ñamha ama yeꞌmare, ñamha ama xhaponayeꞌthe yeyoxhro ñeñth oꞌpatatenya Yompor ñeñtheychaꞌ morrenterraya ña.

1 Corintios 2:9 Iomraidhean Croise

San Mateo 20:23

Ñañapaꞌ alla oterraneterr: —Ñewa, poꞌñoxhpaꞌ saꞌmoeroxhtatarethterrach samha attheschaꞌ ñerraꞌm na, saꞌmtsarethterrach samha. Tharraña añña atthoch sanorryesos nesho nekowenroth ñamha neꞌchkotheroth allchaꞌ sekowentapreterrna ñeñthpaꞌ amachkaꞌye nayeꞌ semnaterraye. Añchaꞌña anorryeswerrets all ñeñth eꞌñe oꞌpatatenna Nompor.

San Mateo 25:34

Naña allempoch atarr naꞌmhchaꞌtarethterrapaꞌ, atethchaꞌ noter ñeñth nekowenrontheꞌtsaꞌyen: “Sapaꞌ sonaxhaꞌt allowenes tharroꞌmar Nompor oꞌkaꞌye atarr bensareꞌtamperres. Theꞌña sapaꞌ oꞌch sagërr ñeñth oꞌpatatensa awathotheñ. Amaꞌt allempotheñ Nomporpaꞌ errteꞌ yexhkateneꞌ pats sañapaꞌ allempotheñ oꞌpatatasa atthoch saꞌmhchaꞌtarethtapretera.

San Juan 3:16

‘Attho atarr morrentenya Yompor alloweney acheñeneshay arr patsro ñeñthoꞌmarña apoey Poechemer ñeñth poꞌpathrror pen, allochñapaꞌ allowen ñerraꞌm eseshaꞌ ameꞌñerraya ña amach chenkërreto, ñetñapaꞌ korretsetach poksheñeshokmañen eꞌñe thayotheñ errponañowen.

Romanos 8:28

Ñamha amaꞌt es yewapoya, yapaꞌ yeñoteñ Yomporpaꞌ ñach aꞌpoktateneꞌ yokop, alloweney ñeñthey morrentenaya ña, ñeñthey akrarethey oꞌch ateth yepeññañ ñeñth ateth moenen ña.

Hebreos 11:16

Ñetpaꞌ añña eꞌneteꞌth ñeñthchaꞌ eꞌñe paꞌnetser perret poꞌñoxh ñeñth atarr nanak kowen, ñeñthpaꞌ añepaꞌt Yompor paꞌnetser ñeñth poeꞌntañoꞌtsen. Ñeñthoꞌmarña Yomporpaꞌ eꞌñe pokteꞌ entenanet ama penkënaneto attho Poꞌyomporer peñet. Ñañapaꞌ oꞌpatatenanet ñeñthchaꞌ eꞌñe poꞌñoxh paꞌnetser perret all poeꞌntaño.

Santiago 1:12

Nanak kosheñtsoꞌtsen allowen ñeñth awanteneꞌ ora paꞌnamen topateñets, tharroꞌmar ñerraꞌm esempo awantaꞌwan ora topateñetspaꞌ nanakchaꞌ kowen entwer Yompor. Allempopaꞌ apwerchaꞌ Yompor ñeñthchaꞌ atarr koshaterreꞌ alloch ñapaꞌ korretsach thayotheñ amaꞌt errponañowen. Ñeñthpaꞌ aña oꞌpatatena allowen ñeñth morrentenaya ña.

Santiago 2:5

Masheñneshachaꞌ ñamha noxhaneshachaꞌ, eꞌñe nemorrenteñothes theꞌpaꞌ nemneñ oꞌch seꞌmhñoten ñeñthchaꞌ ateth notas. Elloña Yomporpaꞌ añña nanak moenen oꞌch akrerran allowen ñeñth nanak wokchañetets añ patsro, atthoch eꞌñe pameꞌñeñothet ñetpaꞌ echerretchaꞌ esokmañen Yomporeshoth. Esempowañenñapaꞌ oꞌch agërret ñamha ñeñth oꞌpatatenanet Yompor all amhchaꞌtarethtena poeꞌntaño. Ñamha ñeñth oꞌpatatenya alloweney ñeñthey morrentenaya ña.

1 San Pedro 1:12

Yomporpaꞌ eñotatanet ñeñthpaꞌ amachkaꞌye awenayeꞌ etsoterro; shonteꞌch char allempochña etsoterra ateth eñotatanet Yompor. Tharraña ñeñth eñotat allempopaꞌ ñeñthpaꞌ ama ñokpoetayaye, ñeñthpaꞌ eꞌñechkaꞌye yokop. Theꞌñapaꞌ ñeñth seserrpareꞌtateneꞌ kowen ñoñetspaꞌ ñeñthña señotateneꞌ eꞌñe kowen ñeñth ateth penaña ñeñth kothaphñats. Parets Poekamkëñ ñeñth wetsa poeꞌntañothpaꞌ ñeñthña eñotatenawetña atthoch serrpareꞌtataset samha añ kowen ñoñets. Amaꞌt Parets poꞌmhllañotheñnaneshar ñetpaꞌxhoꞌña atarr moeneñet oꞌch eñochet ñamet ñeñth oꞌ señotwerr sa.

1 San Juan 4:19

Yomporpaꞌ oꞌ eꞌñe morrenterrya yanom, ñeñthoꞌmarña yapaꞌxhoꞌña theꞌpaꞌ oꞌch eꞌñe yemorrentera yamha.