1 Corintios 2:4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁴ Ñamha ama neꞌñoreñotheyeꞌ eꞌñe kowen neserrpareꞌtataso atthoch sameꞌñaꞌna eꞌñe neñoñotha ñeñth ateth pena ñeñth xhach otenapañ ñapaꞌ nanaktheꞌ es eñoten. Añña eꞌñe neserrpareꞌteñotha norrtatonas ñeñth ateth phonay Parets Poekamkëñ eꞌñe poꞌwamenkoth Yompor.

1 Corintios 2:4 Iomraidhean Croise

Los Hechos 20:27

Oꞌ neserrpareꞌtatwas ora allowen ateth kothapeꞌchateney Yompor. Ama es naꞌnasotamphsaso amaꞌt koñeꞌtha.

Los Hechos 26:28

Allempoña Agripapaꞌ ateth otan Pablo: —Xhaꞌt photenapañ thayekmapaꞌ oꞌch phameꞌñatna Cristo.

Romanos 15:13

Yomporpaꞌ ñachña atarr ayemoetpoterrtsa. Ñamha ñepaꞌchña sokshateneꞌ eꞌñe poktakma. Allochñapaꞌ amach eñalle amaꞌt koñeꞌtha ñeñthchaꞌ sellkateneꞌ attho sameꞌñeña ña. Allochñapaꞌ Paretsña Poekamkëñpaꞌ ñachña awamenkath sepeneꞌ. Atthochña eꞌñech soksheñeshaꞌ sekwen ñeñth oꞌpatatensa Yompor.

Romanos 15:19

Ñamha ñetpaꞌ añña ameꞌñatawet ñeñth attho eꞌñe awamenkath penen Cristo atthoña norrtatanet Yompor poꞌpartsoña ñeñth ama poentareto. Ñetpaꞌ ñeñthña eñotatwawet, ñeñthpaꞌ poꞌñoxh eꞌñe Parets Poekamkëñoth ñeñth eꞌñe awamenkath yepeneꞌ. Attheñapaꞌ ora errakmañen oꞌ neserrpareꞌtwa añ kowen ñoñets attho eꞌñe yameꞌñeñoth Cristopaꞌ oꞌch yekeshperra. Atethña neserrpareꞌtyesnom allemeñ anetsoꞌmar eꞌñe Jerusaléñotheñ Ilíricoꞌmarowen.

Romanos 16:18

Tharroꞌmar ñetpaꞌ ama añeyeꞌ sherbeneto Yepartseshar Jesucristo. Aña kothapeꞌchenet ñeñth ateth moenenet ñet poꞌchets attho korrenet. Attho serrpareꞌtenet koxhneshaꞌ ñoñets, ñeñthpaꞌ attha shekëñet acheñeneshaꞌ ñeñth ama womenkayeꞌ penaye poeyoxher.

1 Corintios 1:17

Napaꞌ ama añekpayeꞌ llesensaꞌnoña Cristo oꞌch napatyes Partsokop ñeñth allpon ameꞌñetsa, añekpaña llesensaꞌn atthoch oꞌch neserrpareꞌt kowen ñoñets alloch yekeshperra. Ñamha ama añeyeꞌ koxhneshaꞌ na neñoñ neserrpareꞌtatenso, tharroꞌmar ñerraꞌm aña neserrpareꞌtatenes koxhneshaꞌ neñoñ nameꞌñatasapaꞌ xhatheꞌ soten attho rroma Cristo korsochopaꞌ ñeñthpaꞌ amakaꞌye es sherbeno atthoch yameꞌñera Cristo.

1 Corintios 2:1

Oꞌch notas masheñneshachaꞌ ñamha noxhaneshachaꞌ, awaña allempo nexhap seshopaꞌ neserrpareꞌtatoses kowen allempo naꞌpothonas Yompor pokthaphña. Allempopaꞌ ama koxhneshotheyeꞌ neñoñoth naꞌpothonaso Yompor poꞌñoñ ateth noñets koxhneshaꞌ entyen acheñeneshaꞌ. Ñamha ama koxhneshotheyeꞌ nokthaphñoth naꞌpothonaso Yompor pokthaphña ateth ñerraꞌmrratheꞌ acheñ ñeñth nanak eñotañ entweñ allowen acheñeneshaꞌ.

1 Corintios 2:13

Ñamha ñeñth ñoñets ñeñth yexhateney Yompor Poekamkëñpaꞌ ñeñthara ñoñets oꞌch yeserrpareꞌtatas samha amaꞌt ñamha poꞌpotantañexhno. Ñeñthpaꞌ ama añeyaye ñoñets ñeñth ateth yexhatyen acheñeneshaꞌ ñeñth eñotañetyetsa. Ñamha ñeñth ñoñets attho yexhateney Yompor Poekamkëñothpaꞌ ñeñth yeyxhatenes samha ñeñthes oꞌ chorrerrsa samha Yompor Poekamkëñ.

1 Corintios 4:20

Amaña eꞌñe ñaptha yeserrpareꞌteñoth yorrtateññañeña Yompor poꞌkowenña atthoch atarr ayochreshathtena ña; poꞌwamenkotheꞌnachña yorrtateññañ poꞌkowenña.

2 Corintios 6:6

Ñamha attho yeñmañeshaꞌ yokrrena, ama sosyaꞌtsañeyeꞌ yokthapeꞌchyeno, ñamha attho yeñoten ñeñth eꞌñe poꞌñoxh Yompor poꞌñoñ ñeñth ama shekëñtsoyaye, ñamha attho es yaꞌwantaꞌyen, amachña xha atsrreꞌmatenye, ñamha atthochña eꞌñe yaꞌmoerañtena, ñamha attho chorrenya Parets Poekamkëñ, ñamha attho eꞌñe kowen yemorrenteña allowen masheñneshaxhno, ñeñthpaꞌxhoꞌña ñeñthña eñotateneꞌña acheñeneshaꞌ attho yapaꞌ eꞌñe kowen yethorrena Yomporekop.

Gálatas 1:10

Theꞌ sapaꞌ señotenen napaꞌ ama añekpayeꞌ notenso atthoch kowen entenen acheñ, añña nemnen oꞌch kowen entenen Yompor. Ñamha ama acheñeneshayeꞌ nemneno oꞌch nokshach tharroꞌmar ñerraꞌm aña orameñ nemneñ oꞌch nokshach acheñpaꞌ ñeñthepñapaꞌ amatheꞌ errotheno noto napaꞌ poeyocher penen Cristo.

Colosenses 2:4

Ñeñthoꞌmarña napaꞌ ateth notenes allochñapaꞌ sapaꞌ amach eseshaꞌ seshkërraye amaꞌtchaꞌ kothapeꞌchatyesaset ñeñth atarr kowen ñoñets sentyerreñ.

1 Tesalonicenses 1:5

Tharroꞌmar añ kowen ñoñets ñeñth yeserrpareꞌtatoses awaña, ñeñthpaꞌ ama ñoñtsenochayayo, yapaꞌ añña awamenkath yepeneꞌ Parets Poekamkëñ allochñapaꞌ attho sapaꞌ oꞌ xhaponasa seyoxhro ñeñth ñoñetspaꞌ eꞌñepaꞌt poꞌñoxh ñeñthpaꞌ ama shekëñtsoyaye. Sapaꞌ eꞌñe señoteney ñeñth ateth eꞌñe kowen yorrtatyesonas allempo alloꞌtseney sesho.

1 San Pedro 1:12

Yomporpaꞌ eñotatanet ñeñthpaꞌ amachkaꞌye awenayeꞌ etsoterro; shonteꞌch char allempochña etsoterra ateth eñotatanet Yompor. Tharraña ñeñth eñotat allempopaꞌ ñeñthpaꞌ ama ñokpoetayaye, ñeñthpaꞌ eꞌñechkaꞌye yokop. Theꞌñapaꞌ ñeñth seserrpareꞌtateneꞌ kowen ñoñetspaꞌ ñeñthña señotateneꞌ eꞌñe kowen ñeñth ateth penaña ñeñth kothaphñats. Parets Poekamkëñ ñeñth wetsa poeꞌntañothpaꞌ ñeñthña eñotatenawetña atthoch serrpareꞌtataset samha añ kowen ñoñets. Amaꞌt Parets poꞌmhllañotheñnaneshar ñetpaꞌxhoꞌña atarr moeneñet oꞌch eñochet ñamet ñeñth oꞌ señotwerr sa.

2 San Pedro 1:16

Ya theꞌpaꞌ oꞌ eꞌñe yeñotatas attho Yepartseshar Jesucristo ña partsotets, ñapaꞌ ñach werrtsa poꞌpocheño. Añ ñoñets poꞌñoxhpaꞌ ama shekëñtsoyaye ñoñets ñeñth oꞌ yotwas. Ñeñthpaꞌ ama yayeꞌ yokthaphña yotenso, ñamha ama awathnaneshañeyaye poeserrpareñ. Ya poꞌñoxhpaꞌ eꞌñekaꞌye allameꞌttsa yeñcheꞌthña Yepartseshar Cristo. Yapaꞌ eꞌñe yentwoñeꞌthña poꞌpartsoña.

2 San Pedro 2:18

Ñamha nanakchaꞌ ommoꞌchenet attho phaꞌyenet ñeñth nanak sosyareꞌ. Ñamha oꞌch aꞌsecheñet poꞌpsheñeñ atthoch oꞌch phachet ñeñth nanak moenenet poꞌchets atthothchaꞌ aꞌpsatarethterret, allempoñapaꞌ oꞌchxhoꞌ alla poerrerret. Shonteꞌ acheñ ñeñth eꞌñe etserra poeswanmoeꞌ ñeñth ateth yexhaꞌyeseteꞌth ñeñth nanak sosyareꞌ, tharraña allempoñapaꞌ oꞌch alla moenereterr ñeñth oꞌ poeswanmoetañ awath pokthaphñet.