1 Corintios 13:2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

² Ñamha amaꞌt yapaꞌ yeñotatset aꞌmhteꞌ Yompor poꞌñoñ, tharraña ñerraꞌm ama yemorreñcho yamoꞌts, atethpaꞌ amach esoyeꞌ entenye. Ñamha amaꞌt yeñotatset oꞌch yaꞌpotha ñeñth ñaptha eñoten Yompor tharraña ñerraꞌm ama yemorreñcho yamoꞌtspaꞌ ñeñthpaꞌxhoꞌña amach esoyeꞌ entenye Yompor. Ñamha amaꞌt yeñotatset ora allpon ñeñth eñall, tharraña ñerraꞌm ama yemorreñcho yamoꞌts, ñeñthpaꞌxhoꞌña amach esoyeꞌ entenye Yompor. Ñamha ñatoꞌ nanak yeyemteñoth Yomporpaꞌ apweney allowen ñeñth yenamoeñ, amaꞌt ñeñth echarr yentyen. Ñatoꞌ oꞌch netmaꞌntacha ateth: Ñatoꞌ oꞌch yoch Yompor, añ aspenethpaꞌ chenkëpaꞌ. Ñatoꞌ eꞌñe yeyemteñoth Yomporpaꞌ oꞌchxhoꞌ chenka. Tharraña amaꞌt yeyemteñoth Yomporpaꞌ oꞌ yephowa ateth, tharraña ñerraꞌm ama yemorreñcho yamoꞌtspaꞌ atthekma enteney Yompor, ama esoyayye.

1 Corintios 13:2 Iomraidhean Croise

San Mateo 13:11

Jesúsñapaꞌ ateth oterraneterr: —Sa theꞌpaꞌ Yomporña oꞌ moenaterres atthoch señoterr ñeñth ama eñotpawoyaye amaꞌt awathotheñ ñeñth ateth penaña Yompor poꞌkowenña attho ayochreshathtena ña poeꞌntañoth. Tharraña poꞌpotantañexhnoñapaꞌ ñeñth attha es poexhaꞌyetsa, ñokpoetñapaꞌ amach errothenoth eñoterrñañeto Yompor poꞌkowenña.

San Mateo 17:20

Ñañapaꞌ ateth otanet: —Tharroꞌmarkaꞌye amakaꞌ eꞌñeyeꞌ seyemtenno ñeñth ateth notenes. Napaꞌ oꞌch notas, ñerraꞌm poꞌñoxh eꞌñe na seyemtenañ napaꞌ eꞌñekaꞌye naꞌpoktatenña neñoñ ñeñth ateth notenes. Amaꞌtchaꞌ allponathollotha seyemtenna ñerraꞌmrratheꞌ mostazllometholl sañapaꞌ amaꞌt erraꞌtsena senamoennoñ amaꞌt ñeñth atarr echarr sentenpaꞌ nañapaꞌ atethchaꞌ nepennaseñ. Oꞌch netmaꞌntatasa ateth ñerraꞌm oꞌch sot: “Añ aspenethpaꞌ rrotheꞌtepaꞌ aꞌyeneth”, aspenethñapaꞌ atethchaꞌxhoꞌña pennasañ ñeñth eꞌñe ateth soteñ. Amaꞌt mameshapaꞌ amach eñalleña ñeñth thorrapoꞌ senten ñerraꞌm eꞌñe poꞌñoxh na seyemtena.

San Mateo 21:19

Allñapaꞌ entnoman higoch thoñetophñoꞌtsen. Ponmosya ama entoñe poeꞌmer, pasopanrepaꞌtchaꞌ entosñañ. Jesúsña xhepaꞌtchaꞌ eñorostsa higochekop, ñeñthpaꞌ ateth otos: —¡Arepaꞌch eñalleterro poeꞌmer amaꞌt eꞌñe awatha! Eꞌñe otweꞌpaꞌ allorokmoepaꞌtchaꞌ weyaꞌwaña pasopaner.

San Mateo 21:21

Jesúsña ateth otanet: —Poꞌñoxhkaꞌye oꞌch notas: Ñerraꞌm seyemteña Yompor, ama xhoyeꞌ seꞌcharrtateno seyoxher, amach añayaya ateth sepho ateth nephaꞌ higoch. Añeꞌnachña eꞌñe setsoten ñeñth ello atarr thorrapoꞌ senten. Oꞌch netmaꞌntacha ateth ñerraꞌmrratheꞌ añ aspeneth. Ñerraꞌm eseshaschaꞌ otets aspenthekop, “Añ aspenethpaꞌ rrotheꞌtepaꞌch arroth, arrepaꞌchña eshaꞌtosa saꞌpo allchaꞌ eꞌñe chenkosa”, aspenethñapaꞌ atethchaꞌxhoꞌ phonasa.

Los Hechos 13:1

Ñeñth pameꞌñeñothet apxhatseꞌth Antioquíopaꞌ alloꞌtsen poesheñaꞌtets acheñ ñeñth aꞌmhteneꞌ Parets poꞌñoñ, ñamha alloꞌtsen ñeñth nanak kowen yexhatatseꞌth Yompor poꞌñoñ ñeñth ateth ñerraꞌm añ: Bernabé, ñamha Simón, ñeñth Simónpaꞌ oteñet ñamha Negro, ñamha alloꞌtsen Lucio ñeñth cireneoꞌmarneshaꞌ ñamha alloꞌtsen Manaén ñeñth parro cheshat Herodes ñeñth amhchaꞌtarethtetsa all Galileo, ñamha alloꞌtsen Saulo.

Romanos 11:25

Theꞌpaꞌ oꞌch, masheñneshachaꞌ ñamha noxhaneshachaꞌ, neñotatas ñeñth awathotheñ ama eñotpawoyaye. Ñeñthes ama judioneshayayso napaꞌ nemneñ oꞌch eꞌñe señoch allochñapaꞌ atthoch amach sotaphsaꞌtatsto sapaꞌ atarroꞌ es señoten. Ñeñth ateth athpareꞌtena patantarr israelenaꞌtarpaꞌ ñeñthpaꞌ mamekpa ateth moenatenanet Yompor tharrempowach allempoch eꞌñe etsotwa atthoch ameꞌñaꞌwerra allpon acheñeneshaꞌ ñeñth ama judioneshayaye.

Romanos 15:14

Ñamha theꞌpaꞌ oꞌch, masheñnesha ñamha noxhanesha notas, napaꞌ neñotenes sapaꞌ atarr semorrentannena ñamha neñotenes oꞌ eꞌñe xhaponasa seyoxhro ñeñth ateth moenatenes Yompor. Allochñapaꞌ atthochña eꞌñe kowen sokthapeꞌchatannena erraꞌtsentheꞌ kowentetsa Yomporekop.

Romanos 16:25

Theꞌñapaꞌ yaꞌyeꞌchoxhtatoñepaꞌch Yompor tharroꞌmar ñapaꞌ ñach awamenkath sepeneꞌ, ñeñth eꞌñe ateth oten añ kowen ñoñets alloch yekeshperra. Ñeñthara añ kowen kothaphñats ñeñth neserrpareꞌtatenes ñeñth eꞌñe ateth pena Jesucristo ñeñth awathotheñ ama eñotpawo.

1 Corintios 11:4

Ñeñthoꞌmarña yoten ama pokteyaye ya ñeñthey asheñorreypaꞌ oꞌch yekaꞌmatamhoꞌta allempo yemaꞌyochena, amapaꞌ allempo yaꞌpotheññañ Yompor poꞌñoñ. Tharroꞌmar ñerraꞌm esempo yekaꞌmatamhoꞌtenapaꞌ xhach yottena ñerraꞌmrratheꞌ poꞌpsheñña acheñ pomnaren yepeneꞌ, amach añeyeꞌ pomnaren yepenaye Cristo. Attheñapaꞌ oꞌch xha yepenknaꞌntach Cristo ñeñth poꞌñoxh pomnaren yepeneꞌ.

1 Corintios 12:28

Ñamha alloweney eꞌñe yameꞌñeñoth Yomporpaꞌ eꞌñe poꞌpoñeꞌttsokma yethorraꞌyena Yomporekop. Tharroꞌmar Yomporpaꞌ attho naꞌyesonay paꞌnamen atthoch yethorraꞌyesa ñokop. Ñanompaꞌ awoꞌt nan poesheñaꞌtets allsensarethneshaꞌ. Allothpaꞌ awoꞌt nan poꞌpoñexhno ñeñthchaꞌ aꞌpotheꞌ poꞌñoñ. Allothpaꞌ awoꞌt nan ñamha poꞌpotantañ ñeñthchaꞌ yexhatenawet Yompor poꞌñoñ. Allothpaꞌ awoꞌt nan poꞌpotantañ ñeñthchaꞌ orrtateꞌ poꞌpartsoña. Allothpaꞌ awoꞌt nan poꞌpotantañ ñeñthchaꞌ thorratsa atthoch aꞌkrratyeset ñeñth atsnaꞌtyets. Poꞌpotantaññapaꞌ awoꞌt neꞌ ñeñthchaꞌ thorratsa yenpoeꞌ allowen acheñeneshaꞌ. Poꞌpotantaññapaꞌ awoꞌt neꞌ ñeñthchaꞌ yechenawet allowenet. Poꞌpotantaññapaꞌ awoꞌt neꞌ ñeñthchaꞌ eñosyesets paꞌnamen ñoñtso.

1 Corintios 13:1

Amaꞌt yeñosyesatset eꞌñe kowen paꞌnamen acheñ poꞌñoñetoñaꞌ ñerraꞌm ama yemorreñcho yamoꞌtspaꞌ eꞌñe yeñosyeñothpaꞌ añña Yomporpaꞌ atthach enteney ateth ñerraꞌmrratheꞌ kon ñeñth attha amaꞌtoxhtetsa. Tharroꞌmar ama yemorrenteñotheyeꞌ yeñosyeno paꞌnamen ñoñets. Ñatoꞌ amaꞌt yapaꞌ yeñosatsetyes eꞌñe kowen ateth ñerraꞌm Yompor poꞌmhllañotheñnanesharñaꞌ ñerraꞌmña ama yamoꞌts yemorrentenopaꞌ eꞌñe yeñosyeñoth Yomporpaꞌ atthach enteney ateth ñerraꞌmrratheꞌ patashtalla challachallatspenet. Tharroꞌmar ama yemorrenteñotheyeꞌ yeñeno.

1 Corintios 13:3

Ñamha amaꞌt es yapaꞌyesatsech wokchañneshaꞌ ora allowen ñeñth yechyenñaꞌ, ñerraꞌm ama yemorrenteñotheyeꞌ es yapaꞌyenanetopaꞌ amaꞌt ateth yephatstapaꞌ Yomporpaꞌ amach kowenayeꞌ entenye. Ñamha amaꞌt eꞌñe yameꞌñeñoth pokteꞌ yentatsech poeꞌmoñeꞌteñothetay oꞌch chamayet ora bethnathotheypaꞌ tharraña ñerraꞌm ama yemorrenteño yamoꞌts, amaꞌt ateth yephatstapaꞌ Yomporpaꞌ attherach amach kowenayeꞌ entenye.

1 Corintios 13:8

Attho yemorrentannenapaꞌ ñeñthpaꞌ amach awañañathto amaꞌt errponaña. Ñamha theꞌpaꞌ amaꞌt yaꞌpotheññañeñ Yompor poꞌñoñ tharraña esempowañenpaꞌ wañchaꞌ attho yaꞌpotheñ theꞌ. Ñamha amaꞌt attho theꞌpaꞌ yeñosyen poꞌpoñ ñoñtsopaꞌ ñeñthpaꞌxhoꞌña esempowañenpaꞌ wañchaꞌ. Ñamha amaꞌt attho yeñotañtena theꞌpaꞌ ñeñthpaꞌxhoꞌña esempowañenpaꞌ wañerrchaꞌ.

1 Corintios 14:29

Ñamha añ pokteꞌ eꞌñech epsheña, amapaꞌ maꞌpsheña ñeñthchaꞌ aꞌpotheꞌ Yompor poꞌñoñ. Poꞌpoñexhno acheñeneshaꞌpaꞌ añ pokteꞌ xhoch eꞌmhñochet, ñamha xhoch kothapeꞌchet poꞌñoxhtheꞌ ateth oteney Yompor.

1 Corintios 14:39

Ñeñthoꞌmarña theꞌ, masheñneshachaꞌ ñamha noxhaneshachaꞌ, oꞌch noterrserr: Añ pokteꞌ oꞌch semaꞌyoxhrena aꞌpotheꞌ Yompor poꞌñoñ eꞌñe eñotoxhen ñoñtso, tharraña pokteꞌ oꞌch semnatanet eñosetepaꞌ poꞌpoñ ñoñtso.

1 Corintios 14:4

Tharraña ñeñth eñets poꞌpoñ ñoñtsopaꞌ ñeñthpaꞌ amach attheyeꞌ peno. Añekpach eñen eꞌñe ñokpa atthoch womenk phan poeyoxher eꞌñe ñañeña. Tharraña ñerraꞌm esempoña yaꞌpotheññañ Yompor poꞌñoñ eꞌñe eñotoxhenpaꞌ ñeñthpaꞌ xhoch poꞌñoxh es yeñotateñ allowen ñeñth ameꞌñetsa atthoch womenk penet poeyoxher Yomporekop.

1 Corintios 15:51

Ñewa, oꞌch neñotatas ñeñthchaꞌ ateth perra esempo, ñeñth ñaptha eñoteñ theꞌ Yompor. Poꞌñoxhpaꞌ amach eꞌñe alloweney yerromwo. Tharroꞌmar ñeñthey orameñ korretsa allempoch werra Cristopaꞌ amach yerromo. Allempopaꞌ atthach yepoꞌpoñet

1 Corintios 16:22

Ñerraꞌm eseshaꞌ ama morrentenaye Yepartseshar Jesucristo ñeñthña ateth petsa aꞌkoñchatarethtepaꞌch. Theꞌpaꞌ ñeñthach notas, werrnayepaꞌtheꞌ ñeñth Yepartseshar yepen.

1 Corintios 4:1

Ñeñthoꞌmarña theꞌpaꞌ notenes, epsheñoꞌmarey na epan masheñ Apolos, añ pokteꞌ oꞌch senteney ateth ñerraꞌm ñeñthey thorretsa Cristokop. Ñamha añ pokteꞌ oꞌch senteney ateth ñerraꞌm yapaꞌ eyecharethey oꞌch yaꞌpothoñ Yompor poꞌkowenña.

1 Corintios 7:19

Amaꞌt yaꞌtsorrarethtatstapaꞌ ñeñthpaꞌ ama es sherbeno. Ñamha amaꞌt ama yaꞌtsorrarethtatstopaꞌ ñeñthpaꞌxhoꞌña ama es sherbeno. Añña nanak sherbets oꞌch yepha ñeñth ateth oteney Yompor.

1 Corintios 8:4

Theꞌpaꞌ oꞌ notwas ateth theꞌñapaꞌ oꞌch neserrpareꞌtatas ñeñth kowentetsa Yomporekop. Ñeñthey ameꞌñenaya Cristopaꞌ pokteꞌtheꞌ oꞌch yerren poꞌchets ñeñth amtsareth ayexhkatarethekop, ñatoꞌ amatheꞌ pokteyaye. Ñewa, yeñoteñ ñeñth ayexhkatareth ñeñth tomaꞌntatenet ñetpaꞌ poꞌñoxhpaꞌ ama eñalle Yompor ñeñth ateth. Yapaꞌ yeñoteñ Yomporpaꞌ eꞌñe pathrra.

2 Corintios 12:11

Sapaꞌ attho señosatseꞌtatyenen eꞌñe kowen ñeñth eꞌñe nokpa, tharraña amaꞌt attheñpaꞌ napaꞌ eꞌñe poꞌñoxh notatseꞌtyen, tharroꞌmar napaꞌ ama nepallteno oꞌch neños eꞌñe kowen ñeñth eꞌñe nokpa. Añña palltetsa sa oꞌch señosapreten kowen ñeñth eꞌñe nokpa. Tharroꞌmar sapaꞌ señotenen atarr asherbhoyenen. Amaꞌt poꞌpotantañ ñeñth atarr seꞌmhñotateneꞌ atarr ommoꞌchenetañ, ñetpaꞌ allsensarethetoꞌ Yomporeshoth, ñetpaꞌ atarroꞌ nanak sherbenet, elloña napaꞌ atarr asherben entenen Yompor, amaꞌt napaꞌ ama esoyeꞌ nenteno.

Gálatas 5:16

Tharraña napaꞌ oꞌch notas ñeñth poktetsa ñeñthchaꞌ ateth sepha. Eꞌñepaꞌchña kowen sokrrena Partsokop ñeñth ateth kothapeꞌchatenes Parets Poekamkëñ. Allochñapaꞌ amach alloꞌna sephaꞌyesneno ñeñth ateth moenatyenes sechets.

Gálatas 5:22

Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

Gálatas 6:3

Ñerraꞌm eseshaꞌ pommoꞌcheñoth oten, “napaꞌ ama xho es neyexhkateno Yomporekop ñeñth ama pokteyaye”, ñeñthpaꞌ ñañeñach shekëtsa, tharroꞌmar poꞌñoxh ñeñth ateth acheñpaꞌ amach es sherbeno Yomporekop.

Efesios 3:4

Ñerraꞌm esempoch selleyon ñeñth nekellkënnas allempochña señoch napaꞌ poꞌñoxh oꞌ xhapona neyoxhro eꞌñe ora ñeñth ateth sherbeney Cristo, ñeñth amaꞌt awathotheñ ama eñotpawoyaye.

Efesios 6:19

Napaꞌxhoꞌña xhokmoepaꞌchña semaꞌyochampenna. Oꞌch senamon Yompor nokop allochñapaꞌ ñachña neꞌñorateneꞌ atthoch amach nemhchaꞌnañotha neserrpareꞌteññañe poꞌñoñ. Allochñapaꞌ atthochña neñotatyesanet kowen ñoñets ñeñth alloch eꞌñe yekeshphaꞌwerra alloweney; ñeñthpaꞌ ama eñotpawoyaye, amaꞌt awathotheñ.

Colosenses 1:26

Añchaꞌ naꞌpotherr ñeñth amaꞌt awathapaꞌ ama eseshayeꞌ eñotayeꞌthe eꞌñe yatañneshapotheñ tharroꞌmar allempopaꞌ ama xhenaꞌ allempoch eñotaterranet Yompor. Tharraña theꞌñapaꞌ eꞌñe eñotaterrey Yompor alloweney ya ñeñthey poeyochreshaꞌ pen Parets.

1 Timoteo 3:16

Ñamha yapaꞌ yeñoteñ ñeñth ateth kothapeꞌchateney Yompor attho yameꞌñerapaꞌ ñeñthpaꞌ nanak koxhneshaꞌ amaꞌt awathotheñpaꞌ ama eseshayeꞌ eñotenaye. Añpaꞌ ñeñth ateth yaꞌxhoteñ Cristo: Amaꞌt Paretspaꞌ oꞌ acheñetos añe patsro, tharraña Yompor Poekamkëñothña nanak awamenkathtosa ñeñth eñotateneꞌña acheñeneshaꞌ ñapaꞌ eꞌñe poꞌñoxh kowen. Amaꞌt allowen mellañotheñnaneshaꞌpaꞌ eꞌñe entwoñeteꞌth ñeñth ateth phaꞌyeseꞌth añ patsro, ñamha ñeñth ameꞌñayeꞌthpaꞌ xhokma aꞌpothet Cristo errakmañen arr patsro amaꞌt all ama judioneshayaye. Ñamha shonteꞌ acheñ ameꞌñerraya Cristo, allothña Yompor poꞌkowenñothpaꞌ oꞌ alla agër poeꞌntaño.

1 San Juan 4:8

Ñeñthña ama amorrentñopaꞌ ñokpoetpaꞌ ama eñoteñetoña ateth penaña Yompor, tharroꞌmar Yompor ñapaꞌ ña atarr amorrentañtetsa.