1 Corintios 1:6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

⁶ Ñeñth ateth yotwanmas ñeñthchaꞌ ateth phonas Cristo, theꞌpaꞌ atethxhoꞌ oꞌ etsotatwonas.

1 Corintios 1:6 Iomraidhean Croise

San Marcos 16:20

Poeyochreshaꞌñapaꞌ awanomyeset, serrpareꞌtyesnomoet errapharen. Partseshaꞌ Jesúspaꞌ xhokma thorrapretenanet, orrtatenanet poꞌpartsoña atthoch acheñeneshaꞌ eꞌñech eñotenanet ñeñth ateth serrpareꞌtyenet, ñeñthpaꞌ eꞌñe poꞌñoxh Parets poꞌñoñ. Ñeñthpaꞌ atthetepaꞌch Nompore. Allowa.

Los Hechos 11:17

Ñewa, Yomporpaꞌ eꞌñe pokteꞌ enteñ oꞌch chorranet ñet eꞌñe atthekma ateth chorraꞌya ya allempo yameꞌñya Yepartseshar Jesucristo. Ñewa, ñerraꞌm eꞌñe pokteꞌ enteñ Yomporpaꞌ nañapaꞌ errothenothwatheꞌkaꞌye necheꞌptareꞌchña Yompor.

Los Hechos 11:21

Yomporpaꞌ nanak awamenkath phanet. Ñeñthoꞌmarña shonteꞌ acheñ ameꞌñachet Yepartseshar Jesús, oꞌ aꞌypoꞌñaꞌwerret ñeñth awath pokthaphñet.

Los Hechos 18:5

Allempoñapaꞌ wapa ñamha Silas epoet Timoteo. Thaya wapoet Macedonioth. Allempopaꞌ añ nanak thorrena Pablo serrpareꞌteꞌ. Ñapaꞌ añ eñotatenan judioneshaꞌ Jesúspaꞌ ñeñtharakaꞌye Cristoterrets ñeñth atarr kowenet awathotheñ.

Los Hechos 20:21

Oꞌ neserrpareꞌtatwas añ pokteꞌ oꞌch sokthapeꞌcherr ello kowen Yomporekop ñamha añ pokteꞌ oꞌch sameꞌñera Yepartseshar Jesucristo. Ñeñthpaꞌ ateth oꞌ notwas allowenes ñeñthes judioneshas ñamha amaꞌt ñeñthes griegoneshas.

Los Hechos 20:24

Tharraña amaꞌt atethpaꞌ napaꞌ ama nemhchaꞌteno. Amaꞌtchaꞌ nerromapaꞌ pokteꞌ nenteñ oꞌch nerroma. Theꞌpaꞌ añ palltetsa oꞌch neꞌnwa netarwas. Oꞌch netsotatwoñ ora allowen ñeñth ateth llesensaꞌn Yepartseshar Jesús. Ñeñth ateth llesensaꞌn Yepartseshar Jesúspaꞌ ñeñthpaꞌ atthoch neserrpareꞌtach acheñeneshaꞌ ñeñth kowen ñoñets attho Yompor pomoereñothpaꞌ aꞌkeshphaterreychaꞌ.

Los Hechos 22:18

Allempoña oꞌ orrtona Yepartsesharpaꞌ ateth oten: “Thayekma oꞌch awerreph arroth Jerusaléñoth, tharroꞌmar arrpaꞌ amach eseshaꞌ peꞌmhñotaye allempoch phaꞌpothon neñoñ.”

Los Hechos 23:11

Tsapathña tsapopaꞌ oꞌ alla orrteññañerr Pablo Yepartseshar, ateth otos: —Amach pellkatsto, tharroꞌmar Romopaꞌxhoꞌña all palltena oꞌch phaꞌpothon neñoñ ateth oꞌ phaꞌpotwon arr Jerusaléño.

Los Hechos 28:23

Allempoñapaꞌ aꞌpoktachet allempoch waxhaꞌtet alloꞌtsen Pablo allempoꞌch serrpareꞌtatanet. Allempoña oꞌ xhap allempoch waxhaꞌtetpaꞌ allempopaꞌ shonteꞌ acheñ waxhaꞌtatsa Pablesho. Allempoña Pablopaꞌ eꞌñe ellapen serrpareꞌtatawet; aꞌpothanet ateth pena Yompor poꞌkowenña ñeñth attho ayochreshathtena ña. Ñamha lleyatyesanet Moisés poꞌñoñ all oten atethchaꞌ pha ñeñthchaꞌ Cristotats. Ñamha lleyatyesanet poꞌñoñ ñeñth aꞌmhtayeꞌth awath Yompor poꞌñoñ all oten ñamha atethchaꞌ pha ñeñthchaꞌ Cristotats. Ñapaꞌ nanak moeneñ oꞌch ameꞌñatanet attho Jesúspaꞌ poꞌñoxh ñeñth Cristotats.

Romanos 15:19

Ñamha ñetpaꞌ añña ameꞌñatawet ñeñth attho eꞌñe awamenkath penen Cristo atthoña norrtatanet Yompor poꞌpartsoña ñeñth ama poentareto. Ñetpaꞌ ñeñthña eñotatwawet, ñeñthpaꞌ poꞌñoxh eꞌñe Parets Poekamkëñoth ñeñth eꞌñe awamenkath yepeneꞌ. Attheñapaꞌ ora errakmañen oꞌ neserrpareꞌtwa añ kowen ñoñets attho eꞌñe yameꞌñeñoth Cristopaꞌ oꞌch yekeshperra. Atethña neserrpareꞌtyesnom allemeñ anetsoꞌmar eꞌñe Jerusaléñotheñ Ilíricoꞌmarowen.

2 Corintios 12:12

Tharroꞌmar awañmoꞌcha allempo naꞌpoena sesho, napaꞌ allña norrtatyesonas Yompor poꞌwamenk ñeñth atarr echarrareꞌ ñeñth sapaꞌ amaꞌt awathapaꞌ ama sentare ñeñthchaꞌña señotateꞌ ñeñthpaꞌ Parets poꞌwamenk ñamha ñeñthchaꞌ señotateꞌ napaꞌ poꞌñoxh Yomporña nellsenseneꞌ. Ñeñthoꞌmarña eꞌñe kowen naꞌwantennas ñeñth atarr thorrapoꞌ sentyen.

Gálatas 3:5

Ñamha allempo Yomporpaꞌ chorratasa Poekamkëñpaꞌ ñapaꞌ añ orrtatonas partsoteñets eꞌñe sesho. Ñewa, ñeñthpaꞌ amakaꞌye añotheyeꞌ orrto eꞌñe sa setsoteñoth ñeñth ateth anareth judioneshakop, ñeñthpaꞌ añothkaꞌyeña orrta eꞌñe sameꞌñeñotha ñeñth ateth yeserrpareꞌtatwas.

2 Tesalonicenses 1:10

Ñapaꞌ tharroꞌmarchaꞌ werra atthoch alloweney ñeñthey poeyochreshaꞌ pen Parets, yañapaꞌ yekowentatapoerrñañchaꞌ. Alloweney ñeñthey ameꞌñayeꞌth atarrchaꞌ yekwanrrortapoer. Saꞌnachña kowentatapoerreꞌ tharroꞌmar sapaꞌxhoꞌña sameꞌñena kowen ñoñets ñeñth yeñotatenes.

1 Timoteo 2:6

Ñamha ñeñthara ñeñth aꞌrroyatsa eꞌñe ñañeña atthoch poerromoeñoth ñapaꞌ oꞌch tsaꞌtwonaya yoꞌchñar eꞌñe alloweney ñeñthey acheñey. Ñeñthpaꞌ, ateth orrtatonay Pompor allochñapaꞌ atthoch yeñoch ñeñth ateth kothapeꞌchen ña. Allempoña xhap allempo eꞌñe pokteꞌ enteñ Pompor oꞌch xhap añ patsropaꞌ allempoña eꞌñe eñotatey ñeñthepaꞌt ateth kothapeꞌchen Pompor.

2 Timoteo 1:8

Ñeñthoꞌmarña theꞌpaꞌ amach pepenkatsto attho peserrpareꞌteññañ ñeñth ateth pena Yepartseshar Cristo. Ñamha amach pepenkatsto eꞌñe noꞌmar attho napaꞌ oꞌ cárceleꞌterrnet eꞌñe nameꞌñeñoth Cristo. Elloña xhochña pokteꞌ peñch phamha oꞌch pemoeroxhtapretna eꞌñe peserrpareꞌteñoth Cristo poꞌñoñ tharroꞌmar Yomporpaꞌ atthoña awamenkath peneph.

El Apocalipsis 1:2

Tharroꞌmar napaꞌ nach eñotatawet allowenet ñeñth eꞌñe poꞌñoxh ñeñth ateth eñotatenen Yompor poꞌñoñ ñamha ora ñeñth allpon eñotatenen Jesucristo amaꞌt ñamha ñeñth ora allpon gatyennet.

El Apocalipsis 1:9

Theꞌ napaꞌ ñeñthen sochetsa Juan oꞌch alla noterrserr. Napaꞌ ñeñthen eꞌñe semoꞌnasheñ sephowenen sa. Napaꞌ ñeñthen semoeroxhtapretenaya eꞌñe yameꞌñeñoth Jesús. Ñamha eꞌñe yeyemteñoth ñapaꞌ eꞌñech akopha es yaꞌwanten eshekchaꞌ yaꞌmhchaꞌtarethtapretera. Ñewa, napaꞌ oꞌch neñotatas ñeñth ateth nepena na arr. Awañmoꞌcha napaꞌ eꞌñe neserrpareꞌteñoth Yompor poꞌñoñ ñeñth ateth eñotatenen Yepartseshar Jesucristo, añña ñeñth neꞌmoñeꞌteneꞌpaꞌ oꞌ waporeꞌtennetaꞌ arr atarr allaphar all rroxhpeꞌchañethollo ñeñth otenet Patmos.

El Apocalipsis 12:11

Ñeñth masheñneshaxhnor ñeñth ameꞌñenaya Yompor, ñetñapaꞌ oꞌ eꞌñe aꞌmchechweret oneñeth ñeñth tomaꞌtampesyenawet eꞌñe attha. Añ aꞌmchechaterreꞌ ñeñth attho Cristo rroma, ashatarethta poꞌrras ñeñth tomaꞌntenaya Carnero ñeñth moetseteꞌth ochñartsokop. Ñamha añ aꞌmchechaterreꞌ ñeñth attho masheñneshaxhno xhokma eñosyenet eꞌñe kowen ñeñth ateth pena Cristo poꞌkowenña. Amaꞌt amoeroxhtatarethetyenetpaꞌ ñetpaꞌ ama kexhpoeñeto attho eñosyenet eꞌñe kowen Cristokop, tharroꞌmar ñetpaꞌ ama mechaꞌteneto amaꞌt mamesha oꞌch rromoet eꞌñe pameꞌñeñothet Cristo.

El Apocalipsis 12:17

Ñeñthña atarr atsrreꞌmateꞌña añyañ, ello alla atarr eꞌmoñeꞌterranerr koyaneshaꞌ. Allempoñapaꞌ awoꞌ alloꞌtsaꞌyen poꞌpotantañ koyaneshaꞌ poechoyoreshaꞌ oꞌch kellarosanet ñamet. Tharroꞌmar ñetpaꞌxhoꞌña xhokma ameꞌñeñet Yompor poꞌñoñ ñeñth ateth anareth ñamha xhokma kotheññañet Jesucristo pokthaphña.

El Apocalipsis 19:10

Nañapaꞌ nekonkorposa mellañotheñ paꞌrrpho ñeñth neserrpareꞌtateneꞌ oꞌch nemaꞌyochyañ, tharraña ñapaꞌ ateth oten: —Napaꞌ amach pemaꞌyochatsetno, napaꞌ añana ñeñthen pethorrapretenaya Yomporekop ñamha allowen pemoꞌnasheñneshaxhno ñeñth serrpareꞌteneꞌ attho ameꞌñeñet Jesús. Phapaꞌ añchaꞌña pemaꞌyocha Yompor ñapoeth. Tharroꞌmar allowen ñeñth aꞌmhteneꞌ Yompor poꞌñoñ, eꞌñe ña Poekamkëñothpaꞌ añ serrpareꞌtenet ñeñth attho yameꞌñeña Jesús.

El Apocalipsis 6:9

Allempoñapaꞌ oꞌ torerranerr ñeñth paꞌmnareñ allo ayomrrareth Yompor poꞌlibro, naña nekwererrpaꞌ allñapaꞌ nenterrerr altar ñeñth allekma aꞌkrrateteꞌth ñeñth eñmosathtetsa Yomporekop. Eꞌñe all patsoth altaro all nent shonteꞌ kamoekñetsoxhno ñeñth amtsanatarethtatseꞌth all eꞌñe poeserrpareꞌteñothet Yompor poꞌñoñ attho aꞌmetheteꞌth ñamha attho ameꞌñeñet Cristo.