Efesios 1:11 - Nuevo Testamento Tzeltal de Amatenango

¹¹ Dios a stꞌujotik ta slijkibal to tal, yuꞌun te jun nax ya xkꞌootik sok te Cristo sok ya me xba kichꞌtik te jmajtantik te xatꞌbilotike. Jich tutꞌil snopoj stukel mismo te Diose, sok ya xkꞌot ta pasel yuꞌun spisil te tut lek ya yile.

Bible in Tzeltal Bachajón

¹¹ Ta scuenta Cristo ha nix hichotcotic la yac' te ya x'ac'ot quich'cotic bintic ay yu'un Dios, te bin ut'il namey tsahbilotcotic yu'un te mach'a ya yac' c'ohtuc ta pasel spisil bin ya sc'an yo'tan stuquel,

Bible in Tzeltal de Oxchuc y Tenejapa

¹¹ Ta swenta bit'il jun c'oemotic soc Cristo, namey tsabilotic yu'un Dios te ya yac'botic quich'tic soc Cristo te sc'ulejale. Jich la xchap ta xjajch'ibal te Diose, soc ya yac' c'otuc ta pasel te sc'anjel yo'tan stuquele.

Efesios 1:11 Iomraidhean Croise

Hechos 13:48

Te kꞌalal la yaꞌiybeyik sluwaril to, te machꞌatik ma juriyouke ben jun yoꞌtanik a la sujt yuꞌun, y lijk yalik te ben tsaꞌam te skꞌop Kajwaltike. Spisil a xchꞌuunik te machꞌatik tsabilik yuꞌun te ya xkuxuyinik sbajtel kꞌinale.

Hechos 2:23

Pero te kꞌalal akꞌot entregal ta akꞌabik te Jesuse, te tutꞌil jich snopoj ta primero te Diose, te jaꞌexe la atsakik y la amilik, yuꞌun la awaꞌbey ta skꞌabik te machꞌatik ma snaꞌbeyik sba te Diose te la sjojkꞌanik ta krus.

Hechos 20:27

porke la kalbeyexix spisil te tut ay ta yoꞌtan te Diose, ni maꞌyuk tuti jmuk ta koꞌtan.

Hechos 20:32

“Te ora to, kermanotak, ya kakꞌex ta kanantayel yuꞌun te Diose sok yuꞌun te skꞌop te kꞌuxutaybilotik yuꞌune. Ay spoder stukel te ya yakꞌ xchꞌiex ta skuenta Espíritu sok ya me yaꞌbeyex spisil te tut yaloj ta stojol te jtejklum tꞌujbil yuꞌune.

Hechos 26:18

Yuꞌun ya xba awikꞌtalanbe sit, jich makꞌ xbeenikix ta ijkꞌal kꞌinal a, ta sakil kꞌinal xlaj beenix a. Yuꞌun ma sigueuk ya xjapuyot yuꞌun a te pukuje, jaꞌ ya xjapuyotix yuꞌun a te Diose. Yuꞌun teme la xchꞌuunikone, jich me ya staik perdon yuꞌun a te smulike. Sok ya me kakꞌ ayinuk te ba aylan te chꞌul jtejklum yuꞌun Diose”, xyuton te Jesuse.

Hechos 4:28

Jich a spasik spisil te tut chapal awuꞌun ta primeroe te puersa jich ya xkꞌot ta pasele.

Romanos 11:34

Yuꞌun jich tsꞌibabil: “¿Machꞌa kꞌan snaꞌbe spensar te Kajwaltike? ¿Sok machꞌa kꞌan spꞌijutes?

Romanos 8:17

Y te tutꞌil yal-xnichꞌanotikix te Diose, jich ayix jpartetik te jmajtantik te Dios yaloj jilel te ya yaꞌbotike. Pajal ya kichꞌtik sok Cristo, teme jich ya xkꞌax jwokoltik soke, yuꞌun ta patil jun ayotik sok ta lekilal.

Romanos 8:28

Jnaꞌojtik te Diose ya yaꞌbe spisil te tutik lek te machꞌatik lek skꞌanoje, y sok te ikꞌbilik yuꞌune, jich tutꞌil te ya skꞌan yoꞌtan stukele.

Romanos 8:29

Jaꞌ te machꞌatik tsabilik ta nail to yuꞌun te Diose, te la snop Dios ta slijkibal to te jich ya xkꞌotik te tutꞌil Xnichꞌane. Yuꞌun jich ya xkꞌot te Xnichꞌan te jaꞌ bankilal yuꞌun te bayal yijtsꞌinabe.

Romanos 8:30

Sok te machꞌatik Dios ta slijkibal to jich stsaoje, la yikꞌtalan euk. Sok te machꞌatik ikꞌtalanbile, jamal a yalbe te kolemix yuꞌun te smule. Sok te machꞌatik jamal a yalbe te kolemix yuꞌun te smule, la yakꞌtalanbe smajtanin te slekilale.

Romanos 9:11

Y antes te ma to xla ayin ae, te kꞌalal maꞌyuk tut spasojik, ni lek ni ma lekuk, Dios a albot yuꞌun te xRebecae: “Te bankilale jaꞌ me ya yaj-aꞌtelin te ijtsꞌinale”, te xꞌutote. Jaꞌ pajal sok te tutꞌil jich tsꞌibabil jilel ta Sjun Diose: “Kꞌux ya kaꞌiy ta koꞌtan te Jacobe; y te jꞌEsaue ma kꞌuxuk ta koꞌtan ya kaꞌiy stukel”, xchi me. Jich chikan ta jamal te tutꞌil stukel ay ta skuenta stsael te Diose te machꞌa ya yikꞌe sok te tut snopoj ta yoꞌtane. Ma jaꞌuk ya snaꞌbe te tut spasojike.

Gálatas 3:18

Porke teme jaꞌ ya kichꞌtik te bendision ta skuenta te mantaliletike, ma jaꞌukix a te tut japbile. Pero te Diose la yaꞌbe te tut sjapojbe te jꞌAbrahame te ta majtan naxe.

Efesios 1:14

Te Chꞌul Espiritue jaꞌ seña te ya kichꞌtik te majtanil te Dios ya yaꞌbotik kꞌalal ya stsꞌakay te machꞌatik ya yichꞌ koltayel yuꞌune. Yuꞌun jich me ya kalbetik te slekilale.

Efesios 1:18

Ya jkꞌanbe Dios te yauk sjambeyex apensarike yuꞌun ya me anaꞌik a te tut yipalex ta smaliyel te jaꞌ ikꞌbilexix yuꞌune. Ben tsaꞌam y ben chapal te majtanil te Dios ya yaꞌbe te machꞌatik yuꞌune.

Efesios 1:5

Ta skuenta skꞌuxul yoꞌtan jich chapal yuꞌun te nail toe te jich ya yikꞌotik ta yal-xnichꞌan ta skuenta te Jesucristoe, jich tutꞌil te yaloje te jich ya skꞌan yoꞌtane.

Efesios 1:8

Dios la yaꞌbotik kiltik te slekil yoꞌtane sok la yaꞌbotik spisil pꞌijilil y sok rasonil.

Efesios 1:9

Y la yaꞌbotikix jnaꞌtik te tut ya skꞌan yoꞌtan te ma chikanuke, jaꞌ te tut xchapoj stukel mismo te yaloj te jich ya xkꞌot ta pasel yuꞌune.

Efesios 3:11

Jich a spas to te Diose jich tutꞌil te xchapoj ta sbajtel kꞌinale te jich a kꞌot ta skuenta te Kajwaltik Jesucristoe.

Colosenses 1:12

Sok jich me xꞌawalbeyik kola yal sok sbujts awoꞌtanik te Jtatik Diose, te jaꞌ xchapojex yuꞌun ya awichꞌik te ba sakil kꞌinal te majtanil te stukel ya yaꞌbe te machꞌatik jtejklumix yuꞌune.

Colosenses 3:24

Porke te jaꞌexe, jaꞌ ya xtuunex yuꞌun te Cristoe, te batsꞌi jaꞌ awajwalike.

Tito 2:14

Jaꞌ stukel a yakꞌ sba entregal ta milel te joꞌotik ta jkajtike. La skoltayotik yuꞌun ta spisil te tut ma lekuke, y tsꞌakal ya sakutesotik, yuꞌun stukel yuꞌunotik a, sok jaꞌuk ya koꞌtanintik ta pasel te tut leke.

Tito 3:7

yuꞌun la me skoltayotik yuꞌun jmultik ta skuenta te slekil yoꞌtane. Jich ya me kichꞌtik te kuxlejal sbajtel kꞌinal te ya jmalitike.

Hebreos 6:17

Jaꞌ yuꞌun, Dios la yalbe ta jamal te machꞌatik ya yichꞌik te tut yaloje, te ma xchꞌay ta yoꞌtan te tut yaloj ya yakꞌe. Jaꞌ yuꞌun la stejkꞌan sba ta yalel te tut ya yakꞌe.

Santiago 2:5

Kermanotak, te kꞌuxex ta koꞌtane, aꞌiya awaꞌiyik to: Te Dios la stsa te machꞌatik meꞌbaik liꞌ ba balmilale, yuꞌun jaꞌ me skꞌulejalik ya xkꞌot te xchꞌuunejik Diose sok te ya xba yichꞌik smajtanik te ba ay ta ajwalinel te Diose, te stukel yaloj ta skuenta te machꞌatik lek skꞌanojik te Diose.

1 Pedro 1:4

Jich me ya awichꞌik te majtanil yuꞌun Dios te skꞌejojbeyex ta chꞌulchane te ma snaꞌ xlaje, ni ma xꞌijkꞌub, ni ma xlaj te stsaꞌamule.

1 Pedro 3:9

Ma me apakbeyik te tut ma lekuk ya spasbeyexe, sok ma me xꞌawutik te machꞌa ya yutexe. Jaꞌ lek kꞌanbeyaik bendision. Yuꞌun anaꞌojik te la yikꞌex Dios yuꞌun ya awichꞌik bendision euk te jaꞌexe.