Kagi iji 8abadaagani8idj John 8:5 - Kije Manido Odikido8in: Ocki Mazinaigan

⁵ Ick8a dac ii, aa ajeni ogi kicponaton ii oza8iconia onagani, ickodeni e abadjitodj, kitcit8a 8isini8aganikag taji ka iji icpenimagani8indjin Kije Manidon e odinanig ii ickodeni. Midac ka iji k8anago8ebinag akikag. Teci8ag ki kitci inimikika acitc kegon ki kitci nodag8an. Ki kitci 8a8asakonese acitc ki kitci k8ig8an.

Kagi iji 8abadaagani8idj John 8:5 Iomraidhean Croise

Matio 24:7

Pejig8eieg a8iagog ka inakanezi8adj oga migana8an a8iagon pakan ka inakanezindjin, acitc a8iagog pejig aki ka tajike8adj oga migana8an a8iagon pakan akin ka tajikendjin. Kada ka8askadani8an acitc kada k8ig8an aianodjigotc.

Min8adjimo8ini kagi ojibiag kitcit8a Lok 12:49

“Nigi pi sakaa8e ooma akikag, acitc aja nikitci nda8endan kidji taji piskaneg!

Jesos Odanodaganan Odijitcige8ini8an 16:26

Kitata, ki odji kitci k8ig8an acitc ka iji padakisinogobanen kibaodimigi8am ki kitci ninigise. Midac ka iji cegodenigin ick8ademan. Kakina ka takonagani8i8adj ki pagisini8an opi8abiko sagapizoneabimi8an.

Jesos Odanodaganan Odijitcige8ini8an 4:31

Apitc dac ka ick8a aiamie8adj, migi8amini taji ka iji ma8adjiidi8adj ki kitci ninigiseni. Kakina ogi kigickago8an Mino Manidon. Midac ki paba tibadjimo8ag Kije Manidon omin8adjimo8ini, ega aja e kocimo8adj.

Kagi iji 8abadaagani8idj John 11:13

Ki kitci k8ig8an ii apitc. Pejig migi8am e taso midatcigin ki ick8a abadan iima odenakag. Nij8atcin kitci midasomidana (7000) a8iagog ogi nisigona8a meg8adj ka kitci k8ig8anigiban. A8iagog dac ka pimadizi8adj ki kitci segizibanig, acitc ogi icpenima8an Kije Manidon, 8ak8ig ka ogima8indjin.

Kagi iji 8abadaagani8idj John 11:19

Kije Manido 8ak8ig okitci aiamiemigi8am ki ceseni. Iima pidigamig kitcit8a mitigo8aj ki odji nag8an, ka odji mamidonendjigadenig nitam Kije Manido onakomo8in. Midac ka iji kitci 8a8asakoneseg, kegon ki kitci nodag8an, ki kitci nodagozi8ag inimikig, ki kitci k8ig8an, acitc ki kitci mizigan.

Kagi iji 8abadaagani8idj John 4:5

8a8asakoneseban ii kitci ogima8i tesabi8agan, acitc kegon kitci nodag8anoban acitc inimikig kitci nodagozibanig. Nigan kitci ogima8i tesabi8aganikag, nij8atcin mitigon ka piskanegin 8anak8atig cacigapiasakonesebanin. Mi igi8e manidog ka anokita8a8adjin Kije Manidon ka apitendagozi8adj.

Kagi iji 8abadaagani8idj John 6:12

Mina8adj aa Mantcenices ogi manibidon kodag pazag8aigani. Aja nigod8atcin odani manibidonan. Ki kitci k8ig8an. Ki poni tcakasige kizis acitc ki ani makade8izi, tabickotc makade8egin. Tibikikizis dac 8in, ki ani misk8asige tabickotc misk8i.

Kagi iji 8abadaagani8idj John 8:3

Kiabadj kodag ajeni iima teban e takonag oza8iconia onagani ka iji ick8azigadenig ka minomatenig aiamie pig8ini. Ki pija iima pecodj kitcit8a 8isini8aganikag ka oza8iconia8anig taji ka iji icpenimagani8indjin Kije Manidon, nigan ka iji ateg kitci ogima8i tesabi8aganikag. Kitci mane ki minagani8i ka minomatenig aiamie pig8ini, kidji pagidinama8adjin Kije Manidon, kigi odaiamie8ini8a kakina Kije Manido odanicinabeman.