Kagi iji 8abadaagani8idj John 12:1 - Kije Manido Odikido8in: Ocki Mazinaigan

¹ Kegapitc kegon e kitci mamakazinag8ag 8ak8ig ki odji pi nag8an, e 8idamagemagag adi ke iji8ebag. Pejig ik8e nigi 8abama. Kizison okonasi8age. Tibikikizisokag iji 8agidjigaba8iban. Midatcin acitc nijin 8anagocan sizok8epizo8ageban.

Kagi iji 8abadaagani8idj John 12:1 Iomraidhean Croise

Matio 12:38

Nandam Coda8innig ka nagadjito8agobanen inakonige8inan acitc nandam Coda8inni kikinoamage8innig ogi ina8an Jesosan: “Kikinoamage8inni! Mamada8izin, kidji 8abadai8ean teb8e kimacka8izi8in Kije Manidokag epitci odjimaganog8en.”

Matio 24:30

Midac 8ak8ig niga odji pi nagozinan e pi tag8icinian, nin, Ka pi Anicinabe8iidizodj. Kakina dac a8iagog ooma akikag kada kitci pabibagi8ag acitc kada kitci ma8i8ag, acitc niga 8abamigog, nin Ka pi Anicinabe8iidizodj, kidji pi najiseian nena8idj 8ak8ikag, e kitci macka8izian acitc e kitci icpendagozian.

Min8adjimo8ini kagi ojibiag kitcit8a Mak 13:25

8ak8ikag kada odagodjinog 8anagocag, acitc kakina kegonan icpimig kada ninigise8an.

Min8adjimo8ini kagi ojibiag kitcit8a Lok 21:11

Aianodjigotc kada kitci kotadendag8an e k8ig8ag, acitc kada kitci ka8askadani8an, acitc kada kitci akozinani8an. E kitci kotadendag8agin kegonan acitc e kitci mamakazinag8agin kegonan 8ak8ikag kada odji nag8anon. A8iagog dac kada kitci segizi8ag.”

Min8adjimo8ini kagi ojibiag kitcit8a Lok 21:25

“Kizisokag acitc tibikikizisokag acitc 8anagocikag kada mamakadjisedon kegonan. Ooma akikag kakina a8iagog kada kitci animendamog acitc oga kitci segiigona8a kitcigamini e kitci kiji8emaganig acitc e kitci mamagaanig.

John 3:29

Kikikendananan nabe ke niba8idj kitci modjigendam, kada o8idigemagani mega. O8idji8aganan dac aa nabe ka niba8idj, ke8in kitci min8endamon e nodagodjin epitci kitci modjigendag. Nin dac, mi maia tabickotc o8idji8aganan aa8e ke niba8idj epitendagozian. Nogom dac odjitcise mizi8e kidji modjigendaman.

Jesos Odanodaganan Odijitcige8ini8an 2:19

Niga ojitonan e kitci mamada8izimagagin kegonan icpimig 8ak8ikag acitc ooma akikag. Misk8i acitc ickode kada 8abadjigade8an acitc kada kitci packine.

Ojibiama8agani8i8ag ka teb8etamo8adj Rom odenakag 13:14

Tiegodj, pagidinik Jesos Christ ka Tibendjigedj kidji 8idjiigo8eg kidji gi sogigaba8ieg, acitc ka8in mamidonendakegon adi kegi iji minosegiban kidji madji inakamigizieg, ka kitci mosa8endameg ako kidji todameg.

Ojibiama8agani8i8ag ka teb8etamo8adj Rom odenakag 3:22

Jesos Christan e teb8eta8andjin a8iagon 8edji k8aiak8abamadjin Kije Manido. Kakina dac ka teb8eta8andjin Jesosan ododji k8aiak8abaman, ka8in mega opepakanenimasi8an a8iagon.

2 Konit 11:2

Nidami odendan epitci sagiinagok, acitc ii kitci sagii8e8in Kije Manidokag odjimagan. Mi maia tabickotc ocki ik8e ega 8ikad kagi 8idji8adjin naben ejinagozieg, kagi nakomondjin odadaman kidji iji niba8iigodjin pejigigotc naben. Nin dac, mi maia tabickotc kidadami8a epitendagozian, kagi 8idjiinagok kidji kikenimeg Jesos Christ, 8inikag eta kidji iji tibendagozieg.

Kalecia 3:27

Kakina mega kigi sigaadazom, Jesos Christikag kidji gi odji mama8iseieg. Nogom dac mi pejig8an 8in tibina8e Jesos Christ ka ijinagozidj ejinagozieg.

Kalecia 4:26

Anic dac aa ik8e ega ka tibenimagani8idj, Sara ka ijinikazodj, mi maia tabickotc Jerusalem 8ak8ig ka tag8ag ejinagozidj. Kidjodjominan dac apitendagozi aa.

Kalecia 6:14

Nin dac 8in, nikitci inadodan egi nibodj ka Tibeniminak Jesos Christ tcibaiatigokag. Ka8in dac odji pejig kodag kegon ni8i min8adodasin. Jesos mega egi nibodj tcibaiatigokag, ka8in odji pejig nidapitendasinan ini kegonan ka kitci apitendamo8adjin igi8e a8iagog ooma akikag ega ka teb8eta8a8adjin Jesosan. 8ina8a dac, ka8in odji pejig odapitendasina8an ini kegonan ka kitci apitendamanin.

Epes 5:32

Ii dac ikido8in ki8abadaigonan pejig e kitci apitendag8ag kegon niba8i8in odji. Misa8adj dac nidinendan mi ke8ina8a Jesos Christ acitc ka teb8etamindjin mikomagani8i8ag iima ikido8inikag.

Kagi iji 8abadaagani8idj John 1:20

Igi8e dac ka 8abamad8a nij8atcin 8anagocag ka takonag8a nikitcinikikag acitc ini8e nij8atcin pimide 8asakonendjiganatigon ka oza8iconia8agin, kiga 8idamon adi 8a ikidomagagin. Igi8e nij8atcin 8anagocag, mi ini8e Kije Manido ka ijinija8adjin tibadjimo8innin kidji nagadjiandjin ka teb8etamindjin iima ka taji ma8adjiidindjin ka nij8atcinigin odenan. Ini8e dac nij8atcin pimide 8asakonendjiganatigon, mi igi8e ka teb8etamo8adj ka taji ma8adjiidi8adj iima ka nij8atcinigin odenan.”

Kagi iji 8abadaagani8idj John 11:19

Kije Manido 8ak8ig okitci aiamiemigi8am ki ceseni. Iima pidigamig kitcit8a mitigo8aj ki odji nag8an, ka odji mamidonendjigadenig nitam Kije Manido onakomo8in. Midac ka iji kitci 8a8asakoneseg, kegon ki kitci nodag8an, ki kitci nodagozi8ag inimikig, ki kitci k8ig8an, acitc ki kitci mizigan.

Kagi iji 8abadaagani8idj John 12:3

Kodag kiabadj kegon e mamakazinag8ag 8ak8ig ki nag8an. Pejig kitci kikadanak nigi 8abama e miskozidj. Nij8atcidinibanin octig8anan acitc midatcibanin odeckanan. Oza8iconia sizok8epizoni okigickanaban kakina pepejig octig8anikag.

Kagi iji 8abadaagani8idj John 15:1

Ick8a dac ii, nigi 8abadan kodag kegon e kitci mamada8inag8ag 8ak8ig. Nij8atcin ajenig nigi 8abamag. Kakina pepejig ki minagani8i8ag pepakan kidji iji kodagia8adjin a8iagon. Mi ini ick8eag kodagito8inan, osa mega ick8asegin ini kodagito8inan ka8in aja kada nickadizisi Kije Manido.

Kagi iji 8abadaagani8idj John 21:14

Midatcin acitc niji8agoban asinig eji sakakisigiban ii 8akaak8aigan. Kakina pepejig e midatcin acitc niji8adj igi asinig iji mazinadeniban pejig o8izoni ka midatcin acitc nijindjin Mantcenices Odanodaganan.

Kagi iji 8abadaagani8idj John 21:23

Ii dac odenag ka8in mamakadj kizison onada8enimasi8an kek8an tibikikizison kidji 8aseanig, osa mega Kije Manido odicpendagozi8in o8aseatoni, acitc ke8in Mantcenices o8aseaton odenani.