Pilip 4:17 - Kije Manido Odikido8in: Ocki Mazinaigan

¹⁷ Ka8in eta kegonan kidji odisigo8anin nidiji nda8endasin. Tiegodj, nimin8endan e kikeniminagok kidji ca8enimigo8eg Kije Manido osa mega kigi ca8enimijim.

Pilip 4:17 Iomraidhean Croise

John 15:16

Ka8in kina8a ka onabamijieg. Nin sa ka onabaminagok acitc ka ijinijaonagok kidji paba ijaieg, kitci mane kidji mino todameg. Ini dac mino kegonan ke todameg kagige kada tag8anon. Kakina dac ke iji pagosenimeg Nidadam ni8izonikag, kiga minigo8a.

John 15:8

Kicpin kitci mane iji mino todameg, iidi e iji 8abadai8eieg e nosoneojieg, mi ke odji icpenimagani8idj Nidadam.”

Ojibiama8agani8i8ag ka teb8etamo8adj Rom odenakag 15:28

Midac ick8a ijitaian ii ka inanonigo8an, acitc ki minag8a kakina conian kagi ma8adjiagani8indjin, aja niga ija Spen ka ijinikadeg akikag, acitc ani ijaian kiga pi nda 8abaminom.

2 Konit 11:16

Nidikidonan kiabadj, ka8in “ki8ack8e” inenimijikegon. Kicpin dac pekic inenimijieg e ki8ack8eian, odapinicik tabickotc ke iji odapinegoban a8iag ka ki8ack8edj, kidji gi inadjimidizo8an pagi kenin.

2 Konit 9:5

Midac 8edji ki inendaman panima kidji k8ag8edjimag8a ni8idji8agananag kidji pi ndaodeomigo8eg ab8amaci tag8iciniag. Kigagi 8idjiigo8ag dac kidji ma8adjieg conia kagi ikido8egoban kidji migi8eieg, kidji gi ick8ataieg apitc tag8iciniag. Midac iidi ke iji 8abamigo8eg enigokodeeieg e 8i migi8eieg, acitc ka8in 8in egi kadjinijaogo8eg kidji migi8eieg.

Pilip 1:11

Midac Jesos Christ kiga 8idjiigo8a apanigotc kidji mino inakamigizieg, kidji gi odji icpenimagani8indjin Kije Manidon acitc kidji gi odji manadjiagani8indjin.

Pilip 4:11

Ka8in nidikidosi ii osa e nodeseian kegon. Aja mega nigi kikinoamadizonan kidji min8endaman 8egonenigotc aiaman.

1 Tesalonika 2:5

Kikikendana8adok ega 8ikad egi min8adjimagid8a a8iagog kidji gi k8ag8e min8endamiagid8a, acitc ka8in kek8an kidji gi odji minigo8ag conia 8edji ki paba kagik8eiag. Kije Manido dac okikendan e teb8emaganig ii.

1 Timote 3:3

Panima ega ki nta ki8ack8ebidj acitc ega ki sogendagozidj. Tiegodj, aa a8iag panima kada kitci nokadizi acitc kada pekadizi. Ka8in acitc oda kitci sagiasin conian.

1 Timote 6:10

Epitci sagiagani8idj conia, mi iima 8edjimagagin kakina madji kegonan. Nandam a8iagog Kije Manidon omikanani ogi nagadana8a epitci 8i 8anadizi8adj, acitc mi 8edji kitci kodagiidizo8adj.

Tite 1:7

Aa8e ka niganizidj aiamiemigi8amikag, odanokita8an Kije Manidon. Kada k8aiak8adizi dac, ega kegoni kidji gi inactaonagani8idj. Ka8in kada kitci inenimidizosi, ka8in kada 8ake8ina8ezisi, ka8in kada kitci minik8esi, ka8in kada sogendagozisi, acitc ka8in oda k8ag8e 8agackibinasi8an a8iagon kidji odji kackiadjin conian.

Tite 3:14

Panima ka 8idji teb8etamomaiakonig ki ani kikendamo8adj ke8ina8a kabe kidji 8i mino ijitcige8adj, kidji gi 8idjia8adjin ini8e ka kitci nodesendjin. Ka8in dac migodj kada pimadizisi8ag.

Ebaro 6:10

K8aiakozi Kije Manido. Ka8in dac kada 8anikesi adi kagi iji mino ijitcigeieg acitc adi ka apitci sagieg. Kigi 8abadai8em dac adi epitci sagieg apitc ka 8idoka8eg8a odanicinabeman acitc kiabadj nogom ka 8idoka8eg8a.

1 Pien 5:2

8e8enda kana8enimikog igi8e ka teb8etamo8adj, Kije Manido kagi anonigo8eg kidji nagadjieg8a. 8e8enda todaokog tabickotc a8iag ka mino nagadjiadjin omantceniciman. Min8endamok kidji mikimeg8a, adi eji min8endag Kije Manido, ka8in 8in “mi panima” kidji inendameg. Nagadjiikog enigokodeeieg, ka8in eta conia kidji odji odisigo8eg.

2 Pien 2:15

Ki pake8ag Kije Manidon omikanani acitc aja 8anicinog. Okagikina8abama8an niganadjimo8innin Balaaman, mi ini Bosor og8izisan, adi ka pi inakamigizindjin 8eckadj. Ogi min8endanagoban aa Balaam e madji inakamigizidj kidji odji coniakedj.

2 Pien 2:3

Igi kikinoamage8innig ka kagina8icki8adj okitci mosa8endana8an kodagian a8iagon odaimini. Kitci 8i coniake8ag e kagina8ickimigo8eg kidji 8agackibinigo8eg. Aja 8eckadj Kije Manido ogi onendan kidji pajacte8adjin. Ka8in nibasi Kije Manido, midac aja peconag8ani kidji nici8anadjiadjin.

Jod odojibiigan 1:11

Kada kitci madji iji8ebizi8ag! Ogi kagikina8abama8an mega Kaen (Caïn) adi kagi iji panaagenipanin 8eckadj. Acitc ki panaage8ag kidji gi odji odisigo8adjin conian, tabickotc kagi todamogobanen Balaam 8eckadj. Ogi k8ag8e nak8ita8a8an Kije Manidon tabickotc Kone (Coré) 8eckadj. Kada nici8anadjiagani8i8ag dac ke8ina8a, tabickotc 8in kagi iji8ebizigobanen.