Pilip 3:19 - Kije Manido Odikido8in: Ocki Mazinaigan

¹⁹ Igi8e dac kada nici8anadjiagani8i8ag. Ka8in mega onosone8asi8a8an Kije Manidon, onosoneana8an eta ini kegonan 8ina8a tibina8e ka iji nda8endamo8adjin. Kitci agadendagozi8ag adi enakamigizi8adj, pekic dac kitci inenimidizo8ag ii e todamo8adj. Mi eta kegonan ooma akig omik8endana8an.

Pilip 3:19 Iomraidhean Croise

Matio 16:23

Jesos dac ki k8ekigaba8i acitc ogi inan Pienan: “A8as 8edi ijan, kitci madji manido! Ki8i nagabinijinan mega kidji todaman adi enendagozian kidji todaman. Ka8in Kije Manido ka inendag kidinendasin, tiegodj tabickotc a8iagog ka inendamo8adj kidinendan.”

Matio 25:41

“Mina8adj dac aa ogima oga inan ini8e onamadinikikag ke tendjin: ‘A8as 8edi ijaok, kina8a ka ick8aienimigo8eg Kije Manido! 8edi ijaok kagige ickodekag, kagi ojitama8agani8idj madji manido acitc odajeniman!

Min8adjimo8ini kagi ojibiag kitcit8a Lok 12:19

Niga inidizonan dac: Kitci manedon kidaiman, kiabadj kitci mane pibon kigagi odji pimadjionan. An8ebin, 8isinin, minik8en, acitc min8endan, mi ke inidizo8an,’ ki inendam.

Min8adjimo8ini kagi ojibiag kitcit8a Lok 16:19

Mina8adj dac Jesos ki kikinoamage e ikidodj oo8e: “Nigodin pejig nabe kitci 8anadizigoban, acitc pitcikonaegoban kegojican ma8adji ka sanaganigin. Taso kajik magocegoban.

Min8adjimo8ini kagi ojibiag kitcit8a Lok 18:4

“Aa tibakonige8inni kin8ej ka8in ododji iji nda8endasin. Kegapitc dac ki inendam: ‘Teb8e ka8in nimanadjiasi Kije Manido acitc ka8in a8iag nikidimagenimasi.

Ojibiama8agani8i8ag ka teb8etamo8adj Rom odenakag 16:18

Ka8in odanokita8asi8a8an ka Tibendjigendjin Jesos Christan igi a8iagog. Tiegodj 8ina8a tibina8e adi eji mosa8endamo8adj otodana8a. Kitci minotagozi8ag, acitc omin8adjima8an a8iagon. Midac iidi eji 8agackibina8adjin ini8e ega ka nisida8inago8adjin ega k8aiak e kikinoamage8adj.

Ojibiama8agani8i8ag ka teb8etamo8adj Rom odenakag 6:21

Nogom dac kidagadendana8a adi ka iji madjakamigiziegoban 8eckadj. Ka8in odji pejig kigi odji 8idjiigosina8a iidi ka inakamigiziegoban! Tiegodj kada nibo8ag igi8e iidi ka inakamigizi8adj.

1 Konit 3:3

Mi mega maia tabickotc a8iagog ega ka teb8etamo8adj ejinagozieg kiabadj. Kidodenimidim kakina pepejig e tacieg acitc kikaganondim. Kicpin iidi todameg, mi maia a8iagog ega ka teb8etamo8adj ejinagozieg8en, kana? Teb8e mi maia a8iagog ooma akikag ka iji tibendagozi8adj e todameg.

1 Konit 5:2

Kida ma8idana8an kipatado8ini8an! Tiegodj dac kikitci inadjimidizom. Aa nabe ka iji madjakamigizidj, 8ack8enijaok ka iji ma8asag8ino8eg!

1 Konit 5:6

8egonen 8edji kitci inadjimidizo8eg? Ka8in min8acisinon ii! Kikikendana8adok panima pagi eta obisidjigan atcigade apitc obiziganikani8ag kidji gi obicig mizi8e kidobiziganim. Mi ejiseg patado8in, ani obetamagan pinici kakina ka tacieg kidji nici8anadjiigo8eg.

2 Konit 11:12

Kiabadj niga odapina kodagiag a8iagog oconiami8an tabickotc nogom ka todaman, ega kidji sanagiinagok. Midac ne8ad iidi ke iji kackiag8a ega kidji kido8adj igi8e kikinoamage8innig ka 8agackibinigo8eg, ka kitci inadjimidizo8adj e ijita8adj tabickotc nina8it.

2 Konit 11:15

Ka8in dac mamakadendagozisi8ag igi8e madji manidon ka anokita8a8adjin “nik8aiak8adizimin” e in8ekazo8adj. Kada tibakonagani8i8ag adi kagi iji kackitamadizo8adj, adi kagi inakamigizi8adj.

Kalecia 6:13

Igi8e ka kitci apitendamo8adj kidji pak8ej8agani8indjin a8iagon, ka8in 8a8adj 8ina8a onosoneasina8an kakina Coda8inni Inakonige8inan. Mi eta kinada8enimigo8ag kidji pak8ejogo8eg kidji odji kitci min8adjimidizo8adj, egi kackimigo8eg kidji pak8ejogo8eg kekina8a.

Pilip 2:21

Kakina dac kodagiag a8iagog 8ina8a eta kidji k8ag8e mino todadizo8adj odiji mik8endana8a. Ka8in opabiziskendasina8a adi Jesos Christan ka iji nda8endamindjin kidji todamo8adj.

Kolosi 3:2

Mamidonendamokon kegonan 8ak8ig ka tag8agin, ka8in 8in kegonan ooma akikag.

2 Tesalonika 1:9

Mi oodi ke iji pajacte8agani8i8adj. Kagige kada nici8anadjiagani8i8ag, ega 8ikad kidji gi 8abama8adjin ka Tibendjigendjin, acitc ega 8ikad kidji 8abadamo8adj omacka8izi8ini ka kitci icpendag8anig.

2 Tesalonika 2:12

Midac ke odji ick8aienimagani8i8adj kakina igi8e ega kagi teb8etamo8adj teb8e8ini, tiegodj dac kagi kitci min8endamo8adj e nta patadi8adj.

2 Tesalonika 2:8

Midac ii apitc ke odji nagozidj aa kitci madji a8iag, acitc ka Tibeniminak Jesos oga nisan e motci podanadjin. Oga nici8anadjian okitci icpendagozi8inikag e odji nagozidj.

1 Timote 6:5

Apanigotc aiajidemidi8ag. Madji kegonan mega omamidonendana8an, acitc ka8in aja okikendasina8a Kije Manidon oteb8e8ini. Odinendana8a mega: “Niga kitci coniakemin kicpin anokita8agidj Kije Manido.”

2 Timote 3:4

Kada 8agackizi8ag. Kada nanizanakamigizi8ag. Kada kitci inenimidizo8ag. Oga sagitona8a a8acamej kidji mina8azi8adj, apitc8in kidji sagia8adjin Kije Manidon.

Jak odojibiigan 4:16

Nogom dac kikitci inendizom acitc kikitci min8adjimidizom. Ii dac a8iag iji kitci inenimidizodj, ka8in odji pejig min8acisinon.

2 Pien 2:1

8eckadj ako tebanig niganadjimo8innig ka paba kikinoama8a8apanin Kije Manidon odanicinabemini, ega Kije Manidokag e odji8agobanen, kagina8ickibanig mega. Mi pejig8an, a8iagog ka kagina8icki8adj kiga pi nda kikinoamago8ag. Kiga pi k8ag8e kikinoamago8ag kagina8icki8inan ke kitci madji todagemaganigin. 8a8adj oga ana8enima8an ka Tibendjigendjin kagi ag8acimigo8agobanen. Ii dac ke todamo8adj, kada nda kackitamadizo8ag kitci kaiezigotc kidji nici8anadjiagani8i8adj.

2 Pien 2:13

Kada kodagiagani8i8ag, egi kodagia8adjin kodagian a8iagon. 8a8adj meg8a kijik okitci min8endana8a kidji todamo8adj adi eji madji mosa8endamo8adj. Kina8a dac ka teb8etameg, apitc ako ma8adjiidieg mama8 kidji 8isinieg, pija8ag ke8ina8a, misa8adj e agadendagozi8adj adi enakamigizi8adj. Kitci min8endamog e 8agackibinigo8eg.

2 Pien 2:3

Igi kikinoamage8innig ka kagina8icki8adj okitci mosa8endana8an kodagian a8iagon odaimini. Kitci 8i coniake8ag e kagina8ickimigo8eg kidji 8agackibinigo8eg. Aja 8eckadj Kije Manido ogi onendan kidji pajacte8adjin. Ka8in nibasi Kije Manido, midac aja peconag8ani kidji nici8anadjiadjin.

Jod odojibiigan 1:10

Igi8e dac a8iagog kagi pija8adj kina8akag, omanazodana8an kakinagotc kegonan ega ka nisidotamo8adjin. Ini dac kegonan ka kackito8adj kidji nisidotamo8adjin, ka8in egi mamidonendamo8adj 8edji nisidotamo8adjin. Tiegodj mi maia tabickotc a8esizag ejinagozi8adj, ega odji pejig e kackito8adj kidji mamidonendamo8adj, e motci kikendamo8adj kidji inakamigizi8adj adi eji min8endamo8adj. Onici8anadjiigona8an dac ini kegonan ka inakamigizi8adj.

Jod odojibiigan 1:16

Apanigotc mojag madjendamog igi a8iagog, acitc pijicig kacimo8ag, ega 8ikad kegoni e min8endamo8adj. Kakinagotc kegonan inakamigizi8ag adi eji madji mosa8endamo8adj. Kitci inadjimidizo8ag, acitc okitci min8adjima8an a8iagon kidji gi odji todago8adjin adi e iji nda8endamo8adj.

Jod odojibiigan 1:4

Nandam mega a8iagog ka ana8eta8a8adjin Kije Manidon ki kimodji pija8ag kina8akag. Anodj odinabadjitona8a ii kikinoamage8ini ka iji mikodjigadenig Kikije Manidominan okitci ca8endjige8ini ka odji kasiamago8ak kipatado8ininanan. Ikido8ag aja ega kidji nigodinani8anig misa8adj aianodj inakamigizinani8anig, kakinagotc madji aido8ini e pamendjigadenig. Odana8enima8an Jesos Christan, ka motci pejigondjin Kidogimaminani acitc 8in eta ka Tibeniminak. Aja 8eckadj ki ojibiigadenigoban Kije Manido Omazinaiganikag kidji tibakonagani8i8adj.

Kagi iji 8abadaagani8idj John 18:7

Kitci apitenimidizobanig igi a8iagog, acitc 8anadizi8inikag iji pimadizibanig. Inigik iidi ka iji pimadizi8adj, mi nogom inigik ke apitci animendjige8adj kidji kodagito8adj. Mi maia ik8e ejinagozi8adj igi a8iagog, ka kitci min8adjimidizodj e ikidodj: Mi maia tabickotc ogimak8e enabian ooma. Ka8in ka pejigodj ik8e nidijinagozisi, acitc ka8in 8ikad niga kikendasin adi enendag8ag e pejigonani8ag egi 8aniagani8idj a8iag.

Kagi iji 8abadaagani8idj John 19:20

Midac ki na8adjibinagani8i aa madji a8esiz. Ki na8adjibinagani8i acitc aa8e “niniganadjimo8inni8inan” ka in8ekazopanin. Mi aa8e kagi mamada8izidj nigan madji a8esizikag. Ogi 8agackibinan dac iidi a8iagon kidji odisigondjin madji a8esizan okikina8adjibiigani acitc kidji icpenimandjin madji a8esizan omanidokanimini. Apitc dac ka na8adjibinagani8i8adj midjinijin, ki madjocte8ebinagani8i8ag kiabadj e pimadizi8adj. Mi maia sagaigan ejinag8ag ii ickode, ka kitci oza8abateg ka kitci kotazomateg.

Kagi iji 8abadaagani8idj John 21:8

Igi8e dac ka cagodee8adj kidji 8idamage8adj e teb8eta8a8adjin Jesosan, acitc igi8e ega ka teb8etamo8adj, acitc igi8e ka nta madjakamigizi8adj, acitc igi8e ka nici8e8adj, acitc igi8e madji aido8ini ka pamendamo8adj, acitc igi8e ka mandoke8adj, acitc igi8e ka icpenima8adjin manidokanan, acitc kakina ka kagina8icki8adj, 8ina8a kakina kada madjocte8ebinagani8i8ag. Mi maia sagaigan ejinag8ag ii ickode, ka kitci oza8abateg ka kitci kotazomateg. Mi iima ke iji nibo8adj a8iagog mina8adj, nijinanaj e nibo8adj.”

Kagi iji 8abadaagani8idj John 22:15

A8iagog dac ka aiagadakamigizi8adj, acitc igi8e ka mandoke8adj, acitc igi8e madji aido8ini ka pamendamo8adj, acitc igi8e ka nici8e8adj, acitc igi8e ka icpenima8adjin manidokanan, acitc igi8e mojag ka 8i kagina8icki8adj, 8ina8a kakina ag8adjik odenag kada iji tajike8ag.”