Pilip 1:17 - Kije Manido Odikido8in: Ocki Mazinaigan

¹⁷ Igi8e dac kodagiag kagik8e8ag e mikoma8adjin Jesos Christan eta kidji gi odji niganendagozi8adj. Ka8in odei8akag odjimagasini odikido8ini8a. Ii ka todamo8adj, odinendana8a na8adj kiabadj kidji odji kodagito8ag ooma kibaodimigi8amikag.

Pilip 1:17 Iomraidhean Croise

Min8adjimo8ini kagi ojibiag kitcit8a Lok 21:14

Mamidonendamok dac ega kidji segizieg adi ke ikido8eg kidji nak8itamadizo8eg.

Jesos Odanodaganan Odijitcige8ini8an 22:1

Pon ki ikido: “Nidjiki8eg acitc kina8a kitci anicinabeg! Ndotaocik eji nak8ian ka iji inactaonigo8an!”

Jesos Odanodaganan Odijitcige8ini8an 26:1

Kitci ogima Akanipa ogi inan Ponan: “Kin dac, aja kiga anim8e kidji nak8itamadizo8an.” Pon dac ki tesindjini acitc ki madji anim8e.

Jesos Odanodaganan Odijitcige8ini8an 26:24

Meg8adj Pon e taji kitci nak8itamadizodj, kitci ogima Pestas ki kiji8e: “Pon, kiki8ack8enadok! Kigi ki8ack8eigon kitci kin8ej egi kikinoamagozian!”

Ojibiama8agani8i8ag ka teb8etamo8adj Rom odenakag 2:8

Kodagiag dac a8iagog ka8in o8i ndota8asi8a8an Kije Manidon, acitc ka8in o8i nosoneasina8a teb8e8ini, acitc motci madji inakamigizi8ag. 8ina8a dac, Kije Manidon oga sogi pajacteogo8an.

Pilip 1:18

Misa oo enendaman. Kicpin madjidee8adj kek8an minodee8adj, ka8in ii nigod. Misa8adj mega tibadjimo8ag Jesos Christan odikido8ini. Mi oo8e 8edji modjigendaman. Teb8e kiabadj niga kitci modjigendan,

Pilip 1:7

Min8acin e iji mik8eniminagok, kikitci sagiinom mega. Ma8asag kigi odisigonan Kije Manido okitci ca8endjige8in, kidji gi odji 8idjiijieg nogom meg8adj kibaodimigi8amikag e teian, acitc dac odakanag ab8amaci kibaogo8an, meg8adj ka nak8ita8ag8aban ako igi8e ka madji mikodamo8apan min8adjimo8ini, e kitci sogi 8abadai8eiaban e teb8emaganig ii min8adjimo8ini.

Pilip 2:3

Ka8in kegon inakamigizikegon kina8a eta tibina8e kidji mik8enimidizo8eg acitc kidji kitenimo8eg. Tiegodj, inenimikog kodagiag a8iagog na8adj e apitendagozi8adj apitc8in kina8a, e tabasendizo8eg.

1 Timote 2:7

Nin dac, nigi onabamig kidji tibadjimo8an omin8adjimo8in acitc Jesos Odanodaganan kidji inagimigo8an. Teb8e nidikidonan, ka8in nikagina8ickisi. Nigi onabamig kidji kikinoama8ag8a ega ka Coda8inni8i8adj, kidji gi teb8etamo8adj acitc kidji gi kikendamo8adj teb8e8ini.

2 Timote 2:9

E tibadjimo8an dac ii min8adjimo8in, nikodagito acitc nikibaogo tabickotc a8iag ka kitci panaagedj. Ka8in dac 8in Kije Manido omin8adjimo8in kibaigadesini,

2 Timote 4:16

Ka8in odji pejig a8iag nidodji 8idjiigosi nitam ka k8ag8e nak8itamadizo8an nigan tibakonige8innikag. Kakina nigi naganigog. Ka8in dac ninada8enimasi Kije Manido kidji kegon inenimadjin ii odji.