Matio 5:29 - Kije Manido Odikido8in: Ocki Mazinaigan

²⁹ Kicpin kickijig kikitcinikikag inekena pataigo8an, manibidon, midac 8asag inatig8en. Na8adj kiga minose kidji 8anito8an pejig kickijig apitc8in kidji madjocteigadeg kakina kia8 kitci ickodekag.

Matio 5:29 Iomraidhean Croise

Matio 10:28

Ka8in kosakegonig a8iagog ka kackito8adj kidji nisigo8eg. Okackitona8a kidji nici8anadjito8adj 8ia8ini, ka8in dac 8in okackitosina8a kidji nici8anadjia8adjin a8ian odjitcagocini. Tiegodj, kosik Kije Manido, 8in ka kackitodj kitci ickodekag kidji nici8anadjitodj 8ia8ini acitc dac kidji nici8anadjiadjin a8ian odjitcagocini.

Matio 11:6

Ca8endagozi aa a8iag ega ke ana8enimijidj.”

Matio 16:26

Adi dac inasag a8iag kakina kegonan ka kitci min8acinigin tibendagibanin ooma akikag, kicpin 8anitodj opimadizi8in? Tag8anidok na kegoni kegi meckodonag kidji gi koki aiag opimadizi8in?

Matio 17:27

Pekic dac, kasa 8in ki8i kiji8aasi8ananag igi8e ka ma8adjia8adjin conian. A8i ijan sa dac tcigagam sagaiganikag acitc nimina8eatig8en kik8ack8enabanabi nibikag. Ag8azidabin aa nitam kigoz ke k8ack8ebina8ad8en acitc ta8anobij. Kiga mika8a dac iima conia kidji gi tibisean kidji gi kijikaman nin inigik mezinaigeian kitci aiamiemigi8amikag, acitc kidji gi kijikadamadizo8an kekin. Odapin dac aa, acitc kijikazon inigik enendagoziak kidji kijikazo8ak.”

Matio 19:12

Ka8in niba8isi8ag nandam nabeg, ka8in mega okackitosina8a, mi gotc ii e to8adj ka ako nta8igi8adj. Ka8in nandam nabeg okackitosina8a kidji niba8i8adj, osa mega ki madij8agani8i8ag onini8akag. Ka8in niba8isi8ag nandam a8iagog, na8adj 8e8enda kidji gi anokita8a8adjin Kije Manidon. Aa dac a8iag ka kackitodj kidji nisidotag ii kikinoamage8ini, oda ndotan.”

Matio 23:15

“Kiga kitci madji iji8ebizim, kina8a Coda8innig ka kikinoamageieg acitc kina8a ka nagadjito8egon inakonige8inan! Kikitci kimodizim! Kikitci paba ijam kitcigamig acitc mizi8ekamig, kidji gi kackimeg eta pejig a8iag kidji nosoneagin Coda8inni Inakonige8inan. Apitc dac ki iji kackimeg, mi eta nijinanaj a8acamej kackitamadizo kidji iji8ebinagani8idj kitci ickodekag apitc8in kina8a.”

Matio 23:33

“Kina8a madji a8iagog, tabickotc ka pitcibo8inezi8adj kinebigog ka ijinagozieg! Adi enendameg ke todameg kidji gi ojimo8eg kidji ick8aienimigo8eg kidji madjocte8ebinigo8eg kitci ickodekag?

Matio 5:22

Nin dac 8in ki8idamonom oo8e. A8enenigotc ke kiji8azig8en o8idjiki8en odji kada tibakonagani8i. Aa8e ka inadjin o8idjiki8en: ‘Kikikimadizinan!’ kada iji8inagani8i nigan Coda8inni kitci aiamie onakonige8innikag. Aa dac ka inadjin: ‘Ka8in odji pejig kidabadizisi!’ kackitamadizo kitci ickodekag kidji madjocte8ebinagani8idj.

Matio 5:30

Kicpin kikitcinidji pataigo8an, kickijan, midac 8asag inatig8en. Na8adj kiga minose kidji 8anito8an pejig kinidji apitc8in kidji madjocteigadeg kakina kia8 kitci ickodekag.”

Min8adjimo8ini kagi ojibiag kitcit8a Mak 8:36

Adi dac inasag a8iag kakina kegonan ka kitci min8acinigin tibendagibanin ooma akikag, kicpin 8anitodj opimadizi8in?

Min8adjimo8ini kagi ojibiag kitcit8a Lok 12:5

Kiga 8idamonom dac a8enen enendagozieg kidji koseg! Kida kosa8a Kije Manido, 8in ka kackitodj kidji nisadjin a8ian, acitc dac ka aiag macka8izi8ini kitci ickodekag kidji iji8ebinadjin. Teb8e ki8idamonom, mi aa8e enendagozieg kidji koseg!”

Ojibiama8agani8i8ag ka teb8etamo8adj Rom odenakag 6:6

Ab8amaci ka madji teb8etamak, kigi kitci madjakamigizimin. Kikikendananan dac apitc Jesos ka nibodj tcibaiatigokag, mi maia tabickotc kagi acidak8aigadegobanen 8eckadj kimadji inadizi8inan ejinag8ag, kidji gi 8anadjitcigadeg ii kimadji inadizi8inan, ega dac 8ikad mina8adj patado8in kidji gi tibenimigo8ak.

Ojibiama8agani8i8ag ka teb8etamo8adj Rom odenakag 8:13

Kicpin inadizieg adi eji min8endameg, kiga nibom. Anic dac kicpin pagidineg Mino Manido kidji 8idjiigo8eg, kidji gi poni ijitcigeieg kakina ka iji madji inakamigizieg kia8i8akag, kagige kiga pimadizim.

1 Konit 9:27

Nikitci sogi mikidan dac nia8, 8e8enda kidji gi tibendaman. Kicpin mega ega iidi inakamigizian, ka8in niga pagidinigosi kidji pimibato8an. Ka8in dac niga kackitosin kidji odisigo8an nikackitason, misa8adj egi nd8e8emag8a kodagiag a8iagog ke8ina8a kidji nda k8ag8edjikandi8adj.

Kalecia 5:24

Igi8e a8iagog Jesos Christikag ka iji tibendagozi8adj, aja ogi onendana8a ega kidji todamo8adj adi ka iji madji mosa8endamo8adj. Mi maia pejig8an tcibaiatigokag ki acidak8aamo8apanin omadji mosa8endamo8ini8an acitc omadji inakamigizi8ini8an ejinagozi8adj.

Kolosi 3:5

Ka8in dac 8ikad mina8adj inakamigizikegon ka iji kitci mosa8endameg kidji madji todameg ooma 8akidakamig, madji aido8in kidji pamendameg, kidji madjakamigizieg, kidji tibenimigo8egon madji mosa8endamo8inan, kidji agazinagozieg adi enakamigizieg, acitc kidji ozami mosa8endamegon kegonan kidji tibendamegon. Igi8e mega ka ozami mosa8endamo8adjin kegonan kidji tibendamo8adjin, na8adj osagitona8an kegonan apitc8in eji sagia8adjin Kije Manidon.