Kolosi 1:9 - Kije Manido Odikido8in: Ocki Mazinaigan

⁹ Midac 8edji apanigotc aiamietamago8eg, ka ako nodageiag e mikomigo8eg. Nipagosenimanan Kije Manido kidji minigo8eg kakina kagita8endamo8ini acitc nisidotamo8ini Omino Manidoman ka migi8endjin, 8e8enda kidji gi kikendameg adi eji nda8enimigo8eg kidji todameg.

Kolosi 1:9 Iomraidhean Croise

John 7:17

A8enenigotc ka 8i ijitadj adi Kije Manidon ka iji nda8endamindjin, oga kikendan kicpin Kije Manidokag odjimaganig nikikinoamage8ini kek8an ninikag eta odjimaganig.

Jesos Odanodaganan Odijitcige8ini8an 12:5

Pien dac ki kana8enimagani8i kibaodimigi8amikag. Ka teb8etamo8adj dac ogi kitci aiamita8a8an Kije Manidon Pienan odji.

Ojibiama8agani8i8ag ka teb8etamo8adj Rom odenakag 12:2

Ka8in kagikina8abamakegonig igi8e ega ka teb8eta8a8adjin. Tiegodj, pagidinik Kije Manido kidji adjitodj adi enendameg, kidji adjitodj dac adi enadizieg. Midac kiga kikendana8a adi eji nda8endag acitc mi iidi ke todameg. Min8acini dac adi eji nda8endag, acitc mizi8e k8aiak8endag8ani, acitc dac okitci min8endan apitc a8ian iidi e todamindjin.

1 Konit 1:5

Kina8a ka iji mama8iseieg Jesosikag, Kije Manido kitci mane kigi minigo8a mino kegonan. Kigi minigo8a 8e8enda kidji kikendameg Kije Manido omin8adjimo8in, acitc 8e8enda kidji mikodameg.

Epes 1:8

kitci mane e ca8enimigo8ak kidji kitci kagita8endamak acitc kidji cabo kikendamak adi eji nda8endag.

Epes 5:10

Kitci nak8iok kidji kikendameg adi eji min8endag ka Tibendjigedj.

Epes 5:17

Midac ka8in ki8ack8eadizikegon. Tiegodj k8ag8e nisidotamok adi ka Tibendjigedj eji nda8endag kidji inadizieg.

Epes 6:6

Ka8in eta e 8abamigo8eg kikackami8ag 8e8enda mikimokegon, kidji gi odji min8endamieg8a. Tiegodj, enigokodeeieg ijitaok ka iji nda8endag Kije Manido, e kikendameg Jesos Christ e anokita8eg.

Pilip 1:4

Tasinigotc e aiamietamonagok, apanigotc nikitci min8endan,

Kolosi 1:6

Kakina mizi8ekamig mikodjigade ii min8adjimo8in, acitc mi maia tabickotc minatig ka madjigidj acitc ka mini8idj ejinag8ag. Mi iidi ejinag8ag min8adjimo8in kina8akag, ka ako mikodamago8eg nitam ii min8adjimo8in acitc ka ani nisidotameg Kije Manido okitci ca8endjige8in adi maia ejinag8anig.

Kolosi 3:16

Pagidinamok ii min8adjimo8in ka odji kikenimagani8idj Jesos Christ mizi8e kidji kigickago8eg. Abadjitaok kakina kagita8endamo8in ka aiameg kidji kikinoamadieg kakina pepejig e tacieg acitc kidji 8idama8idieg adi enendagozieg kidji inakamigizieg. Nigamok 8eckadj kitci nigamo8inan Kije Manido Omazinaiganikag ka odjimagagin, acitc ocki aiamie nigamo8inan, acitc nigamo8inan ka minigo8eg Mino Manido, mig8etc e ineg Kije Manido enigokodeeieg.

Kolosi 4:12

Epapanas (Épaphras) ke8in kidanamikago8a, 8in ka anokita8adjin Jesos Christan acitc kina8akag ka odjidj. Apanigotc kitci nak8i e aiamietamago8eg, e pagosenimadjin Kije Manidon kidji sogigaba8ieg, ega kegon kidji nodeseieg kiteb8etamo8ini8akag, acitc enigokodeeieg kidji teb8eta8eg Jesos, pijicig kidji todameg adi eji min8endag Kije Manido.

Kolosi 4:5

Kagita8endamok adi enakamigizieg apitc 8idji8eg8a igi8e ega ka teb8eta8a8adjin Jesosan, e k8ag8e 8idoka8eg8a kidji kikenima8adjin Jesosan apitcigotc iji kackito8eg.

1 Tesalonika 1:3

Apitc ako aiamita8agidj Kije Manido Kidadaminan, kimik8enimigom, adi epitci mino ijitcigeieg osa e teb8etameg, acitc adi epitci kitci macka8i mikimo8eg osa e sagii8eieg, acitc adi epitci sogigaba8ieg kiteb8etamo8ini8akag e apacenimo8ageieg Jesos Christ ka Tibeniminak.

1 Tesalonika 5:17

Ka8in 8ikad poni aiamiekegon.

2 Tesalonika 1:11

Midac 8edji apanigotc aiamietamago8eg. Nipagosenimanan dac Kikije Manidominan kidji 8idjiigo8eg kidji mino inadizieg adi kagi iji nd8e8emigo8eg kidji iji pimadizieg. Nipagosenimanan kidji abadjitodj omacka8izi8in kidji 8idjiigo8eg kidji todamegon kakina ini mino kegonan ka 8i ijitcigeieg, acitc kidji kijito8eg ii mikimo8in e teb8eta8eg Kije Manido ka odji ijitaieg.

Pilemo 1:4

Tasin ako aiamieian, kimik8enimin acitc mig8etc nidina Kije Manido kin odji.

Pilemo 1:6

Nidaiamie eckam eckam kidji mama8ino8ak kina8it ka iji teb8etamak, midac na8adj ke odji ani kikendamakonin kakina mino kegonan ka minigo8ak Jesos Christ.

Ebaro 10:36

Panima dac ki sogigaba8ieg, kidji gi todameg adi eji nda8endag Kije Manido, acitc kidji gi odisigo8eg kagi ikidodj kidji minigo8eg.

Ebaro 13:21

Nidaiamita8a dac Kije Manido kidji minigo8eg macka8izi8ini, kidji gi mino ijitcigeieg kakinagotc ejinag8ag mino ijitcige8in, kidji gi inadizieg adi eji nda8enimigo8eg. Nidaiamita8a acitc kidji 8idjiigo8ak kidji ijitcigeiak adi eji min8endag, e kigicka8aiak Jesos Christ. Apanigotc mojag icpendagozi Jesos Christ! Amen!

Jak odojibiigan 1:5

Kicpin dac pejig e tacieg ega tibise kagita8endag, oda pagoseniman Kije Manidon, oga minigon dac kidji kagita8endag. Kije Manido mega kitci kije8adizi acitc okitci min8endan kidji ca8enimadjin kakinagotc a8iagon.

Jak odojibiigan 3:17

Kagita8endamo8in dac Kije Manidokag ka odjimagag kitci pakan ijinag8an. A8iag ka aiag Kije Manidon okagita8endamo8ini kitci paiekidee, o8idoka8an kodagian kidji mino 8idji8idindjin pekadendamo8inikag, nokadizi, onadota8an adi ekidondjin kodagian a8iagon, okitci kidimageniman o8idjipimadiziman, kabe mino ijitcige, ka8in opepakanenimasin a8iagon, acitc ka8in kimodizisi.

1 Pien 2:15

Kije Manido mega onada8endan k8aiak kidji todameg, midac kidji poni madji mikomigo8eg a8iagog ega ka kikenima8adjin Kije Manidon, ega ka kikendamo8adj adi ekido8adj.

1 Pien 4:2

Midac nogom meg8adj e pimadizieg ooma akig, mi panima eji min8endag Kije Manido kiga todana8a. Ka8in dac kiabadj ii todakegon ka iji mosa8endamo8adj igi8e ega ka teb8etamo8adj.

1 John 2:17

Kada ponise aki, acitc kada ponise8an kakina kegonan ka mosa8endamo8adjin a8iagog ooma akikag. Anic dac aa a8iag ka inakamigizidj Kije Manidon ka iji nda8endamindjin, mi aa kagige ke pimadizidj.

1 John 5:20

Kikikendananan Kije Manido Og8izisan egi pijandjin ooma akikag. Kigi minigonan kidji nisidotamak, kidji gi odji kikenimaiak Kije Manido, 8in e teb8edj. Kitibenimigonan dac Kije Manido e teb8edj, e mino 8idji8aiak Og8izisan Jesos Christan. Mi sa 8aa ka Kije Manido8idj e teb8edj, e minigo8ak kagige pimadizi8ini.