Kolosi 1:14 - Kije Manido Odikido8in: Ocki Mazinaigan

¹⁴ Mi ini Og8izisan ka odji ag8acimigo8ak, acitc ka odji kasiamago8ak kipatado8ininanan.

Kolosi 1:14 Iomraidhean Croise

Matio 20:28

Midac pejig8an, kenin, Ka pi Anicinabe8iidizodj, ka8in nidodji pijasi kidji anokitago8an. Nigi pija dac kidji anokitageian, acitc kidji migi8eian nipimadizi8in kidji gi odji ag8acimag8a mane a8iagog.”

Min8adjimo8ini kagi ojibiag kitcit8a Lok 5:20

Apitc Jesos 8eabamadjin ini a8iagon kagi pidji8inandjin ini naben adi epitci sogi teb8etamindjin, ogi inan ini8e ega ka mazikandjin: “Ni8idji8agan! Aja ki kasiigade8an kipatado8inan.”

Jesos Odanodaganan Odijitcige8ini8an 10:43

Kakina niganadjimo8innin ogi paba mikomigon, e ikidondjin: ‘A8enenigotc ke teb8eta8adjin, kada kasiigadeni8an opatado8ini8an, epitci macka8izimaganig o8izoni.’ ” Mi ka iji tibadjimodj Pien.

Jesos Odanodaganan Odijitcige8ini8an 2:38

Pien dac ogi nak8e8ajian: “An8endizok, acitc panima kakina pepejig e tacieg ki sigaadazo8eg Jesos Christ o8izon kidji abadjito8eg, kipatado8ini8an kidji gi kasiamago8eg. Kiga odisigo8a dac Mino Manido, Kije Manido oca8endjige8in.

Jesos Odanodaganan Odijitcige8ini8an 20:28

Iag8amenimidizok dac, acitc nagadjiikog kakina igi8e ka teb8etamo8adj, Mino Manido kagi anonigo8eg kidji nagadjieg8a. 8e8enda kana8enimikog igi8e ka teb8eta8a8adjin Kije Manidon, tabickotc a8iag ka kana8enimadjin omantceniciman. 8in mega Kije Manido otibeniman, Og8izisan egi odji pagidenimidizondjin kidji nibondjin.

Jesos Odanodaganan Odijitcige8ini8an 26:18

Kidijinijaon kidji 8idjiad8a kidji 8abi8adj, acitc kidji gi nagadamo8adj ka iji tibikanig acitc kidji pimadizi8adj ka iji 8aseanig. Kidijinijaon kidji 8idjiad8a kidji poni tibenimigo8adjin madji manidon, meckodj dac kidji tibenimigo8adjin Kije Manidon. Ki teb8etaoji8adj dac, opatado8ini8an kada kasiigadeni8an, acitc kada iji acidagimagani8i8ag taji ka iji tendjin ini8e kagi onabamigo8adjin Kije Manidon.’ Mi ka ijidj Jesos.”

1 Konit 1:30

8in Kije Manido ka todago8eg kidji mama8iseieg Jesos Christikag. Ogi pidjinija8an Jesosan, kidji gi 8abadaigo8ak adi epitci kagita8endag. Jesos kagi pi todag 8edji ki k8aiak8abaminak Kije Manido, acitc 8inikag 8edji ki iji tibendagoziak, acitc mi 8edji ki ag8acimigo8ak.

Kalecia 3:13

Kije Manido dac kigi ick8aienimigonan, ka8in mega kakina kidodji nosoneam8asi8ananan Coda8inni Inakonige8inan. Jesos Christ dac kigi pi nabickagonan, 8in dac meckodj kidji ick8aienimagani8idj. Mi mega oo8e mezinadenig Kije Manido Omazinaiganikag: “Aja ki ick8aienimagani8i aa8e kagi agonagani8idj mitigokag.” Deutéronome 21.23 Kigi ag8acimigonan dac, iidi egi todag.

Epes 1:7

Kije Manido kigi ag8acimigonan egi pagidenimidizondjin Og8izisan kidji nibondjin kina8it odji. Kigi kasiamagonan kipatado8ininanan. Midac iidi ka iji 8abadaigo8ak adi epitci kitci kije8adizidj,

Epes 4:32

Tiegodj, mino todadiok kakina pepejig ka tacieg acitc kidimagenimidiok. Kije Manido kigi kasiamago8a kipatado8ini8a osa megada Jesos Christikag kidiji tibendagozim. Midac kekina8a iji ponenimidiok kakina pepejig e tacieg.

Epes 5:2

Adigotc e ijitaieg, kabe sagiik kidjipimadizimi8a, tabickotc Jesos Christ kagi iji sagiigo8ak acitc egi nibodj kina8it odji. Ki migi8e opimadizi8in, tabickotc 8eckadj ako a8esiz ka pagidinigetama8agani8ipan Kije Manido. Jesos dac ogi kitci min8endamian Kije Manidon.

Kolosi 2:13

8eckadj, mi maia pejig8an kagi nibo8egoban ejinagoziegoban ako, osa mega kinita patadina8aban acitc ka8in Kije Manidokag kidiji tibendagozisina8aban, ega maci egi manibidjigadegibanin kimadji mosa8endamo8ini8an. Nogom dac Kije Manido kigi koki pimadiziigo8a tabickotc kagi iji koki pimadiziadjin Jesos Christan. Kije Manido dac kigi kasiamagonan kakina kipatado8ininanan.

Kolosi 3:13

Ka8in nickiidikegon pepejig e tacieg, tiegodj ponenimidiok adi kagi iji madji todadieg, tasinigotc enendameg egi madji todago8eg. Ka Tibendjigedj kigi kasiamago8a kagi iji patadieg, ponenimidiok dac kekina8a kakina pepejig e tacieg adi kagi iji madji todadieg.

1 Timote 2:6

Ki pagidenimidizo kakina a8ian kidji gi ag8acimadjin. Mi oo 8edji kikendjigadeg Kije Manido e nda8enimadjin kakina a8ian kidji ag8acimagani8indjin. Ki ani kikendjigade dac maia apitc Kije Manido ka iji nda8endagiban.

Tite 2:14

Ki pagidenimidizo kina8it odji, ega mina8adj kidji tibenimigo8akonin kipatado8ininanan, acitc kidji gi paiekideeiak, odanicinabeman kidji apitendagoziak, e 8i mino ijitcigeiak.

Ebaro 9:12

Jesos Christ ki pidige maia taji eji tendjin Kije Manidon, mi maia tabickotc aiamie ogima ma8adji ka niganizidj ka pidigedj ma8adji ka iji kitcit8a8anig kitcit8a nibaganikag. Jesos dac 8in tibina8e omisk8i ogi pagidinan, ka8in minago mantcenican omisk8ini kek8an nabe mictozocan omisk8ini ododji abadjitosin kidji pagidinigedj. Abidinaj eta iidi ogi todan, acitc kagige kigi odji ag8acimigonan.

Ebaro 9:22

Aiamie Inakonige8inan ikidomaganobanin kidji sis8ebiginadjigadegin kegat kakina kegonan, misk8i e abadjitcigadeg, kidji ani paiekendag8agin. Kicpin ega abadag misk8i, e nag8ag iidi kegon egi nibomagag, ka8in kasiamagesi Kije Manido patado8inan.

1 Pien 3:18

Mi mega Jesos ke8in ka iji8ebizidj. Jesos Christ ki nibo abidinaj eta, a8iagog opatado8ini8an kidji gi kasiigadenigin. 8in ega 8ikad ka patadidj, ki nibo kina8it odji ka patadiak, Kije Manido kidji gi mino 8idji8aiak. Teb8e ki nisagani8iban, Mino Manidon dac ogi koki pimadiziigon.

1 John 1:9

Anic dac kicpin 8idama8aiak Kije Manido egi patadiak, kiga kasiamagonan ka iji patadiak acitc kiga paiekideeigonan. 8in mega teb8eiendagozi acitc kabe k8aiak inakamigizi.

1 John 2:12

Nidabinodjijimag ka kitci ineniminagok! Kidojibiamonom kidji mik8endamiinagok Kije Manido aja egi kasiamago8eg kipatado8ini8a, egi nibodj Jesos kina8a odji.

1 John 2:2

Jesos mega kagi pagidenimidizodj kidji nibodj tcibaiatigokag, kidji odji kasiigadenigin kipatado8ininanan. Ka8in dac kina8it eta ka odji kasiamago8ak Kije Manido adi ka iji patadiak, kakina sa a8iagon ooma akig odji kasiama8agani8i8an adi ka iji patadindjin.

Kagi iji 8abadaagani8idj John 1:5

Nipagosenima acitc Jesos Christ kidji ca8enimigo8eg acitc kidji minigo8eg pekadendamo8ini, 8in kabe ka teb8edj e mikomadjin Kije Manidon. 8intam kagi abidjibadj. 8in okackakanan kakina ogiman ka tacindjin 8akidakamig. Kisagiigonan sa, acitc ki pagidenimidizo kidji nibodj kina8it odji, ega 8ikad mina8adj kidji tibenimigo8akonin kipatado8ininanan.

Kagi iji 8abadaagani8idj John 14:4

Mi ogo8eni8ag ka paiekizi8adj, kabe ka kana8enimidizo8adj ega kidji 8idji8a8adjin ik8e8an. Onosone8a8an Mantcenicesan atajigotc ejandjin. Mi igi8e Kije Manido kagi kijikadamota8adjin, omisk8ini e abadjitodj. Mi igi nitam kagi pagidenimidizo8adj kidji iji tibendagozi8adj Kije Manidokag acitc Mantcenicesikag.

Kagi iji 8abadaagani8idj John 5:9

Nigamobanig ocki nigamo8ini: “Kidapitendagozinan kidji odapinaman oo ka tidibanakosig mazinaigan acitc kidji manibido8anin ini pazag8aiganan. Kigi nisigonaban mega, acitc kimisk8i kigi abadjiton e kijikadamoto8an, Kije Manido kidji gi koki tibenimadjin a8iagon, kakinagotc adi enakanezindjin, adi ejigij8endjin, acitc adi 8edjindjin.