Kalecia 1:7 - Kije Manido Odikido8in: Ocki Mazinaigan

⁷ Anic dac pejig eta tag8ani Kije Manido omin8adjimo8in, teb8e ka8in kodag tag8asinon. Nandam dac a8iagog ok8ag8e adjitona8a min8adjimo8ini, kagi odji kikenimagani8indjin Jesos Christan. Kinada8enimigo8ag dac kidji adjito8eg adi eji teb8etameg.

Kalecia 1:7 Iomraidhean Croise

Matio 24:24

Nandam mega a8iagog kada pija8ag e kagina8icki8adj e ikido8adj: ‘Nin aa8e Kije Manidon kagi ikidonipanin kidji pidjinijaogodjin’ kek8an: ‘Nin niniganadjimo8inni8inan.’ Kada kitci mamada8izi8ag acitc kada mamada8akamigizi8ag, kidji k8ag8e 8agackibina8adjin 8a8adj ini8e a8iagon Kije Manidon kagi onabamigondjin.

Jesos Odanodaganan Odijitcige8ini8an 13:10

“Kin ka iji tibendagozian kitci madji manidokag kidadam, ka madjendaman kakina k8aiak8adizi8in! Kabe kikagina8ickimag a8iagog acitc ki8aiejimag. Teb8e8ini ka ikidodj ka Tibendjigedj, kin dac pijicig kidikidonan ega k8aiak ii.

Jesos Odanodaganan Odijitcige8ini8an 15:24

Nigi nodagemin nandam a8iagog nina8itinakag ka odji8adj egi pi nda 8abamigo8eg, acitc egi nda kikinoamago8eg kegonan kagi anodj inendamiigo8eg acitc kagi migockadendamiigo8eg. Ka8in nidodji anonasi8ananag ii kidji todamo8adj.

Jesos Odanodaganan Odijitcige8ini8an 20:30

8a8adj acitc nandam e tacieg kada kagina8icki8ag, kidji k8ag8e 8aiejima8adjin ka teb8etamindjin. Oga madjina8an dac nandam ka teb8etamindjin.

2 Konit 11:13

Ka8in igi teb8e Jesos Odanodaganan. Kagina8icki8ag e mikodamo8adj omikimo8ini8a. Jesos Christ Odanodaganan in8ekazo8ag.

2 Konit 2:17

Mane a8iagog kagik8e8ag kidji motci odji kackia8adjin conian, tabickotc ada8e8innig ka pabamada8e8adj Kije Manidon odikido8ini ijinagozi8ag. Ka8in iidi nidijinagozisimin! Tiegodj, nikikendananan Kije Manido egi pidjinijaogo8ag. E kana8abamigo8ag dac, niteb8eiendagozimin e anim8eiag, e minodeeiag, e anokita8agidj Jesos Christ.

2 Konit 4:2

Ka8in dac kegon nidiji kimodakamigizisimin, acitc ka8in nidagadakamigizisimin. Ka8in a8iag ni8agackibinasi8anan, acitc ka8in kegon nidadjibidosinanan apitc tibadjimo8ag Kije Manido odikido8in. Tiegodj, 8e8enda ni8idamagemin 8egonen ii teb8e8in, kidji gi kikenimigo8ag e teb8eiendagoziag. Kije Manido nikikenimigonan e teb8eiag.

Kalecia 1:6

Kikitci mamakadeniminom adi ejitcigeieg! Kitci 8ibadj kigi pakanendana8a, e 8ebineg Kije Manido kagi nd8e8emigo8eg e abadjiadjin Jesos Christan kidji kitci ca8enimigo8eg. Nogom dac kodag tibadjimo8in kinadotana8a, nandam a8iagog ka ikido8adj Kije Manidon omin8adjimo8ini ii.

Kalecia 2:4

Anic dac nandam a8iagog anodj ka iji teb8etamo8agobanen onada8enima8abanin Titan kidji pak8ej8agani8indjin. Ke8ina8a ako pijabanig apitc e ma8adjiidiagiban kidji aiamieiag, e 8i nagadjiigo8ag adi enakamigiziagiban. Ka8in dac nidodji kikenimasi8ananag anodj eji teb8etamo8agobanen. Kina8it Jesos Christikag ka iji mama8iseiak, kikikendananan aja ega mamakadj kidji nosoneamakonin kakina Coda8inni Inakonige8inan. Igi8e dac a8iagog onada8endana8a mina8adj kidji koki tibenimigo8akonin ini Inakonige8inan.

Kalecia 4:17

Igi8e a8iagog pakan ka iji kikinoamage8adj kikitci pabiziskenimigo8ag, anic dac omadji inendana8a. 8a iji nda8endamo8adj, ki8ik8adjiigo8ag kidji ega pabiziskenimijieg, 8ina8a eta kidji gi motci pabiziskenimeg8a.

Kalecia 5:10

Misa8adj dac, ka Tibendjigedj niminig kidji ketcinameniminagok tabickotc nin kidji odji inendameg. Aa8e dac ka migockadendamiigo8eg, oga pajacteogon Kije Manidon, misa8adj kitci apitendagozi inenimagani8idj.

Kalecia 5:12

Igi8e ka migockadendamiigo8eg, manodj kada ozamij8agani8i8ag apitc pak8ej8agani8i8adj!

Kalecia 6:17

Ka8in aja nogom ninada8enimasi a8iag a8acamej kidji kodagiijidj. Aja mega nidozami kodagito, acitc ka iji nanamezian 8abadai8emagan Jesosikag e iji tibendagozian.

2 Timote 2:18

Ogi 8ebinana8a Kije Manidon oteb8e8ini. Kikinoamage8ag e ikido8adj ka teb8etamindjin ka nibondjin aja e ick8a abidjibandjin. O8aiejima8an dac mane a8iagon oteb8etamo8inikag.

1 John 2:26

Kidojibiamonom ono8e kegonan ega kidji teb8eta8eg8a igi8e anodj ka kagik8e8adj, ka k8ag8e pakebinigo8eg.

1 John 4:1

Ni8idji8aganag ka kitci sagiinagok! Kitci mane ka kagina8icki8adj a8iagog te8ag ooma akikag e ikido8adj e tibadjimo8adj Kije Manidon odikido8ini. Misa dac ka8in teci8ag teb8eta8akegonig a8iagog ka ikido8adj “Kije Manidokag odjimagan oo ka ikido8an.” Panima nitam kida nda kikenima8ag, kicpin teb8e Mino Manidon epitci kigickago8ag8en.

2 John 1:10

Kicpin dac a8iag odji pijadj kina8akag kidji pi nda kikinoamago8eg pakan kegoni, ka8in pidigeakegon. Ka8in 8a8adj kiga inasi8a8a: “Mig8etc egi pijaian.”

2 John 1:7

Kitci mane8ag a8iagog ka 8agackibini8e8adj e paba kikinoamage8adj ooma akig. Odana8etana8a egi pijandjin Jesos Christan ooma akig acitc dac egi pi anicinabe8iidizondjin. A8iag iidi e inendag, mi aa 8a cagodjiadjin Jesos Christan, acitc dac o8agackibinan a8iagon.

Jod odojibiigan 1:4

Nandam mega a8iagog ka ana8eta8a8adjin Kije Manidon ki kimodji pija8ag kina8akag. Anodj odinabadjitona8a ii kikinoamage8ini ka iji mikodjigadenig Kikije Manidominan okitci ca8endjige8ini ka odji kasiamago8ak kipatado8ininanan. Ikido8ag aja ega kidji nigodinani8anig misa8adj aianodj inakamigizinani8anig, kakinagotc madji aido8ini e pamendjigadenig. Odana8enima8an Jesos Christan, ka motci pejigondjin Kidogimaminani acitc 8in eta ka Tibeniminak. Aja 8eckadj ki ojibiigadenigoban Kije Manido Omazinaiganikag kidji tibakonagani8i8adj.

Kagi iji 8abadaagani8idj John 12:9

Ki sagidji8ebinagani8i dac aa kitci kikadanak. Mi aa 8eckadj kinebig, kitci madji manido kek8an Satan ka ijinikanagani8idj. Apanigotc o8agackibinan kakina a8iagon akikag ka tendjin. Akikag ki iji8ebinagani8i kigi odajeniman.

Kagi iji 8abadaagani8idj John 13:14

Ogi 8agackibinan dac a8iagon akikag ka tajikendjin, egi minagani8idj kidji gi mamada8izidj meg8adj e taji kana8abamigodjin nitam madji a8esizan. Ogi inan a8iagon: “Ojiik manidokan kidji gi manadjieg aa a8esiz kagi mij8aganiagani8idj kitci mokomani e abadanig acitc misa8adj kagi pimadizidj. Ojiik manidokan 8in ka ijinagozidj kidji ijinagozindjin.”

Kagi iji 8abadaagani8idj John 19:20

Midac ki na8adjibinagani8i aa madji a8esiz. Ki na8adjibinagani8i acitc aa8e “niniganadjimo8inni8inan” ka in8ekazopanin. Mi aa8e kagi mamada8izidj nigan madji a8esizikag. Ogi 8agackibinan dac iidi a8iagon kidji odisigondjin madji a8esizan okikina8adjibiigani acitc kidji icpenimandjin madji a8esizan omanidokanimini. Apitc dac ka na8adjibinagani8i8adj midjinijin, ki madjocte8ebinagani8i8ag kiabadj e pimadizi8adj. Mi maia sagaigan ejinag8ag ii ickode, ka kitci oza8abateg ka kitci kotazomateg.

Kagi iji 8abadaagani8idj John 2:2

Kakina nikikendan adi ka ijitcigeieg. Nikikendan egi kitci macka8i mikimo8eg, acitc egi kitci cacibendameg apitc e animizieg. Nikikendan ega e pagidineg8a madji a8iagog kidji 8idjiogo8eg. Kigi nda kikenima8ag dac igi a8iagog ka in8ekazo8adj Nidanodaganag e inagimagani8i8adj. Kikikenima8ag dac e kagina8icki8adj, ka8in nin igi Nidanodaganag.

Kagi iji 8abadaagani8idj John 2:20

Anic dac pejig kegon ki8i mikodamonom adi ega eji min8endaman. Kinadota8a8a aa ik8e Jezebel ka ijinikazodj ka 8agackibinigo8eg, ‘niniganadjimo8innik8e8inan’ ka igo8eg. O8agackibinan ini a8iagon ka anokitaojindjin. Okikinoama8an madji aido8ini kidji pamendamindjin, acitc kidji midjindjin 8iasini kagi pagidinigetama8agani8inigobanen manidokanan.

Kagi iji 8abadaagani8idj John 2:6

Anic dac pejig kegon k8aiak kitodana8a. Ka8in kimin8endasina8a adi ejitcige8adj igi8e a8iagog ‘Nikoleatanag’ (Nicolaïtes) ka ijinikazo8adj. Ka8in kenin nimin8endasin.

Kagi iji 8abadaagani8idj John 20:3

Apitc ajenin kagi mag8apinigodjin, ka iji kitci 8ani pagonekamiganig ogi iji8ebinigon. Ogi kidabikaogon dac acitc ogi kibozagaogon, ega mina8adj kidji gi 8agackibinadjin a8iagon akikag. Apitc dac ick8a pejig kitci midasomidana8e (1000) pibonaganig, 8enibik kada koki pagidinagani8i, mi mega Kije Manido kagi iji nda8endag. Anic dac 8enibik eta kada tajike.