Jod odojibiigan 1:18 - Kije Manido Odikido8in: Ocki Mazinaigan

¹⁸ Kidigo8abanig: “Apitc ani peconag8ag kidji ponaki8ag, kada te8ag a8iagog kidji papiigo8eg acitc kidji papia8adjin Kije Manidon. Kada panaage8ag adi eji madji mosa8endamo8adj, ega e 8i ndota8a8adjin Kije Manidon,” ki ikido8ag.

Jod odojibiigan 1:18 Iomraidhean Croise

Jesos Odanodaganan Odijitcige8ini8an 20:29

Nikikendan apitc ki ick8a madjaian, nandam a8iagog kiga pi nazikago8ag, tabickotc ka ka8askade8adj maiganag kidji ijinagozi8adj. Oga nda k8ag8e 8anadjia8an dac ka teb8etamindjin.

2 Timote 3:13

8ina8a dac ka madji inadizi8adj acitc ka 8aiejimi8e8adj, eckam eckam kada madji inadizi8ag, kodagian a8iagon e 8aiejima8adjin acitc 8ina8a tibina8e e 8aiejimagani8i8adj.

2 Timote 4:3

Kegapitc mega kada odjitcise a8iagog ega kidji 8i ndotamo8adj ka k8aiak8anig kikinoamage8ini. Oga nosoneana8a dac adi 8ina8a eji min8endamo8adj. Oga ma8adjia8an mane kikinoamage8innin, kidji kikinoamagendjin adi 8a iji ndotamo8adj.

2 Pien 2:1

8eckadj ako tebanig niganadjimo8innig ka paba kikinoama8a8apanin Kije Manidon odanicinabemini, ega Kije Manidokag e odji8agobanen, kagina8ickibanig mega. Mi pejig8an, a8iagog ka kagina8icki8adj kiga pi nda kikinoamago8ag. Kiga pi k8ag8e kikinoamago8ag kagina8icki8inan ke kitci madji todagemaganigin. 8a8adj oga ana8enima8an ka Tibendjigendjin kagi ag8acimigo8agobanen. Ii dac ke todamo8adj, kada nda kackitamadizo8ag kitci kaiezigotc kidji nici8anadjiagani8i8adj.

2 Pien 2:10

Kije Manido a8acamej oga sogakonan ini8e ka madji mosa8endamindjin madji aido8ini kidji pamendamindjin, acitc ega ka 8i ndotagodjin. Igi dac kikinoamage8innig ka kagina8icki8adj, ka8in kegoni okotasina8a, acitc ka8in a8ian onadota8asi8a8an. Ka8in 8a8adj odji pejig omanadjiasi8a8an ajenin acitc kodagian icpimig ka tendjin ka kitci macka8izindjin, tiegodj omanazoma8an.

2 Pien 3:3

Mi oo8e ma8adji ketci apitendag8ag kegon kidji nisidotameg. Apitc ani ponaki8ag, nandam a8iagog kada panaage8ag adi eji madji mosa8endamo8adj. Kiga papiigo8ag,

Jod odojibiigan 1:16

Apanigotc mojag madjendamog igi a8iagog, acitc pijicig kacimo8ag, ega 8ikad kegoni e min8endamo8adj. Kakinagotc kegonan inakamigizi8ag adi eji madji mosa8endamo8adj. Kitci inadjimidizo8ag, acitc okitci min8adjima8an a8iagon kidji gi odji todago8adjin adi e iji nda8endamo8adj.

Jod odojibiigan 1:4

Nandam mega a8iagog ka ana8eta8a8adjin Kije Manidon ki kimodji pija8ag kina8akag. Anodj odinabadjitona8a ii kikinoamage8ini ka iji mikodjigadenig Kikije Manidominan okitci ca8endjige8ini ka odji kasiamago8ak kipatado8ininanan. Ikido8ag aja ega kidji nigodinani8anig misa8adj aianodj inakamigizinani8anig, kakinagotc madji aido8ini e pamendjigadenig. Odana8enima8an Jesos Christan, ka motci pejigondjin Kidogimaminani acitc 8in eta ka Tibeniminak. Aja 8eckadj ki ojibiigadenigoban Kije Manido Omazinaiganikag kidji tibakonagani8i8adj.