Jak odojibiigan 2:18 - Kije Manido Odikido8in: Ocki Mazinaigan

¹⁸ Ne8ad a8iag kada ikido: “Kin kiteb8eta8a Kije Manido, nin dac nimino ijitcige.” Niga nak8e8ajia dac aa: “Ack8e sa 8abadaicin adi ejinag8ag kiteb8etamo8in ega e mino ijitcigean, nin dac kiga 8abadain niteb8etamo8in adi eji mino ijitcigeian.”

Jak odojibiigan 2:18 Iomraidhean Croise

Ojibiama8agani8i8ag ka teb8etamo8adj Rom odenakag 14:23

Aa8e dac ega ka ketcinamendag enendagozidj pejig midjimini kidji midjig, oga tibakonigon Kije Manidon kicpin iji midjig, ka8in mega oteb8etasin e inendagozidj kidji midjig. Kakinagotc kegon ke inakamigiziak, iji teb8etamak dac ega enendagoziak kidji inakamigiziak iidi, kipatadimin kicpin inakamigiziak.

Ojibiama8agani8i8ag ka teb8etamo8adj Rom odenakag 3:28

Kikikendananan mega Kije Manido e odji k8aiak8abamadjin a8ian ka iji teb8eta8andjin Jesosan, ka8in 8in ka iji mino ijitcigendjin e nosoneamindjin Coda8inni Inakonige8inan.

Ojibiama8agani8i8ag ka teb8etamo8adj Rom odenakag 4:6

Mi iidi ke8in ka ojibiigedj David. Ogi mikoman a8ian kagi k8aiak8abamigondjin Kije Manidon, misa8adj ega kegoni egi todamindjin kidji kackitamadizondjin. “Ca8endagozi aa a8iag” ki ikido. Mi mega oo8e ka ojibiigedj:

Ojibiama8agani8i8ag ka teb8etamo8adj Rom odenakag 8:1

Nogom dac ka8in 8ikad Kije Manido oga ick8aienimasi8an ini a8iagon Jesos Christikag ka iji tibendagozindjin.

Ojibiama8agani8i8ag ka teb8etamo8adj Rom odenakag 9:19

Ne8ad kiga ikidonan: “Kicpin dac iidi inakamigizidj Kije Manido, 8egonen 8edji inactaonadjin a8iagon egi panaagendjin? Motci ijitcige8an mega 8in kagi iji onenimadjin.”

1 Konit 13:2

Kicpin ega sagii8eian, ka8in kegon nidinabadizisi, misa8adj Kije Manido ca8enimijidj kidji tibadjimo8ag odikido8inan, misa8adj kakina kegon kikendaman, misa8adj nisidotamanin kakina kegonan ega maci ka kikendamoni8edj Kije Manido, misa8adj apitci sogi teb8etaman kidji gi kackito8anin kidji adato8anin pik8adinan.

2 Konit 5:17

Kicpin dac a8iag Jesos Christikag iji tibendagozidj, ocki a8iago8i. 8eckadj ako ka ijinagozipan, ki poni nag8ani, aja dac ocki a8iago8i!

2 Konit 7:1

Ni8idji8agananag ka kitci sagiigo8eg! Mi ii Kije Manido kagi ikidodj ketcinadj kidji todaonak. Kitci 8e8enda dac kida nagadjitonanan adi e ani ijisegin kia8inan acitc kidjitcagocinan, acitc kida na8abadananan kegonan ega ka min8endagin Kije Manido, ke 8iniigo8akonin. Manadjiadan dac Kije Manido acitc enigok k8ag8e paiekideedan, adi eji nda8endag.

Kalecia 5:6

Kicpin mega iji mama8iseiak Jesos Christikag, kidji pak8ejogo8ak kek8an ka8in, ka8in 8in ii nigod. Mi eta ii ketci apitendag8ag kidji teb8eta8aiak Jesos. Kicpin dac teb8eta8aiak, kiga sagiananag kodagiag a8iagog.

1 Timote 1:5

Mi oo ke odji 8idama8ad8a, kidji gi sagia8adjin o8idjipimadizimi8an. Panima ki paiekidee8adj, panima ki todamo8adjin eta mino kegonan ka ketcinamendamo8adj e k8aiak8anigin, acitc panima 8e8enda ki teb8eta8a8adjin Kije Manidon. Midac iidi ke iji sagia8adjin kodagian a8iagon.

Tite 2:7

Kin dac, Tite, kida mino inakamigizinan kekin, kidji gi kagikina8abamik8a. 8e8enda kikinoamagen, enigokodeean.

Ebaro 11:31

Pejig ik8e ka tajikegobanen iima Jeriko odenakag, Raab (Rahab) ijinikazogoban, ke8in ogi teb8eta8agoban Kije Manidon, misa8adj egi paba 8izig8amapanin mane naben. Oteb8etamo8in dac odji, ogi 8idjian ini nijin Israel naben ka pi kimodji nagadizindjin ododenamikag. Ka8in dac odji nisagani8isi aa ik8e apitc ka nisimagani8indjin kakina a8iagon iima ka tajikendjin ega ka ndota8andjin Kije Manidon.

Ebaro 11:33

Kakina ogi teb8eta8a8an Kije Manidon. Ii dac odji, ogi a8i migana8an a8iagon kodagian akikag acitc ogi cagodjia8an. K8aiak ki ogima8i8ag. Ogi 8idokago8an Kije Manidon, adi kagi igo8adjin. Ogi kackia8an ega kidji mag8amigo8adjin micibijin.

Ebaro 11:6

Ka8in dac a8iag ogagi min8endamiasin Kije Manidon kicpin ega teb8eta8adjin. Kicpin mega a8iag 8i nazika8adjin Kije Manidon, panima ki teb8etag e tendjin acitc e ca8enimandjin ini8e ka nanada 8abamigodjin.

Jak odojibiigan 2:14

Nidjiki8eg! Adi dac inasag a8iag ikidodj: “Niteb8eta8a Kije Manido,” kicpin ega nag8anig e teb8etag adi ejitcigedj? Teb8etamo8ini ii ka ijinag8anig ka8in oga odji ag8acimigosin.

Jak odojibiigan 3:13

Te na pejig a8iag ii e tacieg maia e kagita8endag acitc e kitci omidonendjiganidj? Kada 8abadai8e teb8e e kagita8endag e mino inakamigizidj. Kada mino ijitcige e tabasenimidizodj, acitc e kagita8endag adigotc enakamigizidj.