Epes 6:17 - Kije Manido Odikido8in: Ocki Mazinaigan

¹⁷ Odapinamok Kije Manido odag8acige8in, tabickotc cimaganic omigazo8actodin kidji ijinag8ag kina8akag. Odapinamok acitc Kije Manido odikido8in, tabickotc kitci mokomani Mino Manido kagi minigo8eg kidji ijinag8ag.

Epes 6:17 Iomraidhean Croise

Matio 4:4

Jesos dac ogi nak8e8ajian: “Mazinadeni oo8e Kije Manido Omazinaiganikag: ‘Ka8in pak8ejiganan eta kadagi odji pimadjiosi a8iag. Panima onada8endanan kakina Kije Manido odanim8e8inan kidji odji pimadjiodj,’ ” Deutéronome 8.3 ogi inan.

Matio 4:7

Jesos dac ogi nak8e8ajian: “Mazinadeni acitc Kije Manido Omazinaiganikag: ‘Ka8in k8ag8e kadjinija8akegon ka Tibendjigedj Kikije Manidomi8a kidji abadjitodj omacka8izi8in.’ ” Deutéronome 6.16

Epes 5:26

Jesos ki nibo, kakina a8iagon ka teb8etagodjin kidji gi iji tibendagozindjin Kije Manidokag, egi paiekaba8anadjin nibikag, odikido8in e abadjitodj.

1 Tesalonika 5:8

Kina8it dac ka iji 8aseag kitidemin. Nagadjiidizodan sa dac adi enakamigiziak! Misa maia ako tabickotc 8eckadj cimaganic ka pisikagibanin omigazo8inni 8aianan kidji ega nigodidj, mi panima ki ijiidizo8ak kekina8it, ega kidji nigodiak. Odapinadan dac teb8etamo8in acitc sagii8e8in, tabickotc cimaganic opi8abiko papagi8an kidji ijinag8agin kina8itinakag. Acitc odapinadan apenimo8in e ketcinamendamak kidji odjitciseg kidji ag8acimigo8ak, tabickotc cimaganic omigazo8actodin kidji ijinag8ag kina8itinakag.

Ebaro 4:12

Pimadizimagani mega Kije Manido Odikido8in, acitc kitci macka8izimagani. Na8adj kitci kaca apitc8in kitci mokoman ka kitci kacag nida8ina. Midac maia pejig8an kitci mokoman eji mikimomaganig ii Kije Manido Odikido8in. Kitci aidadj pidigamig kina8itinakag pidigemagan, pinici kideinakag acitc nena8idj kidjitcagocinakag. 8abadai8emagan adi eji mosa8endamak acitc adi enendamak kideinakag.

Ebaro 6:5

Ogi nisidotana8a adi epitci min8acinig Kije Manidon odikido8ini, acitc ogi 8abadana8a adi epitci macka8izimaganig Kije Manidon Odogima8i8ini ka pijamaganig.

Kagi iji 8abadaagani8idj John 1:16

Nij8atcin 8anagocan otakonabanin okitcinikikag. Kitci mokomani nida8ina e kacanig sagackineniban odonikag. Mi maia kizis ka kitci tcakasigedj e abitakijiganig epitci 8aseig8epan.

Kagi iji 8abadaagani8idj John 12:11

Kije Manido dac odanicinabeman ogi cagodjia8an ini8e. Mantcenicesan egi pagidenimidizondjin kidji nibondjin, acitc 8ina8a egi tibadjimo8adj Kije Manidon omin8adjimo8ini, mi 8edji ki kackito8adj kidji cagodjia8adjin. 8a8adj ki eco8ibanig kidji pagidenimidizo8adj kidji nibo8adj.

Kagi iji 8abadaagani8idj John 19:15

Kitci mokomani e kacanig sagackineni odonikag. Oga abadjiton dac, kakina ka inakanezindjin a8iagon kidji cagodjiadjin. Kada kitci sogakonige e ogima8idj. Kada 8abadai8e adi Kije Manidon ma8adji ka kitci macka8izindjin epitci kitci kiji8azindjin. Tabickotc ako 8eckadj ka cacagockigadegibanin minan kidji cominabokani8ag, mi ke ijinag8ag apitc kitci sogi pajacte8adjin a8iagon.

Kagi iji 8abadaagani8idj John 2:16

Midac an8endizok! Kicpin ega iidi todameg, aja pecodj kiga pi nda 8abaminom. Nimokoman ka sagisig nidonikag niga abadjiton kidji nak8ita8ag8a igi a8iagog.