Epes 2:14 - Kije Manido Odikido8in: Ocki Mazinaigan

¹⁴ Jesos Christ mega ogi todan kidji gi mino 8idji8idiak kakina e taciak pekadendamo8inikag. 8eckadj ako Coda8innig acitc ega ka Coda8inni8i8adj nenicikesebanig. Jesos dac ogi ojiton kidji pejigo inakanezindjin. Ii madjenimidi8in ka odji nenicikese8agobanen, mi maia tabickotc kibak8aigan ejinag8agiban. Apitc dac ka nibodj Jesos, ogi pigobidon ii kibak8aigani.

Epes 2:14 Iomraidhean Croise

Min8adjimo8ini kagi ojibiag kitcit8a Lok 1:79

misa kidji 8aseanig a8iagog ka iji kacki tibikanig ka te8adj, ka kotamo8adj kidji nibo8adj, acitc kidji kikinoamaonak adi ke todamak kidji pimadiziak pekadendamo8inikag.” Mi ka ikidodj Zakani.

Min8adjimo8ini kagi ojibiag kitcit8a Lok 2:14

“Icpenimadan Kije Manido icpimig 8ak8ig ka tedj! Oga minan opekadendamo8in kakina a8iagon mizi8ekamig ka min8endamiigodjin.”

John 10:16

Kiabadj kodagiag nidaia8ag e pakanizi8adj, ega maci e te8adj nogom meg8adj ka iji kana8enimag8a nimantcenicimag. Panima dac niga 8abadaag mikanani. Niga ndotagog apitc aiamiag8a. Midac kakina kada ma8asag8ino8ag, acitc dac kakina niga nagadjiag.”

John 11:52

Ka8in dac eta Coda8innin ke odji nibodj Jesos, misa acitc kidji ma8adjiagani8indjin kakina Kije Manido odabinodjijiman mizi8ekamig, kidji gi pejig8eiendagozindjin.

John 16:33

Mi oo kagi iji 8idamonagok, kidji gi pekadendameg eji 8idjiojieg. Ooma akikag kiga kodagitom. Anic dac sogideeok! Aja kakina kegon ooma akig nigi cagodjiton,” ki ikido Jesos.

Jesos Odanodaganan Odijitcige8ini8an 10:28

Ogi inan dac: “Kikikendana8a ka8in ijinag8asini8an Coda8innig odinakonige8ini8an a8iag e Coda8inni8idj kidji 8idji8adjin kek8an kidji ndaodeomadjin a8ian ega ka Coda8inni8indjin. Kije Manido dac 8in nigi 8idamag ega kidji 8inenimag a8iag acitc ega kidji inendaman a8iag ega tibise e minozidj kidji gi 8idji8ag.

Jesos Odanodaganan Odijitcige8ini8an 10:36

Kikikendana8a Kije Manido egi minadjin odikido8inan Israel a8iagon, ka odji kikendjigadenig omin8adjimo8in, aja e kackitondjin a8iagon kidji mino 8idji8andjin Kije Manidon, kagi pi todag Jesos Christ odji. 8aa teb8e Jesos ka Tibenimadjin kakina a8iagon!

Ojibiama8agani8i8ag ka teb8etamo8adj Rom odenakag 5:1

Kigi odji k8aiak8abamigonan dac Kije Manido osa mega kiteb8eta8anan. Aja dac nogom kimino 8idji8anan, adi Jesos Christan ka Tibeniminak kagi pi ijitcigendjin odji.

Kalecia 3:28

Ka8in dac nogom pepakan kidapitendagozisim. Kicpin Coda8inni8ieg kek8an ega Coda8inni8ieg, kicpin a8iag tibenimigo8eg kidji anokita8eg kek8an ega a8iag tibenimigo8eg, kicpin nabe8ieg kek8an ik8e8ieg, kakina tabickotc kipejig8eiendagozim ka iji mama8iseieg Jesos Christikag.

Epes 2:15

Jesos dac ogi todan ega mina8adj kidji abadanigin Coda8inni Inakonige8inan, ka ikidomaganigin adi enendagozi8apan Coda8innig kidji inakamigizi8adj acitc adi ke todamo8apan kidji min8endamia8adjin Kije Manidon. Ogi ojiton dac ii kidji mama8inondjin Coda8innin acitc ega ka Coda8inni8indjin, 8inikag kidji iji mama8isendjin. Ka8in aja nijin iji pepakanakonidisi8an, nogom aja pejig8akonidi8an, tabickotc ocki ka inakanezindjin a8iagon aja ijinagozi8an. Mi ii ka todag kidji mino 8idji8idindjin pekadendamo8inikag.

Epes 2:17

Jesos Christ ki pi tibadjimo min8adjimo8ini kina8akag, ka na8abamegoban Kije Manido, e 8idamago8egoban kidji gi aiameg pekadendamo8ini. Acitc kenina8itinakag ka Coda8inni8iag, aja 8eckadj ka kikenimagidj Kije Manido, ki pi tibadjimo min8adjimo8ini, e 8idamago8ag kidji gi aiamag pekadendamo8in.

Epes 3:15

Kakina ka tasode8izindjin 8ak8ig acitc akig ka tendjin otibeniman.

Epes 4:16

8in mega kakina ka ma8adjiadjin odanicinabeman kidji mama8inondjin. Mamidonendamok a8iag o8ia8. Kicpin kakina adi eji papakeanig o8ia8 mino mikimomaganigin acitc mino mama8agokenigin, kakina o8ia8 8e8enda kada minogini. Mi pejig8an ejise8adj a8iagog Jesosan ka teb8eta8a8adjin, o8ia8ini ka ijinagozi8adj. Jesos mega o8idjian ini a8iagon ma8asag kidji mikimondjin, acitc eckam kidji ani sogigaba8indjin oteb8etamo8inikag, e sagiidindjin kakina pepejig e tacindjin.

Kolosi 1:20

Acitc ogi onendan kidji abadjiadjin Jesosan kidji 8a8ejibidondjin kakina kegonan ooma akig acitc 8ak8ig ka tag8anigin, kidji gi koki min8endamiigodjin ini kakina kegonan. Jesosan dac omisk8ini kagi odjiga8inig apitc ka nibondjin tcibaiatigokag ogi abadjiton kidji ijitcigedj ii.

Kolosi 2:20

Mi maia tabickotc kagi 8idji nibomeg Jesos Christ ejinagozieg, ka8in dac aja kigagi tibenimigosina8an inakonige8inan acitc ijita8inan ooma akikag ka kitci apitendag8agin. 8egonen dac 8edji inadizieg tabickotc a8iagog ooma 8akidakamig ka iji tibendagozi8adj? 8egonen 8edji ndotamegon ono8e inakonige8inan:

Kolosi 3:11

Ka8in dac pepakan apitendagozisi8ag a8iagog. Kicpin Coda8inni8i8adj kek8an ega ka Coda8inni8i8adj, kicpin pak8ej8agani8i8adj kek8an ka8in, kicpin pi8ide8i8adj konigotc kicpin pakan inakanezi8adj ega dac sabenimagani8i8adj, kicpin tibenimagani8i8adj kidji anokitage8adj kek8an tibenimidizo8adj, kakina tabickotc pejig8eiendagozi8ag. 8in dac eta Jesos Christ apitendagozi, acitc kakina okigicka8an ini8e 8inikag ka iji tibendagozindjin.

Kolosi 3:15

Pagidinamok Jesos Christ opekadendamo8in kidji tibendagin kimamidonendamo8ini8an. Kije Manido mega kigi nd8e8emigo8a kidji mama8ino8eg kakina ka tacieg, tabickotc pejig a8iag o8ia8 kidji apitendagozieg, kidji gi aiameg pekadendamo8in. Apanigotc dac mig8etc inendamok Kije Manido kagi mino todago8eg odji.

Ebaro 13:20

Kije Manido kiminigonan pekadendamo8ini, 8in kagi abidjibaadjin ka Tibendjigendjin Jesosan nibo8inikag. Jesos dac okitci mino toda8an Kije Manidon odanicinabemini, tabickotc a8iag kitci 8e8enda ka kana8enimadjin mantcenican. Ogi abidjibaigon dac Kije Manidon osa mega ki nibo kina8it odji, egi odjiga8inig omisk8i kidji gi ojitcigadenig Kije Manidon odocki nakomo8ini, apanigotc kagige ke tag8anig.

Ebaro 7:2

Abanaam dac ogi minan midatcin somanike inigik kakina kegoni kagi pi ki8e8idopan ka iji migadinani8anig. Ii dac 8izon Mekisedek “Ogima ka k8aiakozidj” ikidomagan. Kitci ogima8igoban Salem odenani aa Mekisedek, acitc dac “Ka iji pekadendag8ag” ikidomagan Salem. Ijinikanagani8igoban dac acitc “Ogima ka pekadendag8anig odogima8i8in.”