Epes 1:1 - Kije Manido Odikido8in: Ocki Mazinaigan

¹ Nin Pon. Kije Manido nigi onabamig Jesos Christ Odanodaganan kidji inagimigo8an. Kidojibiamonom kina8a Kije Manido odanicinabeman ka apitendagozieg, Epes (Ephèse) odenag ka tajikeieg, enigokodeeieg ka teb8eta8eg Jesos Christ.

Epes 1:1 Iomraidhean Croise

Min8adjimo8ini kagi ojibiag kitcit8a Lok 16:10

“Aa8e 8e8enda ka kana8endagin kegonan ega ka kitci apitendag8anigin, oga kana8endanan 8e8enda kitci kegonan ka kitci apitendag8anigin. Aa8e dac ka 8agackizidj apitc kana8endagin ega ka kitci apitendag8anigin kegonan, kada 8agackizi apitc kana8endagin ka kitci apitendag8anigin kegonan.

Jesos Odanodaganan Odijitcige8ini8an 16:15

Ki sigaadazo dac, acitc kakina ini8e omigi8amikag ka tajikendjin. Midac Lidia nigi nd8e8emigonan kidji ijaiag omigi8amikag. Ki ikido: “Kicpin teb8eienimijieg maiagotc e teb8eta8ag ka Tibendjigedj, pi nda tajikeok nimigi8amikag.” Midac nigi cagozomigonan kidji nda iji tajike8agidj.

Jesos Odanodaganan Odijitcige8ini8an 18:19

Midac ka iji ija8adj Epes (Ephèse) odenakag. Mi iima ka iji naganadjin Parisilan acitc Akilasan. Meg8adj iima Pon ka tegobanen, ki pidige aiamiemigi8amikag kidji aiamiadjin Coda8innin.

Jesos Odanodaganan Odijitcige8ini8an 18:21

Tiegodj ogi pojoka8an ab8amaci madjadj, acitc ogi inan: “Mina8adj niga koki pija, kicpin iji nda8endag Kije Manido.” Midac Epes odenani ka odji madjiacidj.

Jesos Odanodaganan Odijitcige8ini8an 9:13

Ananias dac ogi nak8e8ajian: “Ka Tibendjigean! Mane a8iagog nigi mikodamagog ini naben. Ki 8idamage8ag dac egi madji toda8adjin kidanicinabeman 8edi Jerusalem.

Ojibiama8agani8i8ag ka teb8etamo8adj Rom odenakag 1:1

Nin Pon, ka anokita8ag Jesos Christ, ka nd8e8emijidj Kije Manido Jesos Odanodaganan kidji inagimigo8an, acitc ka onabamijidj kidji tibadjimo8ag omin8adjimo8in.

Ojibiama8agani8i8ag ka teb8etamo8adj Rom odenakag 1:7

Kidojibiamonom kina8a Rom ka teieg, kakina kina8a ka sagiigo8eg Kije Manido acitc ka nd8e8emigo8eg odanicinabeman kidji ijinikanigo8eg. Nipagosenimag Kije Manido Kidadaminan acitc ka Tibeniminak Jesos Christ kidji ca8enimigo8eg acitc kidji minigo8eg pekadendamo8ini.

Ojibiama8agani8i8ag ka teb8etamo8adj Rom odenakag 8:1

Nogom dac ka8in 8ikad Kije Manido oga ick8aienimasi8an ini a8iagon Jesos Christikag ka iji tibendagozindjin.

1 Konit 4:12

Nikitci nak8imin e mikimo8ag kidji gi 8isiniag. Apitc ako anodj aigo8ag a8iag, nipagosenimanan Kije Manido kidji ca8enimadjin. Apitc ako kodagiigo8ag a8iag, nicacibendananan, ka8in ninak8isimin.

1 Konit 4:17

Nipidjinija8a dac Timote (Timothée) kidji pi nda 8abamigo8eg. Mi maia nidabinodjijim ka kitci sagiag enenimag, acitc kitci 8e8enda odanokita8an ka Tibendjigendjin. Kiga mika8asomigo8a dac adi maia ejitcigeian meg8adj e taji nosone8ag Jesos Christ. Ii ke kikinoamago8eg, mi ii pejig8an kikinoamage8in ka kikinoama8ag8a kakina ka teb8etamo8adj, adigotc ka iji ma8adjiidi8adj kidji aiamie8adj.

2 Konit 1:1

Kina8a ka teb8eta8eg Kije Manido, ka ma8adjiidieg kidji aiamieieg 8edi Konit (Corinthe) odenag, nin Pon kidojibiamonom. Nin Jesos Christ Odanodaganan nidinagimigo, adi kagi iji nda8enimijidj Kije Manido kidji ijinagozi8ag. Ni8idjiog Timote (Timothée), ka teb8etag ke8in. Ijinijaama8agani8i8ag dac oo ojibiigani ke8ina8a kakina Kije Manido odanicinabeman 8edi ka tajike8adj Akaia (Achaïe) akikag.

Kalecia 1:1

Nin Pon kidojibiamonom. 8in tibina8e Jesos Christ kagi onabamijidj Odanodaganan kidji inagimigo8an, acitc dac ke8in Kije Manido Kidadaminan, 8in kagi abidjibaadjin Jesosan. Ka8in dac 8in a8iagog kagi onabamiji8adj, ka8in kek8an pejig a8iag kagi anonijidj.

Kalecia 3:26

Kakina ka tacieg, Kije Manido odabinodjijiman kidijinagozim, adi eji teb8eta8eg Jesos Christ.

Kalecia 3:28

Ka8in dac nogom pepakan kidapitendagozisim. Kicpin Coda8inni8ieg kek8an ega Coda8inni8ieg, kicpin a8iag tibenimigo8eg kidji anokita8eg kek8an ega a8iag tibenimigo8eg, kicpin nabe8ieg kek8an ik8e8ieg, kakina tabickotc kipejig8eiendagozim ka iji mama8iseieg Jesos Christikag.

Kalecia 3:9

Abanaam ogi teb8eta8an Kije Manidon, acitc ki odji ca8enimagani8i ii odji. Midac pejig8an, ca8enimagani8i8ag ke8ina8a kakina a8iagog ka teb8eta8a8adjin Kije Manidon.

Epes 1:15

Mi 8edji mig8etc inag Kije Manido kina8a odji. Nigi nodan mega adi inigik kiabadj eji teb8eta8eg Jesos ka Tibendjigedj. Nigi nodan acitc adi inigik eji sagieg8a kakina Kije Manido odanicinabeman.

Epes 2:10

Kije Manido mega kigi minigonan odabinodjijiman kidji ijinagozi8aiak. Midac Jesos Christikag eji mama8iseiak, Kije Manido ocki pimadizi8ini kigi minigonan, kidji gi paba mino ijitcigeiak. Kijadj dac ogi onendan adi enendagoziak kidji iji mino ijitcigeiak, e nda8enimigo8ak iidi kidji inadiziak.

Epes 2:13

8eckadj ako kina8abama8agoban Kije Manido. Nogom dac Jesos Christikag e iji mama8iseieg, kipec8abama8a Kije Manido, egi pagidenimidizodj Jesos Christ kidji nibodj kina8a odji.

Epes 2:6

Kigi koki pimadiziigonan Kije Manido tabickotc kagi iji koki pimadiziadjin Jesosan, osa mega Jesos Christikag kidiji mama8isemin. Midac kekina8it kigi asigonan kidji 8idji ogima8imaiak Jesos 8ak8ig.

Epes 6:21

Kidjiki8enan ka kitci sagiaiak Tikik (Tychique) ka ijinikazodj, 8in teb8e k8aiak odanokita8an ka Tibendjigendjin. Kiga 8idamago8a dac kakina adi eji pimadizian, kakina e tacieg kidji kikendameg adi enakamigizian.

Kolosi 1:2

Kidojibiamagom kina8a Kolosi (Colosses) odenag ka tajikeieg, Kije Manido odanicinabeman ka apitendagozieg, acitc nidjiki8enanag ka apitenimigo8eg, enigokodeeieg ka teb8eta8eg Jesos Christ. Nipagosenimanan Kije Manido Kidadaminan kidji ca8enimigo8eg acitc kidji minigo8eg pekadendamo8ini!

Kagi iji 8abadaagani8idj John 17:14

Oga migana8an ini Mantcenicesan. Mantcenices dac kada cagodjii8e, 8in mega otibeniman kakina ka tibenimi8endjin, acitc 8in okackakanan kakina ogiman. Odanicinabeman oga 8idji8an, ini8e kagi onabamadjin, acitc kagi nd8e8emadjin, acitc enigokodeendjin ka teb8etagodjin.”

Kagi iji 8abadaagani8idj John 2:10

Aja pecodj kiga kodagitom, anic dac ka8in segizikegon. Madji manido oga kiba8an kibaodimigi8amikag nandam ka tacieg, kidji nda kikenimigo8eg epitci teb8eta8eg8en kek8an ka8in. Midasogon inigik kiga nanekadjiigom. Misa8adj odji nisigo8eg, ka8in poni teb8etaojikegon. Mi panima iidi ke odji ca8eniminagok kagige pimadizi8in. Mi tabickotc sizok8epizon kagi kackitamadizo8eg ke ijinagozieg.

Kagi iji 8abadaagani8idj John 2:13

Nikikendan adi e tajikeieg. Madji manido ka iji ogima8idj kidiji tajikem. Apanigotc dac misa8adj kitaji teb8etaojim. Nigi ijinija8a nidanodagan Antipas kidji mikomijidj, acitc 8e8enda ogi todan. Kidodenami8akag dac ki iji nisagani8i, 8edi ka iji tajikedj madji manido. Kina8a dac, 8a8adj ii apitc ka8in kidodji ana8etaojisim.