Ebaro 9:16 - Kije Manido Odikido8in: Ocki Mazinaigan

¹⁶ Nanigodin, ab8amaci a8iag nibodj, odojibian ojibiiganack8emagokag, e tibadjimodj a8eneni8an negadama8adjin odaiman. Ab8amaci dac madina8enani8anig odaiman, panima ki kikendjigadenig 8e8enda ka apitci teb8e nibog8en aa a8iag.

Ebaro 9:16 Iomraidhean Croise

Ojibiama8agani8i8ag ka teb8etamo8adj Rom odenakag 5:12

Apitc pejig eta nabe ka patadidj, Adam ka ijinikazodj, mi ka odji tag8ag patado8in ooma akikag. Egi tag8ag dac patado8in, mi ka odji tag8ag nibo8in acitc. Kakina dac a8iagog kada nibo8ag osa mega kakina ki patadi8ag.

Ojibiama8agani8i8ag ka teb8etamo8adj Rom odenakag 6:23

Kicpin mega patadiak, kikackitamadizomin kidji nibo8ak. Kije Manido dac 8in kica8enimigonan kagige kidji pimadiziak, e abadjiadjin Jesos Christan ka Tibeniminak.

1 Konit 15:22

Kakina mega a8iagog Adamikag odaiagizi8ag, kakina dac a8iagog kada nibo8ag tabickotc 8in. Midac pejig8an, kakina a8iagog ka teb8eta8a8adjin Jesos Christan kada abidjiba8ag.

Ebaro 1:3

Mi maia tabickotc epitci icpendagozindjin Og8izisan tabickotc 8in, acitc mi maia 8in tabickotc ejinagozindjin. Onagadjitoni Og8izisan kakina kegoni, e abadjitondjin ini ka kitci macka8izimaganigin odikido8inan. Ogi todan kidji kasiama8agani8indjin a8iagon opatado8ini, mina8adj dac Kije Manidon ka kitci macka8izindjin okitcinikinikag ki iji abi 8ak8ig.

Ebaro 13:20

Kije Manido kiminigonan pekadendamo8ini, 8in kagi abidjibaadjin ka Tibendjigendjin Jesosan nibo8inikag. Jesos dac okitci mino toda8an Kije Manidon odanicinabemini, tabickotc a8iag kitci 8e8enda ka kana8enimadjin mantcenican. Ogi abidjibaigon dac Kije Manidon osa mega ki nibo kina8it odji, egi odjiga8inig omisk8i kidji gi ojitcigadenig Kije Manidon odocki nakomo8ini, apanigotc kagige ke tag8anig.

Ebaro 9:15

Midac iidi egi todag Jesos Christ, mi acitc egi iji8idama8adjin Kije Manidon odocki nakomo8ini odanicinabemini. Nogom dac kakina igi8e Kije Manidon kagi nd8e8emigo8adjin, ogagi odisigona8an ini kakina mino kegonan kagi ikidondjin Kije Manidon kidji minigo8adjin, kabegotc ke tibendamo8adjin. Ogagi aiana8an ini mino kegonan osa mega Jesos ki nibo kidji kasiama8adjin a8iagon adi ka pi iji patadindjin, meg8adj kiabadj e abadjito8apan nitam nakomo8ini.

Ebaro 9:17

Inigikigotc mega ke pimadizig8en aa a8iag, ka8in abadasini ii mazinaigani kagi ojitodj. Panima eta ick8a nibodj kadagi abadani.

Jak odojibiigan 2:10

Aa8e mega kitci 8e8enda ka 8i nosoneagin Kije Manidon odinakonige8inan, pejig dac eta ii e tasinigin inakonige8inan ega nosoneag, mi pejig8an kakina ini inakonige8inan ana8etagibanin ejinagozidj.