Ebaro 13:14 - Kije Manido Odikido8in: Ocki Mazinaigan

¹⁴ Ooma mega 8akidakamig, ka8in kidaiasinanan odena apanigotc ke tag8ag. Kitaji pitonanan dac odena nage ke aiamak.

Ebaro 13:14 Iomraidhean Croise

1 Konit 7:29

Nidjiki8eg! Mi oo8e 8a ikido8an. Inigik Kije Manido kagi minigo8ak pimadizi8ini aja kegat ick8aseni. Inendagozi8ag dac ka niba8i8adj kidji mamidonendamo8adj ooma akikag eta kidji iji niba8i8adj.

2 Konit 4:17

Nikodagitomin nogom pagi, 8enibik dac eta ii kada ijise. Ii dac kodagito8in odji, niga odisigonan kitci icpendagozi8in apanigotc ke tag8ag. Apitc ako e mamidonendamag ii icpendagozi8in, ka8in nikitci apitendasinananan nikodagito8ininanan.

Epes 2:19

Kina8a dac ega ka Coda8inni8ieg, ka8in aja pi8ideg kidinagimigosim Kije Manido odanicinabemikag, acitc ka8in aja kina8abamasi8a Kije Manido. Nogom dac kekina8a Kije Manidokag kidiji tibendagozim acitc Odogima8i8inikag kidiji acidagimigom. Kije Manido odabinodjijiman kidijinagozim kigi kakina Kije Manido odanicinabeman.

Pilip 3:20

Anic dac kina8it, 8ak8ig kidiji tibendagozimin. Kikitci pianan aa8e ke Ag8aciminak 8ak8ig kidji pi odosedj, mi aa ka Tibeniminak Jesos Christ.

Ebaro 10:34

Kikidimagenima8abanig igi8e ka kodagito8adj 8edi kibaodimigi8amikag oteb8etamo8ini8a odji. Acitc apitc ka makamigo8egoban kidaimi8an, mi misa8adj ka iji kitci min8endameg egi 8anito8egon. Kikikenda8aban mega kitci mino kegonan e aiamegon 8edi 8ak8ig apanigotc ke tag8agin, acitc na8adj e kitci apitendag8agin apitc8in kegonan ka tibendamegon ooma 8akidakamig.

Ebaro 12:22

Kina8a dac 8in, ka8in iima kigi ijasim kidji nda nagicka8eg Kije Manido. Kigi pijam dac Sion pik8adinakag ka ijinikadeg, ega ka kackitcigadeg kidji 8abadjigadeg. Kigi pijam ocki odena Jerusalemikag, 8ak8ig ka tag8ag. Mi ii Kije Manido ka pimadizidj ododenam, taji eji kitci ma8adjiidi8adj ajenig ka kitci modjigendamo8adj, ozam ka mane8adj kidji agimagani8i8adj.

Ebaro 12:27

Apitc dac ka ikidodj: “Kiabadj abidinaj,” ki8idamagonan kidji ninigisenigin ini kegonan kagi kijendagin, ka kackitcigadenigin kidji mamadjibidjigadenigin, acitc ega aja kidji tag8anigin. Midac eta ini8e kegonan ega kegi mamadjibidjigadegin kiabadj ke tag8agin.

Ebaro 2:5

Niga mikodananan nogom adi ke ijinag8ag nage aki. Ka8in 8in ajenin ododji minasi8an Kije Manido macka8izi8ini kidji ogima8indjin ooma akikag.

Ebaro 4:9

Ikidomagan dac ii kiabadj kodag kijigoni kidji tag8anig kidji gi an8ecimonondjin Kije Manido odanicinabeman, mi maia tabickotc Kije Manido kagi iji an8ecimogobanen ka ick8a kijendamogobanen akini, apitc ka nij8asogonaganig.

Ebaro 9:11

Nogom dac, Jesos Christ aja ki tag8icin kidji aiamie ogima8idj ma8adji ka niganizidj, kidji minigo8ak ini mino kegonan aja nogom kagi odisigo8akonin. Taji dac kagi iji pidigedj kidji iji mikimodj, na8adj kitci icpendag8ani acitc na8adj kitci apitendag8ani apitc8in 8eckadj kitcit8a nibaganikag, taji ka iji mikimo8agobanen 8eckadj aiamie ogimag ma8adji ka niganizi8adj. Ka8in nibaganikag a8iagon kagi ojitondjin odji iji pidigesi, ooma 8akidakamig ka iji tag8anig.

1 Pien 4:7

Aja peconag8an kakina kegon kidji ick8aseg. Nagadjiidizok dac enakamigizieg acitc iag8amendamok, kabe kidji ick8ataieg kidji aiamieieg.

Kagi iji 8abadaagani8idj John 3:12

Igi8e ke sogigaba8i8adj, niga asag Kije Manidon okitci aiamiemigi8aminikag, 8ina8a ka odji sogakisinig ii migi8amini. Ka8in 8ikad kegoni ogagi odji sagidjibinigosina8a. Niga ojibiam8an Kije Manidon o8izoni 8ina8akag acitc Kije Manidon ododenamini o8izoni. Ocki Jerusalem ii odena, Kije Manido 8ak8ig ke odjinijaag. Acitc nidocki 8izoni niga ojibiam8an 8ina8akag igi a8iagog.