2 Konit 8:18 - Kije Manido Odikido8in: Ocki Mazinaigan

¹⁸ Kodag a8iag acitc ka teb8etag nidijinija8anan kidji 8idji8adjin Titan. Kakina igi8e ka teb8etamo8adj, pepakan ka taji ma8adjiidi8adj kidji aiamie8adj, okitci inenima8an ini naben, osa mega kitci 8e8enda paba tibadjimo8an min8adjimo8ini.

2 Konit 8:18 Iomraidhean Croise

Ojibiama8agani8i8ag ka teb8etamo8adj Rom odenakag 16:4

Meg8adj ka taji kitci nanizaniziaban, ki ick8ata8ag kidji nibo8adj e pi nda 8idjiiji8adj. Kitci mig8etc dac nidinag, acitc ka8in nin eta ii ka inag8a, mig8etc acitc odigo8an kakina ega ka Coda8inni8indjin egi ani teb8etamindjin, pepakan ka ma8adjiidindjin kidji aiamiendjin.

1 Konit 16:3

Ojibiigan dac niga ojiton ii apitc, acitc niga minag igi8e kagi onabameg8a kidji iji8ina8adjin ini kiconiami8an 8edi Jerusalemikag.

1 Konit 4:17

Nipidjinija8a dac Timote (Timothée) kidji pi nda 8abamigo8eg. Mi maia nidabinodjijim ka kitci sagiag enenimag, acitc kitci 8e8enda odanokita8an ka Tibendjigendjin. Kiga mika8asomigo8a dac adi maia ejitcigeian meg8adj e taji nosone8ag Jesos Christ. Ii ke kikinoamago8eg, mi ii pejig8an kikinoamage8in ka kikinoama8ag8a kakina ka teb8etamo8adj, adigotc ka iji ma8adjiidi8adj kidji aiamie8adj.

1 Konit 7:17

Kakina pepejig a8iag inendagozi kidji iji pimadizidj adi ka Tibendjigendjin kagi iji ca8enimigodjin, acitc tabickotc ejinagozipan apitc ka nd8e8emigogobanen Kije Manidon. Mi oo8e eji kikinoama8ag8a ako kakina ka teb8etamo8adj.

2 Konit 12:18

Nigi k8ag8edjima Tite kidji a8i ndaodeomigo8eg, acitc kodagian ka teb8etamindjin nigi ijinijaoman kidji 8idjiogodjin. Anodj na kigi inabadjiigo8a Tite? Nin acitc 8in, mi maia pejig8an tabickotc e todamag, acitc ninakomidimin eji nijiag, kana?

2 Konit 2:12

Troas odenakag nigi ija, kidji nda tibadjimo8an min8adjimo8in ka odji kikenimagani8idj Jesos Christ. Apitc dac ka tag8icinian 8edi, nigi odji pabiziskendan ka Tibendjigedj egi ijitogobanen kidji kitci minose8ag e kagik8e8ag.

2 Konit 8:19

Ka8in dac eta ii. Mi aa nabe kakina ka teb8etamindjin kagi onabamigodjin kidji 8idjionak apitc ke paba madina8eiag conia ka taji ma8adjiagani8idj. Kidji icpenimagidj ka Tibendjigedj acitc kidji 8abadai8eiag kabena e ick8ataiag kidji 8idjii8eiag 8edji kana8enimagidj aa conia.