2 Konit 7:11 - Kije Manido Odikido8in: Ocki Mazinaigan

¹¹ Kina8a dac, ki8abadana8a aja adi kagi apitci mino todago8eg Kije Manido, egi kackendameg acitc egi odji ijigaba8ita8eg Kije Manido. Aja nogom 8e8enda kinisidotana8a acitc ki8i 8abadai8em 8e8enda e 8i todameg. Kikiji8azim acitc kikotadjim ka inakamigiziegoban odji. Ki8i koki 8abamijim. Kikitci 8i ijitam adi eji nda8endag Kije Manido, acitc kikitci 8i pajacte8a8a aa8e maia kagi panaagedj. Kigi 8abadai8em sa dac 8e8enda egi mikidameg ii.

2 Konit 7:11 Iomraidhean Croise

Min8adjimo8ini kagi ojibiag kitcit8a Mak 3:5

Jesos dac kakina ini a8iagon ogi kana8abaman e kiji8azidj. Pekic dac kitci kackendamoban, kitci cibictig8anenigoban mega ini a8iagon. Jesos dac ogi inan ini naben: “Pi ijindjitan.” Midac ka todag, acitc teci8ag k8aiak ki koki mikimomagani onidji.

John 2:17

Midac okikinoamaganan ki mika8i8an Kije Manidon Omazinaigani kagi ikidomaganigobanen: “Tebendjigean! E kitci sagito8an kimigi8am, mi kegi odji nisigo8an.” Psaume 69.10(9)

Jesos Odanodaganan Odijitcige8ini8an 17:16

8edi Atins odenag, Pon otaji piabanin Silasan acitc Timoten. Ki kitci kackendam egi 8abamadjin kitci mane manidokanan iima odenag.

Ojibiama8agani8i8ag ka teb8etamo8adj Rom odenakag 11:20

Teb8e ii. Anic dac Kije Manido ogi ta8asan Coda8innin, ka8in mega ogi odji teb8etagosin. Kina8a dac kigi min8abamigo8a, kigi teb8eta8a8a mega. Ka8in dac odji kitci inenimidizokegon, tiegodj manadjiik Kije Manido ii odji.

Ojibiama8agani8i8ag ka teb8etamo8adj Rom odenakag 14:18

Aa8e dac iidi ka iji anokita8adjin Jesos Christan, omin8endamian Kije Manidon acitc a8iagon omanadjiigon.

Ojibiama8agani8i8ag ka teb8etamo8adj Rom odenakag 3:5

Ne8ad nandam a8iagog kada ikido8ag: “Mi apitc e panaageiak, e odji paietenag8ag adi epitci k8aiakozidj Kije Manido. Adi dac pekic 8edji pajacteogo8ak apitc panaageiak? Ka8in k8aiak inakamigizisi Kije Manido!” Mi ekido8adj nandam.

1 Konit 12:25

Ogi ijiton iidi ega kidji nenicikesenig ii 8ia8ini, acitc kakina pepejig e tasinigin pepakan ka iji papakeziak kidji nagadjiidimaganigin.

1 Konit 5:2

Kida ma8idana8an kipatado8ini8an! Tiegodj dac kikitci inadjimidizom. Aa nabe ka iji madjakamigizidj, 8ack8enijaok ka iji ma8asag8ino8eg!

2 Konit 13:7

Nidaiamita8anan Kije Manido ega pabajine kidji panaageieg. Ka8in dac 8in kidji inenimigo8ag a8iagog 8edjidagotc Jesos Odanodaganan e inagimigo8ag, 8edji nda8enimigo8eg ega kidji panaageieg. Mi eta kidji mino ijitcigeieg kinada8enimigom, misa8adj e inenimigo8ag a8iagog ega 8edjidagotc Jesos Odanodaganan e inagimigo8ag.

2 Konit 2:6

Aja kigi ma8adjiidim kidji onendameg adi ke iji pajacte8eg. Mi tibise.

2 Konit 6:4

Tiegodj, adigotc todamag, pijicig ni8i iji 8abadai8emin teb8e e anokita8agidj Kije Manido. Kabe dac nikitci cacibendananan, misa8adj e kitci kodagito8ag, misa8adj e kitci sanagendjigeiag, acitc misa8adj e kitci madjiseiag.

2 Konit 7:1

Ni8idji8agananag ka kitci sagiigo8eg! Mi ii Kije Manido kagi ikidodj ketcinadj kidji todaonak. Kitci 8e8enda dac kida nagadjitonanan adi e ani ijisegin kia8inan acitc kidjitcagocinan, acitc kida na8abadananan kegonan ega ka min8endagin Kije Manido, ke 8iniigo8akonin. Manadjiadan dac Kije Manido acitc enigok k8ag8e paiekideedan, adi eji nda8endag.

2 Konit 7:7

Acitc ka8in 8in eta egi tag8icig Tite 8edji ki sogideeckago8ag. Nigi kitci sogideeckagonan sa acitc apitc ka pi 8idamago8ag adi kagi iji kitci 8idjieg ega kidji ana8endjigedj. “Kikitci 8i 8abamigo8ag,” nigi igonan. Nigi 8idamagonan acitc e kackendameg adi kagi pi inakamigizieg odji, acitc e ick8ataieg kidji ijitaieg adi ka iji k8ag8edjiminagok. Na8adj dac kiabadj nigi kitci modjigendanaban.

2 Konit 7:9

Nogom dac nikitci modjigendan, ka8in 8in egi kackendamiinagok, nikitci modjigendan sa osa mega egi kackendameg 8edji ki odji an8endizo8eg. Egi kackendameg, Kije Manidokag kigi odji ijigaba8im. Ka8in sa dac kanabadj kidodji madji todagosina8a egi iji ojibiamonagok iidi.

2 Konit 9:2

Nikikendan aja e 8i 8idoka8eg8aban igi a8iagog. Kigi min8adjiminom apitc ka aiamiag8a ka teb8etamo8adj 8edi Masedonia (Macédoine) akikag. Nigi inag: “Igi8e ka teb8etamo8adj Akaia (Achaïe) akig ka tajike8adj, ick8ata8ag kidji migi8e8adj conian aja 8aiej pejigopibon,” mi iidi ka inag8a. Aja dac kegat kakina ke8ina8a ick8ata8ag kidji 8idjii8e8adj, egi nodage8adj adi eji kitci nda8endameg kidji 8idjii8eieg.

Epes 4:26

Kicpin nanigodin kiji8azieg, iag8amendamok ega kidji odji patadieg. Ka8in kabe kijik kiji8azikegon, nokadiziok ab8amaci kidji pagicimog.

Epes 5:11

Ka8in todakegon tabickotc ka inakamigizi8adj a8iagog ega ka teb8eta8a8adjin Kije Manidon, ka iji kacki tibikanig ka te8adj. Ka8in mega odji pejig abadasini adi enakamigizi8adj. Tiegodj, 8e8enda 8abadaikog teb8e e madji inadizi8adj.

Pilip 2:12

Ni8idji8aganag ka kitci sagiinagok! E kikendameg adi Jesos ka iji ndota8adjin Kije Manidon, kekina8a panima kida ndota8a8a Kije Manido. Apitc meg8adj kina8akag eji paba tajikeiaban, kinadota8a8aban. Na8adj dac kiabadj nogom kida ndota8a8a, misa8adj nin e na8inagozian. Kigi ag8acimigo8a Kije Manido, midac panima nogom kida kitci nak8im 8e8enda kidji inadizieg adi ka iji nda8endag, e kitci kitcit8a8enimeg.

1 Tesalonika 4:6

Ka8in dac 8ikad pejig nabe oda madji toda8asi8an o8idjipimadiziman ka teb8etamindjin adi ke iji 8idji8adjin ik8e8an. Ka Tibendjigedj mega oga pajacte8an ini8e iidi ke iji panaagendjin. Aja kitci enigok kigi 8idamagom kidji iag8amieg.

1 Timote 5:20

Meg8adj dac e ma8adjiidinani8ag kidji aiamiani8ag, kiga kagikimag kakina igi8e kagi nta patadi8adj. Midac kodagiag a8iagog oga kotana8a kidji nta patadi8adj.

2 Timote 2:15

Kin dac, kitci nak8in kidji min8abimik Kije Manido. 8e8enda mikimon, ega kidji odji agadjian adi kagi iji mikimo8an, 8e8enda e tibadjimo8an Kije Manido odikido8in ka teb8emaganig.

Tite 3:8

Teb8emagan oo8e kegon ka ikido8an. Kinada8enimin dac enigok kidji kikinoamagean ii ka ikido8an, igi8e ka teb8eta8a8adjin Kije Manidon kabe kidji 8i mino ijitcige8adj. Min8acin mega ii eji kikinoamageiak, acitc odji 8idjiagani8i8ag a8iagog.

Ebaro 4:1

Kije Manido ki ikido kidji minigo8ak an8ecimo8ini, acitc kagi ikidodj Kije Manido kiabadj teb8emagani ogajiganig. Iag8amig dac, ega iaga pejig a8iag kina8akag kidji p8ana8itodj kidji odisigodj ii an8ecimo8ini.

Jak odojibiigan 3:17

Kagita8endamo8in dac Kije Manidokag ka odjimagag kitci pakan ijinag8an. A8iag ka aiag Kije Manidon okagita8endamo8ini kitci paiekidee, o8idoka8an kodagian kidji mino 8idji8idindjin pekadendamo8inikag, nokadizi, onadota8an adi ekidondjin kodagian a8iagon, okitci kidimageniman o8idjipimadiziman, kabe mino ijitcige, ka8in opepakanenimasin a8iagon, acitc ka8in kimodizisi.

1 Pien 1:17

Apitc ako e pagosenimeg Kije Manido, “Nidadaminan” kidijinikana8a. 8in dac, otibakonan pepejig a8ian adi kagi ijitcigendjin, ega e pepakanenimadjin. Kida kitci manadjia8a dac, inigikigotc ke pimadizieg ooma akig.

1 Pien 2:2

Mi maia tabickotc ocki tcidjicag ejinagozieg kiteb8etamo8ini8akag, ega abidji kin8ej ka ako minigo8eg ocki pimadizi8in. Tcidjic mi eta eji mika8idj tcodjocinaboni kidji minik8edj, kidji gi madjigidj. Midac pejig8an kekina8a, kida kitci nda8endana8a Kije Manido odikido8in 8edjidagotc ka teb8emaganig, kidji gi ani madjigieg kiteb8etamo8ini8akag acitc kidji gi ag8acimigo8eg.

Jod odojibiigan 1:23

Kodagiag dac acitc te8ag e ani pec8abadamo8adj kidji iji8ebinagani8i8adj kitci ickodekag. K8aiak8adjiikog dac igi, acitc pimadjiikog. Kodagiag dac kiabadj te8ag e kitci nta patadi8adj. Kidimagenimikog igi, pekic dac kosikog pagi, 8a8adj e madjendamegon odaimi8an kagi 8inito8adjin egi nta patadi8adj.

Kagi iji 8abadaagani8idj John 3:19

Nin dac 8in, igi8e ka sagiag8a, mi igi ke maminobinag8a acitc ke k8aiak8adjiag8a apitc patadi8adj. An8endizok dac acitc enigok nosoneocik, mi maia tabickotc kijagamide kidji inendagozieg.