1 Timote 6:11 - Kije Manido Odikido8in: Ocki Mazinaigan

¹¹ Kin dac Timote, kidanokita8a Kije Manido. 8imackan dac kakina ini8e madji kegonan. K8ag8edjiton kidji k8aiak8adizian, 8e8enda kidji anokita8adj Kije Manido, kidji sogi teb8etaman, kidji sagii8ean, kidji cacibendaman, acitc kidji nokideean.

1 Timote 6:11 Iomraidhean Croise

Ojibiama8agani8i8ag ka teb8etamo8adj Rom odenakag 14:19

Pijicig dac kida k8ag8e mino 8idji8idimin pekadendamo8inikag, acitc kida k8ag8e 8idokodadimin, kakina pepejig ka taciak kidji gi sogigaba8iak kiteb8etamo8ininakag.

1 Konit 10:14

Megadacta, kina8a ni8idji8aganag ka kitci sagiinagok, ka8in odji pejig pabiziskendakegon kidji icpenimeg8a manidokanag.

1 Konit 14:1

Mikidamok kidji sagieg8a kidjipimadizimi8ag, acitc enigokodeeieg mosa8endamok kidji odisigo8eg kekina8a Mino Manido oca8endjige8inan, a8acamej dac mosa8endamok kidji ca8enimigo8eg kidji gi tibadjimo8eg Kije Manido odikido8in.

1 Konit 6:18

Ka8in dac pabajine madji aido8in pamendakegon. Kakina kodagian patado8inan ka todamo8adj a8iagog, ka8in o8ia8i8akag odiji nici8anadjiigosina8an. A8iag dac madji aido8ini ka pamendag, 8in tibina8e o8ia8 omadji todan.

1 Timote 1:14

Kitci ani8ag mane nigi minig ka Tibeniminak okitci ca8endjige8in, acitc nigi odisigonan teb8etamo8in acitc sagii8e8in, Jesos Christ ka minadjin ako ini8e 8inikag ka iji tibendagozindjin.

1 Timote 4:12

Ka8in a8iag kida pagidinasi kidji manenimik, misa8adj e ocki pimadizian. Tiegodj, kida 8abadaag ka teb8etamo8adj adi maia ke inadizi8apan, tabickotc kin tibina8e ka inadizian. Kagita8en, mino inadizin, sagiik a8iagog, Kije Manidokag iji apacenimon acitc k8aiak pimadizin.

1 Timote 5:10

Panima acitc kidji kikenimagani8idj 8e8enda egi mino ijitcigedj, 8e8enda egi obigiadjin odabinodjijiman, 8e8enda egi toda8adjin pi8iden, egi anokita8adjin Kije Manidon odanicinabemini e kizisibadjizidenadjin, egi 8idoka8adjin a8iagon ka sanagendjigendjin, acitc apanigotc egi ick8atadj kidji mino todag.

1 Timote 6:20

Timote! 8e8enda kana8endan ii ca8endjige8ini Kije Manido kagi minik. Ojimik igi8e anodj kegonan ka aikido8adj, ega Kije Manidokag ka odjimaganigin. Ojimik igi8e ka k8ag8e cagozomidi8adj teb8e8ini odji, “Nikikendananan teb8e8in” ka inendamo8adj, acitc ka 8agackimidizo8adj.

2 Timote 2:21

Kicpin a8iag nagadag ii madji kikinoamage8ini nogom ka mikodaman, kada minagani8i e kitci apitendag8anig mikimo8ini. Tabickotc ka min8acinig onagani kada ijinagozi. Enigokodeedj mega Kije Manidokag iji tibendagozi. 8e8enda odanokita8an ka Tibendjigendjin, acitc apanigotc ick8ata k8aiak kidji mikimodj.

2 Timote 2:22

Ka8in todakenin madji kegonan ka ocki pimadizi8adj ka mosa8endamo8adj kidji todamo8adjin. Tiegodj, kida kitci k8ag8edjiton kidji k8aiak8adizian, kidji sogi teb8eta8adj Jesos, kidji sagiad8a kodagiag a8iagog, acitc pekadendamo8inikag kidji iji mino 8idji8ad8a igi8e a8iagog ka minodee8adj acitc ka aiamita8a8adjin ka Tibendjigendjin.

2 Timote 3:10

Kin dac, Timote, kikikenimijinan adi ka iji kikinoamageian. Kigi 8abamijinan adi enadizian. Kikikenimijinan adi ka iji mikimo8an, acitc adi eji apacenimo8an Kije Manidokag. Kikikenimijinan acitc adi eji nokideeian, acitc adi eji sagiag8a a8iagog, acitc adi eji cacibendaman meg8adj e kodagito8an.

2 Timote 3:17

Midac aa8e ka anokita8adjin Kije Manidon kakina abadjita8inan odaianan, kakina mino mikimo8inan kidji gi ijitadj.

Ebaro 12:14

Kitci nak8iok 8e8enda kidji mino 8idji pimadizimeg8a kakina a8iagog, acitc kidji ani paiekideeieg. Kicpin mega ega paiekideedj a8iag, ka8in oga 8abamasin ka Tibendjigendjin.

1 Pien 3:11

Panima ki ponitodj kidji madjakamigizidj, tiegodj kidji mino ijitcigedj. Pijicig oga nanada8i todan kidji mino 8idji8adjin kodagian a8iagon pekadendamo8inikag.