1 Konit 2:15 - Kije Manido Odikido8in: Ocki Mazinaigan

¹⁵ A8iag ka kigickagodjin Mino Manidon, 8in oga nisida8inanan kakina kegonan adi ejinag8anigin, kicpin men8acinig8enin kek8an meanadanig8enin. Kodagian dac a8ian ega ka kigickagondjin Mino Manidon, ka8in ogagi nisida8inagosin kicpin epitci mino inakamigizig8en kek8an madji inakamigizig8en.

1 Konit 2:15 Iomraidhean Croise

John 7:17

A8enenigotc ka 8i ijitadj adi Kije Manidon ka iji nda8endamindjin, oga kikendan kicpin Kije Manidokag odjimaganig nikikinoamage8ini kek8an ninikag eta odjimaganig.

Jesos Odanodaganan Odijitcige8ini8an 16:3

Pon onada8enimabanin Timoten kidji paba 8idjiogodjin. Kakina Coda8innig pecodj ka tajike8agobanen okikendana8agoban ega e Coda8inni8indjin Timoten odadamini. Midac Pon ka iji pak8ej8adjin Timoten, ka todamo8agobanen ako Coda8innig.

1 Konit 14:37

Kicpin a8iag inendag egi odisigodj Mino Manidon oca8endjige8ini, kek8an inendag egi ca8enimagani8idj kidji kackitodj kidji tibadjimodj Kije Manidon odikido8ini, inendagozi acitc kidji nisidotag mi ini ka Tibendjigendjin kagi onakonigendjin kidji ojibiam8ag.

1 Konit 3:1

Nidjiki8eg! Meg8adj ka teiaban kina8akag, ka8in nidodji kackitosinaban kidji iji aiamiinagok tabickotc ka iji aiamiag8aban ako a8iagog ka kigicka8adjin Mino Manidon. Misa8adj egi ani teb8etameg, kiabadj kigi nosoneana8a kina8a tibina8e ka iji mosa8endameg acitc kikagita8endamo8ini8a kigi abadjitona8a. Mi maia tabickotc tcidjicag ejinagoziegoban kiteb8etamo8ini8akag, ka motci madji nosone8eg Jesos Christ.

1 Konit 4:5

Poni onenimikog dac a8iagog ka apitci 8e8enda mikimo8ag8en. Pitaok kidji odjitciseg ke koki tag8icig ka Tibendjigedj Jesos. Ii dac apitc, kada 8abadai8e adi kimodj ejideendjin a8iagon. Ii dac apitc, Kije Manido oga min8adjiman kakina pepejig a8ian adi kagi pi ijitcigendjin.

Kalecia 6:1

Nidjiki8eg! Kicpin pejig e tacieg patadidj, kina8a ka kigickago8eg Mino Manido, kida 8idjia8a aa a8iag mina8adj k8aiak kidji inadizidj, anic dac pekadj mino todaok. Kakina dac pepejig e tacieg, kida iag8amim kina8a tibina8e, ega kidji odji 8ik8adjiigo8eg kidji patadieg kekina8a.

Pilip 1:10

Midac kidji kackito8eg kidji onabadameg kidji todameg adi eji min8acig. Apitc dac Jesos Christ koki tag8icig, kiga paiekideem acitc ka8in odji pejig kegon kigagi odji inactaonigosim.

Kolosi 1:9

Midac 8edji apanigotc aiamietamago8eg, ka ako nodageiag e mikomigo8eg. Nipagosenimanan Kije Manido kidji minigo8eg kakina kagita8endamo8ini acitc nisidotamo8ini Omino Manidoman ka migi8endjin, 8e8enda kidji gi kikendameg adi eji nda8enimigo8eg kidji todameg.

1 Tesalonika 5:21

8e8enda nanada kikendamok Kije Manidokag epitci odjimaganig8en ii ka ikido8adj. Odapinamok dac ii ka min8acig,

Ebaro 5:14

Kitci a8iagog dac omidjina8a midjimini ka mizita8anig. 8ina8a dac, e ani pimadizi8adj kitci 8e8enda ki ani kikinoamadizo8ag kidji nisida8inamo8adj 8egoneni men8acinig acitc meanadanig.

1 John 2:20

Kina8a dac, Mino Manido kigi odisigo8a, Jesos kagi minigo8eg. Mi 8edji nisida8inameg teb8e8in.

1 John 4:1

Ni8idji8aganag ka kitci sagiinagok! Kitci mane ka kagina8icki8adj a8iagog te8ag ooma akikag e ikido8adj e tibadjimo8adj Kije Manidon odikido8ini. Misa dac ka8in teci8ag teb8eta8akegonig a8iagog ka ikido8adj “Kije Manidokag odjimagan oo ka ikido8an.” Panima nitam kida nda kikenima8ag, kicpin teb8e Mino Manidon epitci kigickago8ag8en.