1 Konit 1:5 - Kije Manido Odikido8in: Ocki Mazinaigan

⁵ Kina8a ka iji mama8iseieg Jesosikag, Kije Manido kitci mane kigi minigo8a mino kegonan. Kigi minigo8a 8e8enda kidji kikendameg Kije Manido omin8adjimo8in, acitc 8e8enda kidji mikodameg.

1 Konit 1:5 Iomraidhean Croise

Jesos Odanodaganan Odijitcige8ini8an 2:4

Mino Manidon dac ogi pidigeckago8an kakina a8iagog, acitc pepakan ki ijigij8e8ag, adi Mino Manidon kagi iji minigo8adjin kidji ijigij8e8adj.

Ojibiama8agani8i8ag ka teb8etamo8adj Rom odenakag 11:12

Apitc ii ka patadindjin Coda8innin, Kije Manido ogi kitci mino toda8an kakina pakan a8iagon ooma akig. Apitc ii ka pagicinindjin Coda8innin, Kije Manido ogi mino ca8eniman pakan ka inakanezindjin. Ketcinadj dac apitc maia koki nagicka8a8adjin Coda8innig Kije Manidon, maiagotc a8acamej oga kitci mino ca8enimigo8an.

Ojibiama8agani8i8ag ka teb8etamo8adj Rom odenakag 15:14

Nidjiki8eg! Kiketcinameniminom e kitci minodeeieg, acitc egi cabo kikendameg adi enendagozieg kidji ijitcigeieg, acitc e kackito8eg kidji 8a8idjiidieg kidji kikendameg adi ke ijitcigeieg.

Ojibiama8agani8i8ag ka teb8etamo8adj Rom odenakag 15:4

Kakina mega kegon 8eckadj kagi ojibiigadegin Kije Manido Omazinaiganikag, kidji gi kikinoamago8ak 8edji ki ojibiigadegin, kidji gi odji aiamak apenimo8in. Kije Manido mega Omazinaigan ki8idjiigonan kidji cibendamak acitc kidji sogideeiak.

1 Konit 12:10

Kodagian oca8eniman kidji gi mamada8izindjin, nandam dac kidji tibadjimondjin Kije Manidon odikido8inan, kodagian kidji kikendamindjin kicpin Mino Manidokag epitci odjimaganig8enin kegonan kek8an madji manidokag, kodagian kidji pakanigij8endjin, acitc kodagian kidji inotamagendjin apitc a8ian pakanigij8endjin.

1 Konit 12:8

Mino Manido oca8eniman pejig a8ian kidji kagita8endamitagozindjin, kodagian oca8eniman kidji iji kackitondjin kidji tibadjimondjin ini kegonan kagi iji 8idama8adjin.

1 Konit 13:2

Kicpin ega sagii8eian, ka8in kegon nidinabadizisi, misa8adj Kije Manido ca8enimijidj kidji tibadjimo8ag odikido8inan, misa8adj kakina kegon kikendaman, misa8adj nisidotamanin kakina kegonan ega maci ka kikendamoni8edj Kije Manido, misa8adj apitci sogi teb8etaman kidji gi kackito8anin kidji adato8anin pik8adinan.

1 Konit 13:8

Ka8in 8ikad kada iji8ebasini Kije Manido kidji nda8enimadjin a8iagon kidji poni sagii8endjin. Nigodin kada odjitciseni a8iagog kidji poni tibadjimo8adj Kije Manidon odikido8ini, acitc kidji poni pakanigij8e8adj, acitc kidji poni kikendag8agin ka kadjigadegin kegonan.

1 Konit 14:26

Nidjiki8eg! Adi ke todamegoban? Apitc ma8adjiidieg, pejig a8iag kada nigamo, kodag dac a8iag kada kikinoamage Kije Manidon omin8adjimo8ini, kodag a8iag kada 8idamage adi ka igodjin Kije Manidon, kodag mina8adj kada pakanigij8e, mina8adj kodag kada inotamage adi ka ikidondjin ini ka pakanigij8endjin. Kakinagotc ejitaieg, todamok ka teb8etamo8adj ka ma8adjiidi8adj kidji aiamie8adj kidji odji madjigi8adj oteb8etamo8ini8akag.

1 Konit 8:11

Kikikendan teb8e8in kin, mi 8edji ki todaman. 8in dac aa ega ka macka8izidj oteb8etamo8inikag, ka8in maci okikendasin. Kicpin dac ii todaman, kiga 8anadjita8an oteb8etamo8in aa a8iag. “Nipanaage” kada inendam mega, midac ne8ad ke odji ega teb8etag. Ka8in min8acisinon! Kidjiki8e 8esa aa, Jesos Christ kagi odji nibodj.

2 Konit 4:6

Kije Manido mega ki ikido 8eckadj: “Taji ka iji kacki tibikag, nidinakonige kidji 8aseag.” Genèse 1.3 Misa dac 8in Kije Manido kagi todag kidji tanasakonenig 8asea8ini nideinakag. E kikendam8aiak dac Kije Manido odicpendagozi8in, mi 8edjimaganig ii 8asea8ini. 8abadjigadeni dac ako Kije Manido odicpendagozi8in apitc 8abamagani8idj Jesos Christ.

2 Konit 6:10

Nikackendamiigomin, misa8adj dac kiabadj nimina8azimin. “Kidimagizi8ag” nidinenimigomin, misa8adj dac ni8anadiziananag kodagiag. “Ka8in kegoni odaiasina8a” nidinenimigomin, misa8adj dac kakina kegon nitibendananan.

2 Konit 8:7

Kitci 8e8enda kitodana8an kakina kegonan. Kikitci sogi teb8etana8a, kitci 8e8enda kipaba tibadjimom min8adjimo8in, kikikendana8a Kije Manido oteb8e8in, kabena kidick8atam kidji 8idoka8eg8a kodagiag, acitc kikitci sagiijinam. Kik8ag8edjiminom dac nogom enigokodeeieg kidji ijitaieg ii mino mikimo8in kidji 8idoka8eg8a ka kidimagizi8adj.

2 Konit 9:11

Kakinagotc kiga iji ca8enimigo8a Kije Manido, pijicig mane kegoni kidji gi mineg8a kodagiag. Kitci mane dac a8iagog mig8etc oga ina8an Kije Manidon apitc iji8idama8agid8a conian ka ca8enimeg8a.

Epes 1:17

Nipagosenima Kije Manido Kidadaminan ka kitci icpendagozidj, 8in ka Tibeniminak Jesos Christan ka anokitagogobanen, kidji minigo8eg Mino Manidon, ke 8idjiigo8eg kidji kagita8endameg acitc ke 8abadaigo8eg adi maia ejinagozidj Kije Manido, na8adj eckam kidji gi ani kikenimeg.

Epes 2:7

Mi ka todag Kije Manido kagige kidji 8abadaadjin kakina a8ian adi epitci kitci kije8adizidj. Ki8abadaigonan adi epitci kitci sagiigo8ak, egi pidjinija8adjin Jesos Christan.

Epes 3:8

Kakina kodagian Kije Manido odanicinabeman na8adj 8ina8a apitendagozi8an apitc8in nin. Anic dac Kije Manido ka kitci kije8adizidj nigi kitci ca8enimig egi onabamijidj kidji paba tibadjimotaomagin ega ka Coda8inni8indjin omin8adjimo8in. Jesos Christ kagi pi ijitcigedj kina8it odji, epitci kitci apitendag8anig dac ii, ka8in 8ikad kakina kiga kackitosinanan kidji cabo nisidotamak okije8adizi8in.

Epes 6:19

Kenin aiamietamaocik, Kije Manido kidji 8idamaojidj adi ke ikido8an apitcigotc kagik8eian omin8adjimo8in, midac ega kidji cag8enimo8an apitc tibadjimo8ag omin8adjimo8in, ega 8ikad odakanag kagi kikendag8anig, nogom dac aja kagi kikendamonigo8ak.

Pilip 1:9

Mi oo eji pagosenimag Kije Manido kina8a odji. Nipagosenima eckam eckam kidji ani sagiidieg kakina pepejig e tacieg, acitc na8adj kidji ani kikendameg teb8e8in, kidji gi odji kikendameg dac kidji mino ijitcigeieg acitc ega kidji madji ijitcigeieg.

Kolosi 2:3

8in Jesos ka kikendamoni8edj ii kagita8endamo8ini acitc nisidotamo8ini Kije Manidokag ka odjimaganigin, tabickotc kegonan ka kitci apitendag8agin kagi kadjigadegin ka ijinag8anigin.

Kolosi 3:10

Nogom dac kigi ani ocki a8iago8im. Kije Manido kagi kijendag ii ocki pimadizi8ini ka aiameg, acitc apanigotc o8a8ejiton, tabickotc 8in ka ijinagozidj kidji ani ijinagozieg, eckam eckam kidji ani kikenimeg.

Jak odojibiigan 3:13

Te na pejig a8iag ii e tacieg maia e kagita8endag acitc e kitci omidonendjiganidj? Kada 8abadai8e teb8e e kagita8endag e mino inakamigizidj. Kada mino ijitcige e tabasenimidizodj, acitc e kagita8endag adigotc enakamigizidj.

2 Pien 3:18

Tiegodj sa, iji pimadiziok eckam kidji gi ani kikenimeg Jesos Christ ka Tibeniminak acitc ka Ag8aciminak, acitc eckam kidji gi ani minigo8eg okitci ca8endjige8in, kidji gi odji madjigieg kiteb8etamo8ini8akag. Icpenimadan nogom acitc kagigekamig! Amen. Nin Pien