1 John 3:10 - Kije Manido Odikido8in: Ocki Mazinaigan

¹⁰ Mi oo8e e odji kikendamak a8enen Kije Manidon ka tibenimigodjin acitc a8enen madji manidon ka tibenimigodjin. Aa a8iag ega k8aiak8adizidj kek8an ega sagiadjin o8idjiki8en, ka8in 8in ini Kije Manido odabinodjijiman.

1 John 3:10 Iomraidhean Croise

Matio 13:38

Kitigan aki dac, mi maia tabickotc a8iagog ooma akig ijinag8an. Ka minozi8adj dac anominag, mi maia tabickotc igi a8iagog Kije Manidon Odogima8i8inikag ka iji tibendagozi8adj ejinagozi8adj. Madji mijackon dac 8in, mi maia tabickotc igi8e ka tibenimigo8adjin madji manidon ejinag8agin.

Min8adjimo8ini kagi ojibiag kitcit8a Lok 6:35

Tiegodj, sagiikog igi8e ka madjenimigo8eg. 8e8enda mino todaokog acitc a8ii8eg ega mamakadj kidji ki8e minigo8eg. Kiga kitci ca8endagozim, acitc ka kitci icpendagozidj Kije Manido odabinodjijiman kiga ijinagozim. Kakina mega a8ian Kije Manido omino toda8an, misa8adj ini8e ega mig8etc ka ikidondjin acitc ini8e ka madji inakamigizindjin.

John 1:12

Anic dac nandam ogi nda8enima8an acitc ogi teb8eta8a8an. Ini dac a8iagon kagi nda8enimigodjin, ogi minan Kije Manidon odabinodjijimini kidji gi ijinagozindjin.

John 11:52

Ka8in dac eta Coda8innin ke odji nibodj Jesos, misa acitc kidji ma8adjiagani8indjin kakina Kije Manido odabinodjijiman mizi8ekamig, kidji gi pejig8eiendagozindjin.

John 8:44

Madji manido 8aa kidadami8a, acitc ki8i todana8a adi eji nda8endag 8in kidadami8a. Kabe ki nici8e8inni8i, ka ako tag8anig akini. Ka8in 8ikad odji teb8esi, ka8in mega tag8asini teb8e8ini 8inikag. Apitc ako kagina8ickidj, apanigotc ka pi ijitcigedj mi eta ijitcige. Kabe mega kagina8icki acitc mi ini odadami8an kakina ka kagina8icki8adj.

John 8:47

Aa Kije Manidokag ka iji tibendagozidj, onadotan ka ikidondjin. Kina8a dac, ka8in Kije Manidokag kidiji tibendagozisim. Mi ii 8edji ega ndotaojieg.” Mi ka ikidodj Jesos.

Jesos Odanodaganan Odijitcige8ini8an 13:10

“Kin ka iji tibendagozian kitci madji manidokag kidadam, ka madjendaman kakina k8aiak8adizi8in! Kabe kikagina8ickimag a8iagog acitc ki8aiejimag. Teb8e8ini ka ikidodj ka Tibendjigedj, kin dac pijicig kidikidonan ega k8aiak ii.

Ojibiama8agani8i8ag ka teb8etamo8adj Rom odenakag 13:8

Ka8in kidinendagozisim kidji nepidji mazinaama8eg a8iag, anic kidinendagozim apanigotc kidji sagiidieg kakina pepejig e tacieg. Aa8e mega ka sagiadjin o8idjipimadiziman, mi sa aa8e 8e8enda ka nosoneagin inakonige8inan kagi migi8endjin Kije Manidon.

Epes 5:1

Aja nogom kina8a Kije Manido odabinodjijiman kidijinagozim, acitc Kije Manido kikitci sagiigo8a. Midac kida k8ag8e kagikina8abama8a.

Kolosi 3:14

Midac iidi ke todameg, anic dac ma8adji ka kitci apitendag8ag kidji todameg, mi ii8e kidji sagiidieg pepejig e tacieg. Kicpin mega sagiidieg, maiagotc kiga mama8inom kakina ka tacieg.

1 Timote 1:5

Mi oo ke odji 8idama8ad8a, kidji gi sagia8adjin o8idjipimadizimi8an. Panima ki paiekidee8adj, panima ki todamo8adjin eta mino kegonan ka ketcinamendamo8adj e k8aiak8anigin, acitc panima 8e8enda ki teb8eta8a8adjin Kije Manidon. Midac iidi ke iji sagia8adjin kodagian a8iagon.

1 John 2:29

Aja kikikenima8a Jesos kabe ka k8aiakozidj. Misa dac kikikendana8a kakina a8iagog ka k8aiak inakamigizi8adj, Kije Manido odabinodjijiman ejinagozi8adj.

1 John 3:1

8adan epitci sagiigo8ak Kije Manido Kidadaminan, odabinodjijiman kidijinikanigonan. Teb8e maiagotc Kije Manido odabinodjijiman kidijinagozimin. A8iagog dac ooma akikag ka8in kikikenimigosinanag Kije Manido odabinodjijiman e ijinagoziak, ka8in mega 8ikad ododji kikenimasi8a8an Kije Manidon.

1 John 3:2

Ni8idji8aganag ka kitci sagiinagok! Aja Kije Manido odabinodjijiman kidijinagozimin. Anic dac ka8in maci kigagi kikendasinanan 8egonen ke iji8ebag nigan, adi maia ke ijinagoziak. Misa8adj dac kikikendananan apitc Jesos ke koki tag8icig ooma akikag, tabickotc 8in kiga ijinagozimin. Teb8e mega maia ejinagozidj kiga 8abamanan.

1 John 4:21

Mi oo8e Kije Manido ka iji kikinoamago8ak. Aa a8iag sagiadjin Kije Manidon, panima acitc oga sagian o8idjiki8en.

1 John 4:6

Kina8it dac, Kije Manidokag kidiji tibendagozimin. Aa dac a8iag Kije Manidon ka kikenimadjin kinadotagonan. A8iag dac ega Kije Manidokag iji tibendagozidj, ka8in kinadotagosinan. Midac iidi ka odji kikendamak kicpin a8iag Mino Manidon ka teb8endjin tibenimigodjin kek8an madji manidon ka 8aiejimi8endjin tibenimigodjin.

1 John 4:8

A8iag dac ega sagii8edj, ka8in okikenimasi8an Kije Manidon. Kije Manido mega adigotc eji tedj kagige sagii8e.

1 John 5:19

Kikikendananan Kije Manidokag e iji tibendagoziak. 8ina8a dac ega ka teb8eta8a8adjin Kije Manidon, madji manidon otibenimigo8an.

1 John 5:2

Kicpin sagiaiak Kije Manido, acitc ijitcigeiak 8in ekidodj kidji todamak, misa dac kikikendananan e sagiaiakonig Kije Manido odabinodjijiman.

3 John 1:11

Ni8idji8agan ka kitci sagiinan! Ka8in kagikina8abamakenig igi8e ka madji inadizi8adj, tiegodj kagikina8abamik igi8e ka mino inadizi8adj. Aa8e k8aiak ka nta inakamigizidj, Kije Manido ini odabinodjijiman. Aa8e dac ega k8aiak ka inakamigizidj, ka8in okikenimasi8an Kije Manidon.