Lucas 19:47 - Inkeanon

⁴⁷ Adlaw-adlaw hay nagaturo si Jesus sa Templo. Ro mga pinuno it mga saserdote, ro mga maestro it Kasuguan ag ro mga manogdumaea it banwa hay nagausoy it paagi kon paalin nanda imaw hipatay.

Lucas 19:47 Iomraidhean Croise

Mateo 21:23

Pag-abot nanda sa Jerusalem, nagbalik si Jesus sa Templo ag idto nagturo. Tag nagaturo imaw, ginpaeapitan imaw ku mga pinuno it mga saserdote ag ku kaibahan nandang mga lider ag ginpangutana, “Ano ring otoridad nga obrahon ro imong mga ginaobra iya sa Templo? Sin-o kimo ro nagtao ku otoridad ngaron?”

Mateo 26:55

Ginhambae dayon ni Jesus ro kaabo ngato nga mga tawo, “Ano ay? Matsa rebelde't-a ako nga nagdaea pa kamo it daga ag bakulo sa pagdakop kakon. Adlaw-adlaw hay idto ako sa Templo nagalingkod ag nagaturo pero owa ninyo ako kato pagdakpa.

Marcos 11:18

Pagkasayod ku mga pinuno it mga saserdote ag ku mga maestro it Kasuguan ku gin-obra ni Jesus hay nag-usoy sanda it ideya kon paalin nanda imaw hipatay, ay nahadlok sanda kana. Nahadlok sanda kay Jesus ay hangawa gid ro tanan nga mga tawo sa ana nga mga ginaturo.

Marcos 12:12

Ginadakop kunta ku mga pinuno it mga Judio si Jesus ay nakatagumpaaw sanda nga sanda ro ginapatamaan nana sa ratong paanggid nga istorya. Pero owa nanda pagpadayuna ay nahadlok man sanda sa mga tawo nga apin kay Jesus, ngani naghalin lang sanda.

Marcos 14:1

Daywang adlaw lang bago mag-abot ro Pagtililipon sa Pagdumdum ku *Pagtaliwan, ag ro Pagtililipon sa Pagdumdum ku Pagkaon it Tinapay nga Owa it Pangpaalsa. Nagainusoy ro mga pinuno it mga saserdote ag ro mga maestro it Kasuguan it paagi kon paalin nanda hidakop it patago si Jesus, agod hipapatay imaw.

Marcos 14:49

Adlaw-adlaw hay idto ako kinyo sa Templo nga nagaturo pero owa ninyo ako kato pagdakpa. Pero natabo ra agod ro ginsueat sa Sagrado nga Kasueatan hay matuman.”

Lucas 19:48

Pero owa sanda it mahimo ay nawili gid magpinamati kana ro tanan nga mga tawo.

Lucas 20:19

Ginadakop eagi kunta ku mga maestro it Kasuguan ag ku mga pinuno it mga saserdote si Jesus ay nakatagumpaaw sanda nga sanda ro anang ginapatamaan ku ana ngatong istorya. Pero owa man nanda pagpadayuna ay nahadlok man sanda sa mga tawo nga apin kay Jesus.

Juan 10:39

Pagkabati nanda kato hay anda eon man kunta nga dakpon si Jesus, pero matsa pumuslot eang imaw sa andang alima.

Juan 18:20

Nagsabat si Jesus kana, “Nagaturo ako permi sa atubang it kadagayaan. Idto ako permi nagaturo sa mga sinagoga ag sa Templo, nga tilipunan naton tanan nga mga Judio. Owa gid ako it ginhambae it patago.

Juan 7:19

Bukon abi it gintao kato kinyo ni Moises ro Kasuguan it Dyos? Pero owa it bisan sin-o kinyo nga nagatuman gid karon, ay kon gatuman gid matuod kamo hay ham-an it ginaideyahan ninyo nga hipatay ako?”

Juan 7:44

Ro iba ma't-a hay gusto imaw nga dakpon, pero owa gid it nagtabing kana.