Lucas 16:9 - Inkeanon

⁹ Ro manggad iya sa kalibutan hay indi masaligan ag indi man magdurar. Pero ginahambae ko kinyo nga gamita ninyo ron sa pagpangamigo agod kon magtaliwan eon kamo sa kalibutan ag owa eon gakinahangean ku mga ruyon ngaron hay pagasueang-sueangon kamo ku mga amigo ninyo ngato sa lugar kon siin magaililiba kamo hasta sa owa it katapusan.

Lucas 16:9 Iomraidhean Croise

Mateo 19:21

Nagsabat si Jesus, “Kon gusto nimo nga owa gid it kueang ro imong pagtuman sa Dyos, umuli ka ag ibaligya tanan ro imong pagkabutang ag ipanueupod sa mga pobre ro kabakeanan ag may imo dayon nga manggad sa eangit. Pagkatapos hay bumalik ka agod mangin sumueunod nakon.”

Mateo 6:19

Nagpadayon pa gid it pagturo si Jesus. Hambae nana, “Ayaw kamo it tinipon it manggad iya sa kalibutan, ay samaron man lang ron it sapat-sapat ag tuktuk ag takawon.

Mateo 6:24

“Owa it sueuguon nga makaserbi it dungan sa daywang ka amo. Tungod ro matabo hay ana nga kaugtan ro sambilog ag higugmaon ro sambilog, ukon ana nga apinan ro sambilog ag baliwalaon ro sambilog. Indi ka puyding magserbi sa Dyos it husto ag paeabihon mo man ro pagmanggad.”

Lucas 11:41

Dapat ninyo nga limpyuhan ro maeain nga una sa inyong kabubut-on ag magtao kamo sa mga imoe nga owa ginamunti it inyong buot. Bukon eang dayon it ro inyong mga buhat nga makita ro mangin limpyo sa mata it Dyos kundi pati ro inyong kabubut-on.

Lucas 12:33

Ngani baligyaan ro inyong pagkabutang ag itao sa mga pobre ro kabakeanan. Kon makaruyon ro inyong obrahon hay parehas man ron nga nagatinipon kamo it manggad sa eangit nga nakabutang sa sueudlan nga owa it pagkasamad. Ngani owa ron it pagkaduea ag owa it pagkaubos. Indi man ron hitakaw ag indi hisamad it sapat-sapat.

Lucas 14:14

Kon ruyon ro imong obrahon hay pakamaayuhon ka it Dyos ay indi ron sanda kabaeos kimo. Baeusan ka it Dyos pag-abot it adlaw nga mabanhaw ro mga matarong nga mga tawo.”

Lucas 16:11

Ngani kon indi kamo masaligan it manggad iya sa kalibutan nga indi masaligan ag indi magdurar, indi man kinyo ikasalig it Dyos ro minatuod nga manggad.

Lucas 16:13

Owa it ulipon nga makaserbi it dungan sa daywang ka amo. Tungod ro matabo hay ana nga kaugtan ro sambilog ag higugmaon ro isaea o ana nga apinan ro sambilog ag baliwalaon ro isaea. Indi kamo puyding magserbi sa Dyos it husto ag paeabihon man ninyo ro pagmanggad.”

Lucas 16:4

A, huo! Sayod ko eon kon ano rang obrahon agod kon hipahalin eon ako sa ang pagkaadministrador hay may mga amigo pa gihapon ako nga gapaistar kakon sa andang baeay.’

Mga Binuhatan 10:31

Sinana kakon, Cornelius, ro imo mana nga pangamuyo hay ginpamatian it Dyos ag owa nana ginakalipati ro imong pagbinulig sa mga ginakueang.

Mga Binuhatan 10:4

Hinadlukan si Cornelius pagtueok nana sa anghel. Nagsabat dayon imaw, “Ano kunta, sir?” Nagsabat ro anghel, “Nalipay gid kimo ro Dyos ag owa nana ginakalipati ro imong mga pangamuyo, ag ro imong pagbinulig sa mga ginakueang.

2 Corinto 4:17

Ro among ginaagihan nga kalisod makaron hay owa sa kumaingking kon ikompara sa kon ano ro atong mabaton sa ulihi. Ro mga kalisod abi ngaron hay magaresulta sa sobrang kanami nga kahimtangan sa eangit nga indi matupungan ag owa it katapusan.