Juan 8:44 - Inkeanon

⁴⁴ Si Satanas ro inyong ama, ngani naila kamo magtuman sa anang gusto. Halin pa ku umpisa hay manogpatay eon imaw ag ginakaugtan nana ro kamatuuran, ay maeayo ro kamatuuran sa anang kabubut-on. Kon gapinuril ngani imaw hay suno gid-a ron sa anang kinaiya, ay purilon imaw ag imaw man ro ginahalinan it tanan nga kapurilan.

Juan 8:44 Iomraidhean Croise

Mateo 12:34

Mga tuso gid-a kamo pareho it sawa! Paalin abi kamo makahambae it mga mayad ay mga maeaot kamo? Kon ano ro una sa kabubut-on hay imaw man ro nagaguwa sa ba-ba.

Mateo 13:15

Makaruyon eon ro mga tawo ngara tungod nangin bundoe sanda. Bungoe eon sanda ag piyong ro andang mata. Indi gid sanda magtueok ag magpamati dahil owa sanda naila makaeubot ag magdangop kakon agod hipamayad ko sanda.’

Mateo 13:38

Ro kahueugan ku taeamnan hay ro mga tawo iya sa kalibutan. Ro manami nga binhi hay ro mga sinakpan it Dyos ag ro mga hilamunon hay ro mga sinakpan ni Satanas, ro ginahalinan it kaeainan.

Juan 6:70

Naghambae dayon si Jesus, “Bukon abi nga ako't-a ro nagpili kinyo nga dose? Pero ro sambilog kinyo hay ulipon ni Satanas.”

Juan 7:17

Masayran gid ku tawo nga gustong magsunod sa pagbuot it Dyos kon ro akong ginaturo hay akon-akon eang o halin sa Dyos.

Juan 8:38

Ginahambae ko kon ano ro akon nga hakita tag idto ako sa akon nga Ama, ag kamo ma't-a, ro inyong ginatuman hay kon ano ro inyong habatian sa inyong ama.”

Juan 8:41

Ro inyong mga ginaobra hay pareho man sa mga ginaobra ku inyong ama.” Nagsabat sanda, “Bukon 't-a kami it mga bastardo. Ro Dyos eang ro among matuod nga Ama.”

Juan 8:55

Owa ninyo imaw makilaea pero kilaea ko't-a imaw. Kon maghambae ako nga owa ko imaw hakilaea hay pareho eon dayon ako kinyo nga purilon. Kilaea ko gid-a imaw ag ginatuman ko ro anang ginahambae.

Mga Binuhatan 13:10

“Makay Satanas ka gid! Puro eang pagpangluko ag kaeainan ro imong ginahimo! Ginakuntra mo bisan ano nga matarong! Hay, indi ka gid magpundo sa pagbinaliskad ku kamatuuran nga halin sa Ginuong Dyos?

Mga Binuhatan 24:9

Nagtibyog gid kay Tertulus ro anang mga kaibahan nga mga Judio sa ana ngatong mga gin-akusar kay Pablo. Nagkompormi sanda nga matuod ro anang mga ginhambae ngato.

Mga Binuhatan 5:3

Pero ginhambae imaw ni Pedro, “Ananias, ham-an it ginsugtan mo si Satanas nga gamhan ro imong paino-ino nga nagpinuril ka't-ing ku kabakeanan ku imong eugta, ay ginbuhinan mo ra bago mo gindaea iya? Pero ro matuod 't-a hay sa Espirito Santo ka't-ing nagpinuril!

2 Corinto 11:3

Nahadlok ako nga dahil sa inyong pagpati sa pinuril hay basi talikdan ninyo ro inyong sinsiro ag putli nga paghigugma ag pagtuo kay Kristo. Pareho eon dayon kamo kay Eva kato nga hapataeang ku katuso it sawa.

1 Pedro 5:8

Pugngi ro inyong kaugalingon ag mangin alisto permi ay ro inyong kaaway nga si Satanas hay pareho it naganginueob nga liyon nga nagalinibot ag nagainusoy it anang maeapa-eapa.

2 Pedro 2:4

Sigurado gid ron, tungod owa ngani nana pagpataliwana ro saea ku mga anghel kato kundi ana sanda nga tinagbong sa kadudueman nga mamingaw sa impyerno, kon siin mat kinadinahan sanda idto hasta sa adlaw nga sintinsyahan sanda ag pinahan.

1 Juan 1:8

Kon maghambae kita nga owa kita it saea hay ginaluko eang naton ro atong kaugalingon, tungod owa gid nakatanom sa atong paino-ino ro kamatuuran nga ginpahayag it Dyos parti sa saea.

1 Juan 2:21

Ngani nagasueat ako kinyo, bukon it dahil nga owa kamo nakasayod ku matuod nga mensahi kundi dahil nga hasayran ron ninyo, ag tungod sayod man kamo nga owa it kapurilan nga gahalin sa matuod nga mensahi.

1 Juan 2:4

Ngani ro bisan sin-o nga nagahambae nga nakakilaea gid imaw sa Dyos, pero owa man nagatuman sa anang mga kasuguan hay purilon, ag ro makaruyon nga tawo hay owa gid nakatanom sa anang paino-ino ro kamatuuran nga ginpahayag it Dyos.

1 Juan 3:12

Indi naton pagtuearon si Cain nga nagpagahom kay Satanas, ro ginahalinan it kaeainan, tag anang ginpatay nga owa't kueukaeuoy ro anang igmanghod nga si Abel. Ham-an it ginpatay nana? Tungod ro ana mismong mga buhat hay maeain, ag ana nga ginakaugtan ro matarong nga buhat ku anang igmanghod nga si Abel.

1 Juan 3:15

Ro nagakaugot sa anang igmanghod hay pareho it manogpatay, ag sayod naton nga ro manogpatay hay owa gid it bag-o nga kabuhi nga owa it katapusan.

Judas 1:6

Dumduma man ninyo ro mga anghel kato nga owa makuntento sa pwesto nga ginbutangan kanda it Dyos ngani naghalin sanda sa andang ilistaran. Mawron nga ginkadenahan sanda it Dyos it kadena nga indi mapaeos bisan hasta hin-uno, ag ginpriso sa kadudueman hasta mag-abot ro bukon it basta-basta nga Adlaw nga hukman sanda.

Pahayag 12:9

Ro kabahoe ngato nga dragon hay gineapog sa kalibutan pati ro anang mga kaapin nga mga anghel. Imaw man ra tag nagpakuno-kuno nga sawa kato anay, ag imaw man ro ginatawag nga Dyablo ukon Satanas. Halin pa kato hay ginapinataeang na eon ro mga tawo sa bilog nga kalibutan.

Pahayag 13:14

Ngani ana nga hapataeang ro mga tawo sa kalibutan paagi sa mga milagrosong pamatuod ngato nga ginsugtan nga obrahon nana sa pagpadungog sa primero nga sapat. Ana man nga ginsugo ro mga tawo nga mag-obra it rebulto ku sapat ngato nga nanina it grabi sa daga pero nakasalbar.

Pahayag 2:10

Ayaw gid kamo it kahadlok sa mga kalisdanan nga madali lang ninyo maagyan. Pamati kamo! Sa indi magbuhay, ipapriso ni Satanas ro iba kinyo agod testingan ro inyong pagtuo. Ro inyong pagkalisod hay magaeawig it napueong adlaw. Magpakalig-on kamo sa inyong pagtuo kakon bisan patyon pa kamo, ag premyuhan ko kamo it kabuhi nga owa it katapusan.

Pahayag 21:8

Pero ro mga mataeaw nga nagtalikod sa andang pagtuo dahil sa kahadlok nga magkalisod, ro mga indi magtuo, ro mga nagahimo it makangingil-ad, ro mga manogpatay, ro mga nagahulid sa bukon nanda it asawa, ro mga nagapangbarang, ro mga nagasimba sa mga diyos-diyos ag ro tanan nga mga purilon hay itapoe sa mga pinahan sa eawod nga nagadaba-daba ay may asupre rato nga nagakaeayo. Ruyon ro ginatawag nga ikaywa nga kamatayon.”

Pahayag 22:15

Pero indi makasueod idto ro mga may buhat nga matsa ana it sapat, ro mga nagapangbarang, ro mga nagahulid sa bukon nanda it asawa, ro mga manogpatay, ro mga nagasimba sa mga diyos-diyos, ag ro tanan nga mga naila magpangluko ag magpinuril.

Pahayag 9:11

May anda ra nga hari ag imaw man ra ro anghel nga nagadumaea sa buho nga owa't katapusan ro kadaeumon. Ro anang ngaean kon sa Hinebreo hay Abadon ag kon sa Griniyego hay Apolyon.