Juan 5:23 - Inkeanon

²³ Gin-obra nana ron agod ako nga Unga hay tahuron it tanan nga tawo, pareho ku andang pagtahod kana nga akong Ama. Ro owa nagatahod kakon nga Unga hay owa man nagatahod sa akong Ama nga nagpadaea kakon iya.”

Juan 5:23 Iomraidhean Croise

Mateo 10:37

Ro nagahigugma sa anang ginikanan it sobra pa sa anang paghigugma kakon hay indi bagay nga mangin sumueunod nakon. Ro nagahigugma sa anang unga it sobra pa sa anang paghigugma kakon hay bukon it bagay nga mangin sumueunod nakon.

Mateo 11:27

Pagkatapos ni Jesus it pangamuyo hay naghambae pa gid imaw, “Ro tanan-tanan hay gintugyan kakon ku akon nga Ama. Owa it nakakilaea gid sa Unga mageuwas sa Ama. Owa man it nakakilaea it mayad sa akong Ama kundi ako eang nga anang Unga ag ro bisan sin-o nga gusto nakon nga pakilaeahan kana kon mauno gid imaw.”

Mateo 12:21

Ro tanan nga rasa it tawo hay magasalig kana nga ana sanda nga euwason.”

Mateo 15:8

‘Ginapadunggan ako ku mga tawo ngara sa andang mga ginahambae, pero maeayo ro andang buot kakon.

Mateo 28:19

Ngani, panaw kamo ag tur-an ro tanan nga rasa it tawo kon paalin sanda magsunod kakon bilang akong mga sumueunod. Bawtismuhi sanda sa ngaean it Ama, Unga ag Espirito Santo.

Lucas 10:16

Naghambae pa gid si Jesus sa anang mga sumueunod, “Ro nagapamati kinyo hay sa minatuod, ako't-a ro andang ginapamatian. Ro owa nagabaton kinyo hay sa minatuod, ako't-a ro andang owa ginabatuna, ag ro owa nagabaton kakon hay sa minatuod, ro Dyos 't-a nga nagpaadto iya kakon ro owa nanda ginabatuna.”

Juan 14:1

Naghambae si Jesus, “Ayaw kamo it palitik kundi lig-una pa gid ro inyong pagsalig sa Dyos ag pati man kakon.

Juan 16:14

Ako ro anang pasidunggan tungod anang isugid kon ano ro akong gustong ipasayod pa gid kinyo.

Juan 17:10

Tanan ro akong mga katawhan hay imo man, ag ro imong mga katawhan hay akon man, ag ginadayaw eon ako dahil kanda.

Mga TagaRoma 1:7

Nagasueat ako kinyo tanan inha sa Roma nga mga palangga it Dyos nga anang gintawag ag ginpaeain agod mangin anang mga katawhan. Kabay pa nga masamitan pa gid ninyo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

Mga TagaRoma 15:12

Nagsueat man si Propeta Isaias it makaraya, “May matawo sa ulihi nga isaeang ka pinasahi sa inapo ni Jesse. Dumaeahan nana ro mga bukon it Judio. Dahil kana, sigurado sanda nga mayad ro andang kahimtangan sa ulihi.”

Mga TagaRoma 6:22

Pero makaron hay hilway eon kamo sa pagkaulipon it saea ag nangin ulipon eon kamo it Dyos. Ro inyong haganar karon hay nagapangabuhi kamo it balaan ag ro bunga karon hay kabuhi nga owa't katapusan.

Mga TagaRoma 8:9

Pero kamo't-a hay owa kamo nagapinagusto sa inyong makasasaea nga kinaiya kundi ginagamhan 't-a kamo ku Espirito Santo ay una imaw kinyo nagaistar. Pero ro tawo nga owa kana nagaistar ro Espirito Santo hay bukon it ay Kristo.

1 Corinto 1:3

Kabay pa nga masamitan pa gid ninyo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

1 Corinto 10:31

Ro sabat hay raya: tungod sa atong pagkaon o pag-inom o bisan ano ro atong ginaobra hay dapat himuon don naton tanan agod mapadunggan ro Dyos.

1 Corinto 16:22

Kabay pa nga pinahan it Ginuong Dyos hasta sa owa't katapusan ro owa nagahigugma sa Ginuo. Balik eon, Ginuo.

1 Corinto 6:19

Owa baea kamo kasayod nga ro inyong eawas hay templo nga ginaistaran it Espirito Santo nga gintao kinyo it Dyos? Bukon it inyo ro inyong eawas ngaron kundi ana't-a ron it Dyos

2 Corinto 1:9

Ag bisan ngani hasta makaron, ro among pamatyag hay mga sintinsyado it kamatayon. Pero mayad man rato agod indi kami magsalig sa among kaugalingon kundi sa Dyos nga nagabanhaw it patay.

2 Corinto 5:14

Ro paghigugma ni Kristo sa tanan nga tawo ro nagagahom kamon sa tanan namong ginahimo. Ro ebidensya ku gugma ngaron hay nga namatay imaw bilang sal-i it tanan, ngani ro anang kamatayon hay ginakabig nga kamatayon man it tanan nga tawo.

2 Corinto 5:19

Ginaturo namon ro mensahi nga paagi sa kamatayon ni Kristo hay nag-obra ro Dyos it paagi agod puydi nana hibilang nga owa eon it mga pageapas ro tawo kana. Daya ro mensahi nga gintugyan nana kamon nga ituro, agod magmayad ro andang relasyon sa Dyos.

Mga TagaEfeso 6:24

Kabay pa nga ro tanan nga nagahigugma sa atong Ginuong Jesu-Kristo it paghigugma nga owa nagakupas bisan hasta hin-uno hay masamitan pa gid ro sobrang kabuot it Dyos.

2 Timoteo 1:12

Ro pagpasayod man ku Mayad nga Balita ro rason nga nagaantos ako iya sa prisuhan. Pero owa ako nahuya nga iya ako ay sigurado ako nga masaligan gid ro akong ginasaligan. Ag kumbinsido man ako nga masarangan nanang amligan ro akong gintugyan kana hasta sa adlaw it paghukom.

Mga Hebreo 1:6

Ag tag inogpadaea eon it Dyos iya sa kalibutan ro anang owa it kapareho nga Unga hay naghambae imaw, “Dapat nga simbahon imaw ku tanan nakon nga mga anghel.”

2 Pedro 1:1

Raya nga sueat hay halin kakon nga si Simon Pedro, nga isaeang ka ulipon ni Jesu-Kristo ag isaea sa anang mga *apostoles. Nagasueat ako kinyo nga nagatuo man kay Jesu-Kristo nga atong Dyos ag Maneueuwas. Ag tungod nga matarong imaw ag owa it pinaeabi hay paeareho ro pagtuo nga gintao nana katon tanan.

2 Pedro 3:18

Padayuna ninyo ro pagkabuhi nga nagapalipay sa Dyos agod masamitan pa gid ninyo ro anang pagpakamaayo ag tinguhaa ninyo nga magdaeom pa gid ro inyong pagkakilaea sa atong Ginuo ag Maneueuwas nga si Jesu-Kristo. Dapat nga dayawon imaw halin makaron hasta sa owa it katapusan. Amen.

1 Juan 2:23

Tungod ro bisan sin-o nga owa nagabaton sa Unga it Dyos hay owa man it maeueot nga kaangtanan sa anang Ama, pero ro nagabaton sa Unga hay may maeueot man nga kaangtanan sa Dyos nga Ama.

2 Juan 1:9

Ro tanan nga owa nagapadayon sa pagsunod sa ginaturo ni Kristo, kundi nagaturo it sobra pa karon hay owa it maeueot nga kaangtanan sa Dyos. Pero ro nagapadayon sa pagsunod sa ginaturo ni Kristo hay may maeueot nga kaangtanan sa Dyos nga Ama, ag sa ana nga Unga.