Juan 3:2 - Inkeanon

² Isaeang gabii, nag-adto imaw kay Jesus ag naghambae, “*Rabbi, sayod kami nga ginpadaea ka it Dyos iya agod magturo kamon. Nakahambae ako kara dahil owa it makahimo ku mga milagroso nga pamatuod pareho sa imong mga ginahimo kon owa kana ro gahom it Dyos.”

Juan 3:2 Iomraidhean Croise

Mateo 22:16

Nagpadaea dayon sanda kay Jesus it andang mga sumueunod ag mga kaapin ni Haring Herodes. Nagpaeapit sanda kay Jesus ag naghambae, “Maestro, sayod namon nga matuod ro tanan nimong ginahambae. Owa ka man it ginasanto, ag imo nga ginaturo kon ano ro kamatuuran parti sa husto nga daean it pagpangabuhi nga gusto it Dyos, bisan mageain ma't-a ro buot it nagapamati.

Mateo 23:7

Kon sa kadagayaan hay naila man sanda nga pagsinaluduhan it mga tawo ag gusto man nanda nga tawgon nga ‘maestro.’

Mateo 23:8

“Pero kamo't-a hay indi puydi nga tawgon nga ‘maestro’ ay ako gid lang ro inyong maestro ag bilang magmaeanghod sa pagtuo hay owa it bisan sin-o kinyo nga eabaw pa sa iba.

Marcos 12:14

Nagpaeapit sanda kana ag naghambae, “Maestro, sayod namon nga matuod ro tanan nimong ginahambae. Owa ka man it ginasanto, ag imo nga ginaturo kon ano ro kamatuuran parti sa husto nga daean it pagpangabuhi nga gusto it Dyos, bisan mageain ma't-a ro buot it nagapamati. Mangutana kunta kami kimo. Eapas baea sa Kasuguan natong mga Judio kon magbayad kita it buhis sa Emperador it Roma o bukon? Dapat baea kita nga magbayad o indi?”

Juan 1:38

Naglingot si Jesus ag nakita nana nga nagasunod kana ro daywa. Ginpangutana nana sanda, “Ano kunta?” Nagsabat sanda nga daywa, “Rabbi, siin ka gatenir?” (Ro kahueugan it “rabbi” hay “maestro.”)

Juan 10:38

Pero dahil nagaobra't-a ako ku mga bagay ngaron, maskin indi kamo magpati sa akong ginahambae, patihi lang ninyo ro mga makangawa-ngawa nakong ginaobra. Ag paagi karon hay masayran ninyo ag maeubtan nga ako ag ro akong Ama hay may maeueot gid nga kaangtanan nga matsa sambilog eang kami.”

Juan 12:37

Bisan kaabo eon ro ginpakita ni Jesus nga mga milagrosong pamatuod sa atubang it mga tawo hay owa gihapon sanda nagtuo kana.

Juan 14:10

Owa ka pa baea gapati nga ako ag ro akong Ama hay may maeueot gid nga kaangtanan nga matsa sambilog eang kami? Ro mga ginasugid ko kinyo hay bukon it akon-akon eang. Kon nagahambae ako, ag nagahimo it mga makangawa-ngawa nga mga butang, ro akon 't-a nga Ama ro nagahimo karon paagi kakon.

Juan 15:24

Ag kon owa ako nag-obra sa anda mismo nga atubang it mga makangawa-ngawa nga owa it bisan sin-o nga makahimo mageuwas kakon hay owa sanda it saeabton sa andang saea nga owa sanda nagtuo kakon. Pero makaron nga hakita eon nanda ro akong mga gin-obra hay ginakaugtan gihapon nanda kami ku akon nga Ama.

Juan 2:11

Ratong primero nga milagroso nga pamatuod kon sin-o gid imaw hay ginhimo ni Jesus sa banwa it Cana idto sa Galilea. Paagi dikato hay ana nga ginpahayag ro anang eangitnon nga pagkadaeayawon, ngani nagtuo gid kana ro anang mga sumueunod.

Juan 20:16

“Maria,” hambae ni Jesus. Pagkabati kara ni Maria hay nagbalikid imaw kay Jesus ag naghambae sa andang linggwahe, “Rabboni!” (Ro kahueugan kara hay “Maestro.”)

Juan 3:26

Pagkatapos, nag-adto ro mga sumueunod ngato ni Juan kana ag naghambae, “*Rabbi, tag ratong imong ginpakilaea sa mga tawo kon sin-o gid imaw, tag nakaibahan mo anay sa tabok it suba it Jordan hay hato't-a, nagapangbawtismo man. Ag idto't-a pa man nagainadto kana ro tanan nga tawo!”

Juan 4:31

Idto ma't-a sa may bubon, ginahinambae si Jesus ku anang mga sumueunod, “*Rabbi, kaon eon.”

Juan 5:36

Pero may pagpamatuod parti kakon nga mas pa sa pagpamatuod ngato ni Juan. Ruyon hay ro akong mga ginahimo nga ginpaobra kakon ku akong Ama, nga dapat ko nga tapuson. Nagapamatuod ron sanda nga ro Ama gid ro nagpadaea iya kakon.

Juan 6:2

Kaabo-abo nga tawo ro nagsinunod kana ay hakita abi nanda ro mga milagrosong pamatuod nga anang ginaobra sa pagpamayad it mga masakiton.

Juan 7:31

Pero abo gihapon ro nagtuo kana sa kaabuon ngato nga mga tawo ag naghambae sanda, “Imaw gid-a ro matuod nga Maneueuwas nga ginpromisa it Dyos tungod kon bukon it imaw ra hay may maabot pa baea nga makahimo it mas abo pa nga milagrosong pamatuod kaysa kana?”

Juan 9:16

Ngani naghambae ro ibang Pariseo, “Ro nag-obra kara hay bukon it ginpadaea iya it Dyos, ay ginaeapas nana ro kasuguan parti sa Adlaw it Inogpahuway.” Pero ro iba ma't-a hay naghambae, “Huo ngani, pero makahimo baea ro makasasaea it mga milagrosong pamatuod nga makaraya?” Ngani owa sanda nagkaeasugot.

Mga Binuhatan 10:38

Habalitaan man siguro ninyo nga si Jesus nga tagaNazaret hay gintaw-an it Dyos it gahom paagi sa Espirito Santo nga una kana. Naglinibot imaw nga nagahimo it mayad, ag nagapamayad it mga ginapakalisdan ni Satanas. Nahimo ron nana dahil kaibahan nana permi ro Dyos.

Mga Binuhatan 2:22

Naghambae pa gid si Pedro, “Mga kadugo ko nga mga inapo ni Israel, pamati kamo sa akong ihambae ngara. Si Jesus nga tagaNazaret hay ginpadaea iya it Dyos. Ginpamatud-an ra kinyo it Dyos paagi sa mga makangawa-ngawa nga milagro ag mga milagrosong pamatuod nga anang gin-obra paagi kay Jesus. Sayod kamo kara ay iya ron nagkaeanabo kinyo.

Mga TagaFilipos 1:14

Ag bangod man sa akong pagkapriso hay nagbaskog pa gid ro pagsalig sa Ginuo ku kaeabanan natong mga kaigmanghuran sa pagtuo iya. Ngani nga owa eon sanda it kahadlok kundi nag-isog pa gid sanda sa pagsugid ku mensahi parti kay Kristo.