Juan 3:18 - Inkeanon

¹⁸ Ngani ro tanan nga nagatuo kana hay indi eon gid pagsintinsyahan nga pinahan, pero ro mga owa nagatuo hay ginsintinsyahan eo't-a nga pinahan dahil owa sanda magtuo sa Unga it Dyos nga Owa't Kapareho.

Juan 3:18 Iomraidhean Croise

Marcos 16:16

Ro bisan sin-o nga magpati ag mabawtismuhan hay maeuwas. Pero ro indi magpati hay pagakondenahon.

Juan 1:12

Pero ro tanan nga nagbaton ag nagtuo kana hay gintaw-an nana it kinamatarong nga mangin unga it Dyos.

Juan 1:18

Owa gid it tawo nga nakakita sa Dyos mismo. Pero may nagpaathag sa mga tawo parti kana. Ruyon hay ro Owa't Kapareho nga Unga it Dyos, imaw nga may maeueot gid nga kaangtanan sa Dyos nga anang Ama.

Juan 20:31

Pero ro mga gintapoe ma't-a ngara dikara hay ginsueat agod magpati kamo nga si Jesus hay imaw ro Maneueuwas nga ginpromisa it Dyos, ag imaw ro Unga it Dyos. Ag tungod sa inyong pagtuo kana hay magakabuhi kamo hasta sa owa it katapusan, paagi sa inyong maeueot nga kaangtanan kana.

Juan 3:16

“Matuod ron ay makaraya kabahoe ro paghigugma it Dyos sa mga tawo iya sa kalibutan nga ana nga gintao ro anang Unga, ro Owa't Kapareho, agod mangin sakripisyo agod ro tanan nga magatuo kana hay indi mapaimpyerno kundi may kabuhi nga owa it katapusan.

Juan 3:36

Ro nagatuo sa Unga hay may kabuhi nga owa it katapusan. Pero ro indi magtuo kana hay indi gid makasamit ku ruyon nga kabuhi, kundi makasamit ku pina it Dyos hasta sa owa it katapusan.

Juan 5:24

Naghambae pa gid si Jesus, “Matuod gid rang ginahambae kinyo nga ro nagapamati sa akong ginahambae ag nagatuo sa nagpadaea iya kakon hay may kabuhi nga owa it katapusan. Indi imaw pagasintinsyahan it kamatayon nga owa it katapusan, dahil gintaw-an eon imaw it kabuhi nga owa it katapusan.

Juan 6:40

Raya ro pagbuot ku akon nga Ama, nga ro tanan nga nagakilaea ag nagatuo kakon nga anang Unga hay may kabuhi nga owa it katapusan. Ag banhawon ko sanda sa katapusan nga adlaw.”

Juan 6:47

Matuod gid rang ginahambae kinyo nga ro bisan sin-o nga nagatuo kakon hay may ana eon nga kabuhi nga owa it katapusan.

Mga TagaRoma 5:1

Ngani dahil kita hay ginbilang eon nga matarong it Dyos paagi sa atong pagtuo, may aton eon nga paghidait sa Dyos dahil sa ginhimo ku atong Ginuo nga si Jesu-Kristo.

Mga TagaRoma 8:1

Ngani ro may maeueot nga kaangtanan kay Kristo Jesus hay indi eon pagsintinsyahan nga pinahan bisan hasta hin-uno.

Mga Hebreo 12:25

Ngani mag-andam kamo nga indi magpabungoe-bungoe sa ginahambae it Dyos kinyo. Ro mga tawo abi kato anay nga nagpabungoe-bungoe sa ginhambae it Dyos halin sa bukid it Sinai iya sa kalibutan hay owa nakalikaw sa pina. Kon makaruyon hay mas kapin gid nga indi kita makalikaw sa pina kon pabungoe-bungoean ta man ro Dyos nga nagahambae katon halin sa eangit.

Mga Hebreo 2:3

Kon makaruyon nga ginpinahan sanda dahil owa sanda nagpati sa ginsugid it mga anghel, paalin kita makalibre sa pina kon baliwalaon naton ro ginsugid it Ginuo parti sa kaeuwasan nga owa it katupong? Ro Ginuo mismo ro hauna nga nagsugid kara, ag ro mga nakabati kana hay nagpamatuod katon nga matuod ro mensahi ngaron.

Mga Hebreo 3:19

Makita naton dikaron nga owa sanda nakasamit kato dahil indi sanda magtuo ag masalig sa Dyos.

1 Juan 3:23

Daya ro pinakapunto ku mga sugo it Dyos katon: dapat nga magtuo gid kita sa anang unga nga si Jesu-Kristo, ro dungganon nga Maneueuwas, ag dapat kita nga maghigugmaanan pareho ku sugo katon ni Jesu-Kristo.

1 Juan 4:9

Makaraya ro pagpakita it Dyos ku anang gugma katon: ana nga ginpadaea riya sa kalibutan ro anang unga nga owa't kapareho, agod paagi kana hay magakabuhi kita hasta sa owa it katapusan.

1 Juan 5:10

Ro nagapati nga si Jesu-Kristo hay Unga it Dyos hay makasiguro sa ana mismong kaugalingon nga ro anang ginapatihan hay matuod. Pero ro owa nagapati sa pamatuod nga ginahambae it Dyos nga Ama parti sa anang Unga hay ginaobra nana nga purilon ro Dyos.

1 Juan 5:12

Ngani ro may maeueot nga kaangtanan sa Unga it Dyos hay may kabuhi nga owa it katapusan, pero ro owa it maeueot nga kaangtanan sa Unga it Dyos hay owa ku kabuhi ngara.