Juan 16:27 - Inkeanon

²⁷ tungod ro Dyos Ama mismo hay nagahigugma kinyo. Ginahigugma nana kamo tungod ginahigugma ninyo ako, ag nagapati kamo nga naghalin gid ako kana.

Juan 16:27 Iomraidhean Croise

Mateo 10:37

Ro nagahigugma sa anang ginikanan it sobra pa sa anang paghigugma kakon hay indi bagay nga mangin sumueunod nakon. Ro nagahigugma sa anang unga it sobra pa sa anang paghigugma kakon hay bukon it bagay nga mangin sumueunod nakon.

Juan 14:21

Ro nagatanom ku akong mga sugo sa anang paino-ino, ag nagatuman karon hay ruyon ro nagahigugma kakon. Ag ro nagahigugma kakon hay higugmaon ku akon nga Ama. Higugmaon ko man imaw ag akon nga ipahayag kana kon sin-o gid ako.”

Juan 14:23

Nagsabat si Jesus, “Umanon ko rang ginhambae. Kon ginahigugma ako it sangka tawo hay tumanon nana ro akong hambae. Higugmaon imaw ku akon nga Ama ag kami ku Ama hay magaadto kana ag magaistar sa anang tagipusuon.

Juan 16:30

Sayod eon kami nga nakasayod ka ku tanan. Bisan ro mga pangutana nga una pa sa paino-ino it mga tawo hay sayod eon nimo, ngani owa eon it kinahangean nga ipangutana pa ron kimo. Mawron nga nagapati kami nga halin ka matuod sa Dyos.”

Juan 17:23

Maeueot gid ro akong kaangtanan kanda ag makaruyon man ro imong kaangtanan kakon, ngani kabay pa nga mangin malig-on ro andang paghiliugyon nga matsa sambilog eang sanda. Ag kon hikita ron it mga tawo iya sa kalibutan hay masayran nanda nga ginpadaea mo ako iya, ag ginahigugma mo ro mga tawo ngara pareho ku imong paghigugma kakon.

Juan 2:11

Ratong primero nga milagroso nga pamatuod kon sin-o gid imaw hay ginhimo ni Jesus sa banwa it Cana idto sa Galilea. Paagi dikato hay ana nga ginpahayag ro anang eangitnon nga pagkadaeayawon, ngani nagtuo gid kana ro anang mga sumueunod.

Juan 3:13

Owa it nakasayod parti sa mga butang sa eangit ay owa pa it nakaadto idto. Pero ako nga Unga it Tawo hay makasugid karon ay idto ako maghalin.

Juan 7:29

Pero ako't-a hay kilaea ko't-a imaw dahil idto ako kana naghalin, ag imaw man ro nagpadaea iya kakon.”

Juan 8:42

Nagsabat dayon si Jesus, “Kon matuod kamo nga mga unga it Dyos hay higugmaon kunta ninyo ako ay kana ako naghalin. Owa ako nag-adto iya nga akon-akon eang, kundi imaw ro nagpadaea iya kakon.

Mga TagaRoma 8:3

Indi kita mangin matarong sa panueok it Dyos paagi sa pagtuman sa anang Kasuguan dahil mas pa ro atong kaila sa pagpakasaea kaysa sa atong kaila sa pagtuman sa Kasuguan. Pero ro indi mahimo sa pagtuman sa Kasuguan hay nahimo 't-a it Dyos tag ginpaadto nana ro ana mismong unga iya sa kalibutan. Nagpakatawo imaw ag may eawas ag kinaiya it tawo nga pareho katon. Anang ginhaead ro anang eawas bilang sakripisyo agod imaw ro pinahan por dahil katon nga mga makasasaea.

1 Corinto 15:47

Ro hauna nga tawo nga si Adan hay halin iya sa kalibutan ay gintuga imaw halin sa eapok pero ro ulihi nga Adan nga si Kristo hay halin sa eangit.

1 Corinto 16:22

Kabay pa nga pinahan it Ginuong Dyos hasta sa owa't katapusan ro owa nagahigugma sa Ginuo. Balik eon, Ginuo.

2 Corinto 5:14

Ro paghigugma ni Kristo sa tanan nga tawo ro nagagahom kamon sa tanan namong ginahimo. Ro ebidensya ku gugma ngaron hay nga namatay imaw bilang sal-i it tanan, ngani ro anang kamatayon hay ginakabig nga kamatayon man it tanan nga tawo.

Mga TagaGalacia 4:4

Pero pag-abot it oras nga gintaeana it Dyos hay ginpaadto nana iya sa kalibutan ro anang unga. Tawo gid imaw tungod gin-unga imaw it isaeang ka bayi nga Judio, ag nagkabuhi imaw nga hasakpan ku andang Kasuguan.

Mga TagaEfeso 6:24

Kabay pa nga ro tanan nga nagahigugma sa atong Ginuong Jesu-Kristo it paghigugma nga owa nagakupas bisan hasta hin-uno hay masamitan pa gid ro sobrang kabuot it Dyos.

1 Timoteo 1:15

Masaligan ro haeambaeunon ngara, ag bagay gid nga patihan: Si Kristo Jesus hay nag-adto riya sa kalibutan agod euwason ro mga makasasaea. Ag ako gid ro pinakamaeaot kanda tanan.

Mga Hebreo 12:6

Ginadisiplina ko abi ro akong ginahigugma, ag ginapinahan ko ro ginabilang ko nga akong mga unga.”

1 Pedro 1:8

Owa pa ninyo hakita si Jesu-Kristo pero inyo imaw nga ginahigugma, ag bisan indi pa ninyo imaw hikita makaron hay nagatuo gihapon kamo kana. Ag owa it bisaea nga makalarawan ku inyong kalipay nga owa it katupong.

1 Juan 4:19

Nagahigugma kita ay ro Dyos ro unang naghigugma katon.

Pahayag 3:19

Ro akong mga ginapalangga hay akon nga ginasaway ag ginadisiplina. Ngani maghinuesoe kamo ag talikdi eon ninyo ro inyong pagkamaeabaab, ag magmangin mainit eon kamo sa pagsunod kakon.

Pahayag 3:9

Pamati kamo. May mga nagahambae inha nga mga katawhan kuno sanda it Dyos pero bukon, ay nagapinuril sanda ag ro minatuod hay mga katawhan sanda ni Satanas. Pero hueata eang ninyo ay paeudhon ko ron sanda sa inyong atubang, ag dikato nanda hisayran nga ginahigugma ko kamo.