Juan 15:7 - Inkeanon

⁷ Pero kon nagapadayon kamo sa inyong maeueot nga kaangtanan kakon ag padayon nga nakatanom sa inyong paino-ino ro akong hambae, pangayo kamo sa Ama it bisan ano nga inyong gusto, ag itao ron nana kinyo.

Juan 15:7 Iomraidhean Croise

Mateo 7:7

Naghambae pa gid si Jesus, “Magpangayo kamo permi sa Dyos ku inyong kinahangeanon ag itao nana ron kinyo. Usuya ninyo permi kon ano ro inyong kinawaea ag buligan kamo nana nga makita ron. Panuktok kamo permi sa anang pwertahan ag buksan nana ron para kinyo.

Juan 14:13

Ag bisan ano ro inyong pangayuon bilang mga sumueunod nakon hay himuon ko, agod dayawon ro Ama paagi kakon nga anang Unga.

Juan 15:16

Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon. Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean.

Juan 16:23

Sa ulihi hay bukon eon it ako ro inyong ginapangayuan. Matuod gid rang ginahambae kinyo nga bisan ano ro inyong pangayuon sa akong Ama sa akong ngaean hay itao ron nana kinyo.

Juan 8:31

Tapos hay naghambae si Jesus sa mga Judio ngato nga nagtuo kana, “Kon magpadayon kamo sa pagsunod sa akong ginaturo hay matuod gid nga mga sumueunod ko kamo.

Juan 8:37

Sayod ako nga mga inapo kamo ni Abraham, pero gusto gihapon ninyo ako nga patyon, ay owa gid-a ninyo gintanom sa inyong paino-ino ro akong ginahambae.

Mga TagaGalacia 4:2

Ham-an? Tungod may nagadikta pa kana kon ano ro anang obrahon ag may administrador sa anang manggad hasta nga mag-abot ro tama nga oras nga gintaeana ku anang ama nga puydi eon imaw nga magpatikang ku anang paeanublion.

Mga TagaGalacia 5:16

Raya pa ro akon nga mahambae kinyo. Magpasakop kamo permi sa pagkontrol ku Espirito Santo. Kon himuon ninyo ra hay indi eon dayon ninyo hipagustuhan ro inyong makasasaea nga kinaiya.

Mga TagaColosas 3:16

Itanom gid ninyo sa inyong paino-ino ro Mayad nga Balita parti kay Kristo. Gamita ro kaaeam nga gintao kinyo sa pagturo ag sa pageaygay sa kada isaea. Magkanta kamo it mga salmo ag mga sari-saring mga kaeantahon sa pagdayaw sa Dyos nga may hantop nga pagpasaeamat sa inyong tagipusuon.

1 Juan 2:14

Akon nga umanon ro akong ginhambae. Mga palangga nakon nga mga unga sa pagtuo, nagasueat ako kinyo tungod nakakilaea gid kamo sa Dyos nga atong Ama. Mga magueang, nagasueat ako kinyo ay nakakilaea gid kamo kana nga una eon bago pa gintuga ro bisan ano. Mga pamatan-on, nagasueat man ako kinyo tungod mga malig-on kamo sa inyong pagtuo, ag ro mensahi it Dyos hay nakatanom gid sa inyong paino-ino, ag haperdi ninyo ro ginahalinan it kaeainan.

1 Juan 2:27

Pero kamo hay gintaw-an eon ni Jesus it Espirito Santo, ag imaw hay nagakabuhi kaibahan ninyo. Ro Espirito Santo ro nagaturo kinyo ku tanan nga kinahangean ninyo nga masayran, ngani owa eon it kinahangean nga may iba pa nga magturo kinyo it dugang nga mga pagturo nga eain sa anang ginaturo. Matuod gid ro tanan nanang ginaturo, ag suno sa anang ginaturo ngaron, padayuna ninyo ro inyong maeueot nga kaangtanan kay Kristo.

1 Juan 3:22

Ag bisan ano ro aton nga ginapangayo kana hay aton nga mabaton, tungod ginatuman naton ro anang kasuguan ag ginahimo naton ro makapalipay kana.

1 Juan 5:14

ag maisog man ro atong buot nga magpangayo kana, ay sayod naton nga nagapamati imaw, ag ginatao nana ro atong ginapangayo kon ruyon hay suno sa anang pagbuot.