Juan 15:5 - Inkeanon

⁵ “Ako ro puno it ubas ag kamo ro mga sanga. Ro nagapadayon sa anang maeueot nga kaangtanan kakon, ag makaruyon man ro akong kaangtanan kana, ruyon ro gabunga it abo. Matuod ra dahil kon owa kamo nakaangot kakon hay indi gid kamo makapamunga.

Juan 15:5 Iomraidhean Croise

Mateo 13:21

Ugaling tungod owa nakagamot it mayad ro anang habatian hay owa man rato magbuhay sa anang paino-ino. Kon gakalisod eon ngani imaw o ginahingabot bangod sa anang pagbaton sa mensahi ngato hay nagatalikod dayon imaw sa ana ngatong ginbaton.

Juan 12:24

Matuod gid rang ginahambae kinyo nga kon ro binhi hay indi igtanom sa eapok hay indi ra maeunot ag indi magtubo ag makapamunga. Pero kon itanom ra ag maeunot hay magatubo dayon ra ag magapamunga it abo.

Juan 15:16

Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon. Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean.

Juan 5:19

Ngani naghambae si Jesus sa mga manogdumaea ngato, “Matuod gid rang ginahambae kinyo nga Ako nga Unga it Dyos hay indi puydi nga mag-obra it akon-akon eang kundi ro akon eang nga ginaobra hay kon ano ro akong hasayran nga gusto ku akong Ama nga obrahon. Ngani ro mga ginaobra it Dyos Ama hay anang ginaobra paagi kakon nga anang Unga.

Juan 9:33

Kon bukon it halin sa Dyos ro tawo ngara hay indi't-a imaw makahimo it makaraya.”

Mga Binuhatan 4:12

Owa eon kita it iba pang maagyan agod maeuwas kundi si Jesus eang, ay imaw eang sa bilog nga kalibutan ro gintao it Dyos nga dapat naton nga tuuhan agod maeuwas.”

Mga TagaRoma 12:5

Makaruyon man katon nga mga tumueuo. Bisan abo kita hay matsa sambilog man lang kita dahil nagaaeangot kita tanan kay Kristo ag nagaaeangot man kita tanan sa kada isaea.

Mga TagaRoma 6:22

Pero makaron hay hilway eon kamo sa pagkaulipon it saea ag nangin ulipon eon kamo it Dyos. Ro inyong haganar karon hay nagapangabuhi kamo it balaan ag ro bunga karon hay kabuhi nga owa't katapusan.

Mga TagaRoma 7:4

Makaruyon man kamo, mga igmanghod ko. Ro Kasuguan hay matsa inyo anay nga asawa ugaling tag namatay si Kristo hay pareho man nga namatay kamo kaibahan nana ngani hilway eon kamo sa obligasyon nga magtuman sa Kasuguan agod maeuwas. Natabo ra agod may inyo eon nga bag-ong asawa ag ruyon hay si Kristo nga ginbanhaw. Ngani imaw ro atong tumanon agod magbunga it mayad ro atong kabuhi para sa kadayawan it Dyos.

1 Corinto 10:16

Sa aton nga pagtililipon sa pagdumdum ku kamatayon ni Kristo sa krus, kon magpasaeamat kita sa Dyos sa atong ginainom ag kon aton man nga ginakaon ro ginpihak-pihak nga tinapay hay bukon baea it nagaambit kita ku mga pagpakamaayo nga halin sa dugo ag eawas ni Kristo nga anang ginsakripisyo para katon?

1 Corinto 12:12

Ro eawas it tawo hay abo nga parti pero sangka eawas man lang. Makaruyon man si Kristo ag ro mga nagatuo kana.

1 Corinto 12:27

Ruyon ngaron hay kahalimbawa naton nga mga tumueuo. Kita ro pinakaeawas ni Kristo ag ro kada isaea kinyo hay parti man karon.

2 Corinto 13:8

Owa eon abi it kinahangean nga disiplinahon kamo kon nagpundo eon kamo sa paghimo it maeain, pero kon owa gihapon hay dapat nga disiplinahon gid-a kamo. Bukon 't-a abi it mayad nga mag-obra kami it owa nagaayon sa kamatuuran halin sa Dyos dahil ro amon't-a nga obra hay dapat nagaayon gid-a permi sa kamatuuran.

2 Corinto 9:10

Nagatao ro Dyos it binhi sa manogtanom ag ginapatubo na ra agod mangin pagkaon. Sa makaruyon man nga paagi, taw-an nana kamo it sobra sa inyong kinahangean agod may inyong ikatao sa iba nga pareho it pagtanom. Ag ro resulta karon hay padayon nga paabuon it Dyos ro inyong binhi nga ginatanom agod ro tubas ku inyong matarong nga buhat hay bugana gid.

Mga TagaGalacia 5:22

Pero kon ginagiyahan kita ku Espirito Santo, makaraya ro bunga karon sa atong kabuhi: kita hay mahigugmaon, malipayon, may katawhayan, mapinasensyahon, mabuot, mayad magtratar sa isigkatawo, masaligan,

Mga TagaEfeso 5:9

ay ro batasan ku mga sa kahayag eon hay mabuot, matarong ag owa nagapakuno-kuno.

Mga TagaFilipos 1:11

Ag sa adlaw ngaron hay makita nga ro bunga ku inyong pagtuo kay Jesu-Kristo hay kabuhi nga matarong gid, ag pagapadunggan ro Dyos ag pagakilan-on ro anang pagkadaeayawon.

Mga TagaFilipos 4:13

Masarangan nakon nga atubadngon ro tanan nga matabo tungod sa akong maeueot nga kaangtanan kay Kristo nga nagapabaskog kakon.

Mga TagaFilipos 4:17

Ginasambit ko ra bukon it dahil gusto ko eang nga regaluhan, kundi gusto ko nga tungod sa inyong padayon nga pagtao kakon hay dugangan pa gid it Dyos ro premyo nga anang ginatigana kinyo.

Mga TagaColosas 1:10

Dahil kon itugot nana ra, magakabuhi kamo nga bagay sa mga sumueunod it Ginuo ag ro tanan ninyo nga ginaobra hay makapalipay kana. Ginapangamuyo man namon nga makahimo kamo permi it tanan nga mayad nga buhat, ag makilaea pa gid ninyo it mayad ro Dyos.

Mga TagaColosas 1:6

Rayang mensahi hay nagaeapnaag man sa bilog nga kalibutan. Bisan siin ra makaabot hay nagadinugang pa gid ro nagatuo kara, ag nagabag-o ro kabuhi ku mga nagatuo pareho man sa natabo inha kinyo. Halin ku pagkabati ninyo ku Mayad nga Balita hay inyo nga haeubtan it mayad kon ano gid ro sobrang kabuot it Dyos nga anang ginpakita pageuwas nana kinyo.

Santiago 1:17

tungod ro tanan nga halin sa Dyos nga ginatao nana katon hay mayad ag owa gid it bisan anong maeain. Imaw ro Ama nga nagtuga ku adlaw, buean ag mga bituon. Nagatiniyog ra sanda ngani ro hayag nga nagahalin kanda hay nagaeain-eain man. Kon amat hay hasasalipdan ngani nagasaeom man o kundi hay nagadueom gid. Pero ro Dyos hay bukon it makaruyon. Owa gid imaw nagaeain ag owa gid it makaabang sa anang pagpakamaayo katon.

1 Pedro 2:4

Buhi gid si Kristo ag ginahalimbawa imaw sa sinilsil nga bato nga ginagamit sa pundasyon it bilding. Ginbilang imaw nga owa it pueos it mga tawo, pero imaw ro pinili it Dyos ag mahaega sa anang panueok. Ag samtang nagapaeapit kamo kay Kristo,

2 Pedro 3:18

Padayuna ninyo ro pagkabuhi nga nagapalipay sa Dyos agod masamitan pa gid ninyo ro anang pagpakamaayo ag tinguhaa ninyo nga magdaeom pa gid ro inyong pagkakilaea sa atong Ginuo ag Maneueuwas nga si Jesu-Kristo. Dapat nga dayawon imaw halin makaron hasta sa owa it katapusan. Amen.