Juan 15:24 - Inkeanon

²⁴ Ag kon owa ako nag-obra sa anda mismo nga atubang it mga makangawa-ngawa nga owa it bisan sin-o nga makahimo mageuwas kakon hay owa sanda it saeabton sa andang saea nga owa sanda nagtuo kakon. Pero makaron nga hakita eon nanda ro akong mga gin-obra hay ginakaugtan gihapon nanda kami ku akon nga Ama.

Juan 15:24 Iomraidhean Croise

Mateo 11:5

Sugiri imaw nga nakakita eon ro mga bulag, nakatikang eon ro mga eupog, nagmayad eon ro mga aruon, nakabati eon ro mga bungoe, nabanhaw ro mga patay, ag ginawali sa mga kubos ro Mayad nga Balita.

Mateo 21:32

Bangod tag nag-adto riya si Juan nga Manogbawtismo ag nagturo kon mauno ro pagpangabuhi it matarong hay owa kamo magtalikod sa inyong mga saea ag magpati kana. Pero nagpati kana ro mga *manogsukot it buhis ag ro mga maeain nga bayi. Bisan hakita eon ron ninyo hay owa gihapon kamo nagpati kay Juan.”

Mateo 9:33

Ginsuboe ni Jesus ro demonyo ngato ag nakahambae eon dayon kat ratong tawo. Hangawa gid ro kaabo nga mga tawo nga nakabati ku natabo ag sinanda, “Aba! Owa pa gid 't-a it makaraya nga natabo sa bilog nga nasyon naton it Israel!”

Marcos 2:12

Bumangon eagi ra sa atubang it mga tawo, hinakwat ro ana nga eugban ag gumuwa sa baeay. Hangawa gid it duro ro tanan ag gindayaw nanda ro Dyos. “Imaw pa eang kami nakakita it makaraya,” hambae nanda.

Lucas 24:19

Naghambae si Jesus, “Anong mga natabo?” Nagsabat sanda, “Ro mga natabo kay Jesus nga tagaNazaret. Ginpamatud-an it Dyos sa mga tawo nga gamhanan imaw nga propeta paagi sa anang mga gin-obra ag ginhambae.

Juan 10:32

Ngani naghambae imaw kanda, “Abo nga kamaeayran ro ginpaobra kakon ku akon nga Ama ag hakita ron ninyo. Ano sa akong mga gin-obra ngato ro dahilan agod inyo ako nga eapugon it bato?”

Juan 10:37

Kon owa ako nagaobra it mga makangawa-ngawa nga bagay nga gintugyan kakon ku akong Ama hay ayaw 't-a ugaling ninyo ako pagpatihi.

Juan 12:10

Ngani nagkaeasugot ro mga pinuno it mga saserdote nga patyon man pati si Lazarus,

Juan 12:45

Ro nakakita kakon hay nakakita man sa nagpadaea iya kakon.

Juan 14:9

Nagsabat si Jesus, “Felipe, mabuhay eon ro akong pag-iniba kinyo ag owa ka't-ing gihapon kakilaea kakon? Ro nakakita kakon hay nakakita man sa akong Ama. Ham-an it gahambae ka pa nga ipakita ko kinyo ro akong Ama?

Juan 15:21

Pero himuon nanda ro tanan ngaron nga mga paghingabot kinyo dahil nagatuo kamo kakon, ag tungod saea ro andang pagkakilaea sa Dyos nga nagpadaea iya kakon.

Juan 15:22

Kon owa ako nag-adto iya agod sugiran sanda parti kakon hay owa kunta sanda it saeabton sa andang saea nga owa sanda nagtuo kakon. Pero owa eon sanda makaron it bangdanan sa anda ngaron nga saea kakon.

Juan 15:23

Ro naugot kakon hay naugot man sa Ama.

Juan 16:9

Ro akong buot hambaeon hay pamatud-an nana nga saea gid-a nga owa sanda nagatuo kakon.

Juan 3:2

Isaeang gabii, nag-adto imaw kay Jesus ag naghambae, “*Rabbi, sayod kami nga ginpadaea ka it Dyos iya agod magturo kamon. Nakahambae ako kara dahil owa it makahimo ku mga milagroso nga pamatuod pareho sa imong mga ginahimo kon owa kana ro gahom it Dyos.”

Juan 5:36

Pero may pagpamatuod parti kakon nga mas pa sa pagpamatuod ngato ni Juan. Ruyon hay ro akong mga ginahimo nga ginpaobra kakon ku akong Ama, nga dapat ko nga tapuson. Nagapamatuod ron sanda nga ro Ama gid ro nagpadaea iya kakon.

Juan 6:36

Pero bisan hakita eon ninyo ako hay owa man gihapon kamo gatuo kakon ag ginhambaean ko eon kamo karon.

Juan 7:31

Pero abo gihapon ro nagtuo kana sa kaabuon ngato nga mga tawo ag naghambae sanda, “Imaw gid-a ro matuod nga Maneueuwas nga ginpromisa it Dyos tungod kon bukon it imaw ra hay may maabot pa baea nga makahimo it mas abo pa nga milagrosong pamatuod kaysa kana?”

Juan 9:32

Umpisa ku pagtuga it kalibutan hay owa pa gid it ginbalita nga may nakapamayad it natawo nga bulag.

Juan 9:41

Nagsabat si Jesus, “Kon gaako eang kunta kamo nga kueang ro inyong pagkaeubot karon hay mahimo pa nga patawaron ro inyong mga saea. Ugaling sininyo abi hay nakaeubot kamo it husto ag indi eon kamo magpaturo, ngani indi gid pagpatawaron ro inyong mga saea.”

Mga Binuhatan 10:38

Habalitaan man siguro ninyo nga si Jesus nga tagaNazaret hay gintaw-an it Dyos it gahom paagi sa Espirito Santo nga una kana. Naglinibot imaw nga nagahimo it mayad, ag nagapamayad it mga ginapakalisdan ni Satanas. Nahimo ron nana dahil kaibahan nana permi ro Dyos.

Mga Binuhatan 2:22

Naghambae pa gid si Pedro, “Mga kadugo ko nga mga inapo ni Israel, pamati kamo sa akong ihambae ngara. Si Jesus nga tagaNazaret hay ginpadaea iya it Dyos. Ginpamatud-an ra kinyo it Dyos paagi sa mga makangawa-ngawa nga milagro ag mga milagrosong pamatuod nga anang gin-obra paagi kay Jesus. Sayod kamo kara ay iya ron nagkaeanabo kinyo.

Mga TagaRoma 1:30

Mga paealibak sanda, grabi ro andang kaugot sa Dyos ag mapintas sa andang isigkatawo. Mga matinaas-taason sanda, mga bugaeon, mga manog-imbento it mga kaeainan nga owa pa haobra it iba ag bukon it masinueundon sa ginikanan.

2 Timoteo 3:4

traidor, daso-daso, sobra it taas ro andang pagdumdum sa andang kaugalingon, ag mailaon it duro sa pagkinalipay imbis nga mahigugmaon sa Dyos.

Santiago 4:4

Pareho kamo it bayi nga gapangawatan ay naila pa't-a kamo sa mga butang iya sa kalibutan! Owa baea kamo kasayod nga ginakuntra ninyo ro Dyos kon nailaan ninyo ro mga butang iya sa kalibutan nga kuntra nana? Ngani kon sin-o ro naila sa mga kalibutanon nga buhat nga kuntra it Dyos hay ginaobra nana mismo ro anang kaugalingon nga kaaway it Dyos.