Juan 15:19 - Inkeanon

¹⁹ Kon pareho kamo kanda nga owa nagatuo kakon hay mailaan 't-a nanda kamo ay paeareho abi kamo. Pero bukon kamo it pareho kanda ay ginpili ko kamo agod bukon eon kamo it kaibahan ku mga owa nagatuo kakon. Mawron nga ginakaugtan nanda kamo.

Juan 15:19 Iomraidhean Croise

Mateo 10:22

Kaugtan kamo it tanan nga mga tawo tungod sumueunod nakon kamo. Pero ro nagapadayon nga nagatuo kakon hasta sa kamatayon hay may kabuhi nga owa it katapusan sa eangit.

Mateo 24:9

“Sa ulihi, pagakaugtan kamo ku tanan nga mga tawo bangod mga sumueunod nakon kamo. Pagadakpon kamo ag itugyan sa mga magapasakit ag magapatay kinyo.

Lucas 6:32

Ham-an gid abi it dayawon kamo kon ro inyo eang nga ginahigugma hay ro mga nagahigugma man kinyo? Bisan ngani ro mga makasasaea hay nagahigugma man sa mga nagahigugma kanda.

Juan 13:18

“Pero bukon it kamo tanan ro akong ginahambaean kara. Kilaea ko ro pagkatawo ku akong mga ginpili ag ro sambilog kinyo hay indi pagpakamaayuhon. Pero ginpili ko gihapon imaw agod matuman ro ginhambae sa Sagrado nga Kasueatan nga: ‘Ro nagasaeo sa akon nga pagkaon hay nagtraidor kakon.’

Juan 15:16

Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon. Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean.

Juan 6:70

Naghambae dayon si Jesus, “Bukon abi nga ako't-a ro nagpili kinyo nga dose? Pero ro sambilog kinyo hay ulipon ni Satanas.”

Santiago 4:4

Pareho kamo it bayi nga gapangawatan ay naila pa't-a kamo sa mga butang iya sa kalibutan! Owa baea kamo kasayod nga ginakuntra ninyo ro Dyos kon nailaan ninyo ro mga butang iya sa kalibutan nga kuntra nana? Ngani kon sin-o ro naila sa mga kalibutanon nga buhat nga kuntra it Dyos hay ginaobra nana mismo ro anang kaugalingon nga kaaway it Dyos.

1 Pedro 4:3

Tama eon ro oras nga inyo nga gin-amulitan kato sa inyong kabuhi sa pag-intra sa mga maeain nga ginahimo ku mga owa nagakilaea sa Dyos. Ro inyong ginaobra kato hay owa ninyo ginahawid-hawiri ro inyong kaueag, ginapagustuhan ninyo ro inyong mga maeain nga handom, gahinilong, gahilinadya nga owa it pugong-pugong ag puro eang ininom ag inueag nga buhat, ag nagasimba sa mga diyos-diyos nga nagabunga it paghimo it mga bagay nga makangingil-ad.

1 Juan 3:12

Indi naton pagtuearon si Cain nga nagpagahom kay Satanas, ro ginahalinan it kaeainan, tag anang ginpatay nga owa't kueukaeuoy ro anang igmanghod nga si Abel. Ham-an it ginpatay nana? Tungod ro ana mismong mga buhat hay maeain, ag ana nga ginakaugtan ro matarong nga buhat ku anang igmanghod nga si Abel.

Pahayag 12:17

Naakig gid it duro sa bayi ro dragon ngani pumanaw imaw agod girahon ro iba pa nga mga unga ku bayi ngato. Ro mga unga ku bayi hay tag rato nga mga nagatuman sa mga kasuguan it Dyos ag nagapadayon sa andang malig-on nga pagtuo sa mensahi parti kay Jesus.

Pahayag 12:9

Ro kabahoe ngato nga dragon hay gineapog sa kalibutan pati ro anang mga kaapin nga mga anghel. Imaw man ra tag nagpakuno-kuno nga sawa kato anay, ag imaw man ro ginatawag nga Dyablo ukon Satanas. Halin pa kato hay ginapinataeang na eon ro mga tawo sa bilog nga kalibutan.