Juan 15:16 - Inkeanon

¹⁶ Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon. Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean.

Juan 15:16 Iomraidhean Croise

Mateo 21:22

Bisan ano ro inyong pangayuon sa Dyos kon magpangamuyo kamo hay mabaton ron ninyo basta nagasalig gid kamo kana.”

Mateo 7:7

Naghambae pa gid si Jesus, “Magpangayo kamo permi sa Dyos ku inyong kinahangeanon ag itao nana ron kinyo. Usuya ninyo permi kon ano ro inyong kinawaea ag buligan kamo nana nga makita ron. Panuktok kamo permi sa anang pwertahan ag buksan nana ron para kinyo.

Lucas 6:13

Pagkaagahon kato, ginpatipon nana idto ro tanan nga mga nagasinunod kana. Nagpili dayon imaw kanda it dose nga anang gintawag nga mga *apostoles.

Juan 13:18

“Pero bukon it kamo tanan ro akong ginahambaean kara. Kilaea ko ro pagkatawo ku akong mga ginpili ag ro sambilog kinyo hay indi pagpakamaayuhon. Pero ginpili ko gihapon imaw agod matuman ro ginhambae sa Sagrado nga Kasueatan nga: ‘Ro nagasaeo sa akon nga pagkaon hay nagtraidor kakon.’

Juan 15:19

Kon pareho kamo kanda nga owa nagatuo kakon hay mailaan 't-a nanda kamo ay paeareho abi kamo. Pero bukon kamo it pareho kanda ay ginpili ko kamo agod bukon eon kamo it kaibahan ku mga owa nagatuo kakon. Mawron nga ginakaugtan nanda kamo.

Juan 15:5

“Ako ro puno it ubas ag kamo ro mga sanga. Ro nagapadayon sa anang maeueot nga kaangtanan kakon, ag makaruyon man ro akong kaangtanan kana, ruyon ro gabunga it abo. Matuod ra dahil kon owa kamo nakaangot kakon hay indi gid kamo makapamunga.

Juan 6:70

Naghambae dayon si Jesus, “Bukon abi nga ako't-a ro nagpili kinyo nga dose? Pero ro sambilog kinyo hay ulipon ni Satanas.”

Mga Binuhatan 1:24

Pagkatapos, nagpangamuyo sanda, “Ginuo, ikaw ro nakasayod ku kabubut-on it kada tawo, ngani ipakita kamon kon sin-o sa daywa ngara ro imong ginpili

Mga Binuhatan 1:8

Pero ro inyo't-a nga dapat masayran hay makabaton kamo it gahom kon magkunsad eon kinyo ro Espirito Santo. Ag paagi sa anang gahom hay magapamatuod kamo parti kakon iya sa Jerusalem, sa tanan nga lugar iya sa probinsya it Judea, sa Samaria ag pati sa pinakamaeayo nga mga lugar sa kalibutan.”

Mga Binuhatan 10:41

Owa imaw hakita it tanan nga tawo kundi kami eang nga kato pa't-a hay ginpili eon it Dyos nga mangin saksi ku mga butang ngara. Nagsaeo pa ngani kami kana sa pagkaon pagkabanhaw nana.

Mga Binuhatan 22:14

Naghambae dayon si Ananias kakon, ‘Ro Dyos ku atong mga kalolo-lolohan hay nagpili kimo kato pa nga makasayod ku anang pagbuot, ag makakita kana nga kon tawgon hay Ro Matarong, ag makabati ku anang limog,

Mga Binuhatan 9:15

Pero nagsabat kana ro Ginuo, “Panaw eon idto ay ginpili ko imaw nga akong gamiton sa pagwali parti kakon sa mga bukon it Judio, pati sa andang mga hari ag sa mga kadugo ninyo nga mga inapo ni Israel.

Mga TagaRoma 1:13

Mga igmanghod, gusto ko nga masayran ninyo nga kapilang beses eon nga nagplano ako nga magbisita kinyo ugaling hay permi akong ginapigaran bisan hasta makaron. Gusto ko kamo nga bisitahan dahil gusto ko nga tur-an kamo agod magbunga ron it mayad pareho ku natabo sa iba pang mga lugar nga ro kaeabanan hay bukon it *Judio pareho ku inyo.

Mga TagaRoma 1:5

Paagi kana hay gintaw-an kami it pribilihiyo nga mangin mga apostoles agod magsugid sa mga tawo sa tanan nga nasyon nga magtuo ag magtuman kana. Raya ngara tanan hay para sa anang kadayawan.

Mga TagaRoma 15:4

Tandai nga ro tanan nga nasueat sa Sagrado nga Kasueatan kato hay ginsueat agod tud-an kita. Dahil sa mga nasueat ngato hay nagaantigo kita nga magbatas it mga kalisod nga atong ginaagyan ag nagaisog ro atong buot, ag ro bunga karon hay sigurado kita nga mabaton naton sa ulihi ro ginpromisa it Dyos.

Mga TagaRoma 9:21

Bukon abi it may matarong ro manogkueon kon ano ro anang obrahon sa daga nga anang ginagamit sa pag-obra it kueon? Puydi nanang tungaon ro daga ag obrahon nga sadyaan nga kueon para sa espesyal nga okasyon ro sambilog ag puydi ma't-a nga pang-ordinaryo eang ro sambilog.

1 Corinto 10:11

Natabo kanda ro mga butang ngaron agod mangin ehemplo kon ano ro dangaton ku mga nagahimo it mga makaruyon. Ag ginsueat man ro andang mga ginhimo ngaron agod mangin paandam katon nga nagakabuhi sa rayang tyempo kon siin nagakatuman eon ro plano it Dyos kato-kato pa.

Mga TagaGalacia 1:15

Pero bisan makaruyon ako, bago pa ako natawo hay ginpili eon ako it Dyos, ag tungod sa anang sobrang kabuot hay ana ako nga gintawag nga magserbi kana. Ginpakamayad nana nga ipahayag kakon kon sin-o gid ro ana nga Unga agod iwali ko ro parti kana sa mga bukon it Judio. Pagkapahayag nana karon kakon hay owa eagi ako mag-adto bisan kanyo agod magpaturo.

Mga TagaEfeso 2:10

Ro Dyos ro nagbag-o ku atong kabuhi paagi sa atong maeueot nga kaangtanan kay Kristo Jesus. Ginbag-o nana kita agod himuon ta ro mga mayad nga buhat nga ginplano it Dyos kato pa nga ipahimo katon.

Mga TagaColosas 1:23

Matabo eang ra kon magpadayon kamo sa inyo nga malig-on ag indi mahuyang nga pagtuo, ag indi gid magduda nga mabaton ninyo ro mga mayad nga butang nga ginpromisa sa Mayad nga Balita nga inyong habatian. Ro Mayad nga Balita ngara hay ginasugid sa bilog nga kalibutan, ag ako nga si Pablo hay ginpili it Dyos nga magsugid karon.

Mga TagaColosas 1:6

Rayang mensahi hay nagaeapnaag man sa bilog nga kalibutan. Bisan siin ra makaabot hay nagadinugang pa gid ro nagatuo kara, ag nagabag-o ro kabuhi ku mga nagatuo pareho man sa natabo inha kinyo. Halin ku pagkabati ninyo ku Mayad nga Balita hay inyo nga haeubtan it mayad kon ano gid ro sobrang kabuot it Dyos nga anang ginpakita pageuwas nana kinyo.

1 Timoteo 2:7

Mawron 't-a nga ginbutang ako it Dyos nga apostol ag manogwali agod iwali ko sa mga bukon it Judio ro kamatuuran parti sa pagtuo kay Jesus. Minatuod ro akon ngara nga ginahambae ag owa gid ako nagapinuril.

2 Timoteo 1:11

Para gid-a sa pagpasayod ku rayang Mayad nga Balita nga ginbutang ako it Dyos bilang manogwali, apostol ag manogturo.

2 Timoteo 2:2

Ro mga ginturo ko sa atubang it kadagayaan nga habatian nimo hay imo man nga ituro ag itugyan sa mga masaligan ag mayad magturo, agod ikaturo man nanda sa iba.

Tito 1:5

Gin-aywanan ko ikaw inha sa isla it Creta agod nga imong ayuson ro dapat pang ayuson, ag tapuson ro dapat pa nga obrahon sa mga grupo it mga tumueuo inha. Ag ro sambilog pa hay agod nga magbutang ka it mga manogdumaea ku grupo it mga tumueuo sa kada banwa pareho ku akong ginbilin kimo.

Mga Hebreo 11:4

Aton nga dumdumon si Abel. Dahil sa anang pagtuo, naghaead imaw it haead nga mas mahaega sa mata it Dyos kaysa sa haead ni Cain. Dahil man sa anang pagtuo, ginbilang imaw nga matarong ay ginbaton it Dyos ro anang haead. Ngani mahambae naton nga bisan patay eon si Abel hay nagahambae gihapon imaw katon paagi sa ehemplo ku anang pagtuo.

Santiago 3:18

Ro bunga it pagpangabuhi nga may paghidait sa kada isaea hay pagkabuhi nga matarong ay indi makapangabuhi it matarong ro mga tawo kon owa man sanda it paghidait sa kada isaea.

1 Pedro 3:15

Imbis magminakaron kamo hay dapat nga tahuron ninyo si Kristo ag kilaeaha't-a ninyo it hantop sa inyong tagipusuon nga imaw eang ro inyong Ginuo. Dapat hay haom kamo permi sa pagsabat kon may magtaksar kinyo kon ham-a't sigurado kamo nga mabaton ninyo ro inyong ginapaabot sa ulihi bilang tumueuo.

1 Pedro 3:2

Madaea sanda dahil hikita nanda ro inyong pagkamatinahuron ag ro inyong buhat nga malimpyo.

1 Juan 4:10

Ro matuod nga kahueugan it gugma hay bukon it tag makita sa atong paghigugma sa Dyos kundi sa anang paghigugma katon, tag ginpaadto na riya ro anang unga agod paagi sa ana ngara nga unga hay mapatawad ro atong mga saea.

1 Juan 4:19

Nagahigugma kita ay ro Dyos ro unang naghigugma katon.