Juan 13:5 - Inkeanon

⁵ Pagkatapos, nagbuoe imaw it palanggana ag ginbutangan rato it tubi, ag gin-umpisahan it hugas ro siki ku anang mga sumueunod. Ana man dayon nga ginpahiran ku ana ngato nga tualya ro andang mga siki.

Juan 13:5 Iomraidhean Croise

Lucas 7:38

Pag-abot idto hay nagtindog imaw sa may sikwayan ni Jesus ag nagtinangis. Ro anang euha hay idto sa siki ni Jesus nagtinueo. Ginpahiran rato ku bayi it anang buhok ag ana dayon nga ginhinaruan ag ginbu-buan it pahumot ngato.

Lucas 7:44

Tapos nagbalikid imaw sa ratong bayi ag naghambae kay Simon, “Tan-awa tuo ro bayi ngara. Pagsaylo nakon kaina sa imong baeay, owa mo gid ako pagtaw-i it tubi nga ipalibanaw sa akong siki. Pero ro bayi ngara hay ana nga ginhugasan it anang euha ro akong siki ag ana dayon nga ginpahiran ku anang buhok.

Juan 13:10

Naghambae si Jesus, “Ro nakapaligos eon hay owa eon it kinahangean nga maligos it uman tungod malimpyo eon ro anang bilog nga eawas. Ro ana eang nga siki ro dapat hugasan. Ag kamo hay malimpyo eon mageuwas sa sambilog kinyo.”

Juan 13:6

Tag nakaabot eon imaw kay Simon Pedro hay naghambae 't-a si Pedro, “Ginuo, ham-an it ikaw gid-a ro gahugas ku akong siki?”

Juan 13:8

Nagbalibad si Pedro, “Indi't-ang magpahugas ku akong siki kimo bisan hin-uno!” Pero nagsabat si Jesus, “Kon indi ka kakon magpahugas ku imong siki hay indi ka eon igtapoe sa akong mga katawhan.”

Juan 19:34

Pero may sangka soldado nga ana nga hinandos it bangkaw ro kilid ni Jesus ag insigida hay bumusawak ro dugo ag tubi.

Mga Binuhatan 22:16

Ayaw eon pagpabuhaya. Magpangamuyo ka eon nga patawaron it Dyos ro imong mga saea dahil sa ginhimo ni Jesus. Magpabawtismo ka dayon nga nagapakita nga ginhugasan ka eon sa imong mga saea.’

1 Corinto 6:11

Makaruyon man anay kato ro iba kinyo. Pero paagi sa ginhimo ni Ginuong Jesu-Kristo ag paagi sa gahom ku Espirito it atong Dyos hay ginlimpyuhan eon kamo sa inyong mga saea, ginpaeain it Dyos nga mangin ana nga balaan nga katawhan, ag ginbilang nga matarong sa anang panueok.

Mga TagaEfeso 5:26

Ginhimo nana ron agod limpyuhan kita sa saea ag himuon nga balaan tungod nagtuo kita sa mensahi parti kana ag ginbawtismuhan kita.

1 Timoteo 5:10

Dapat man nga imaw hay bantog dahil sa anang mayad nga binuhatan pareho ku mga raya: mayad nga pagpabahoe sa anang mga unga, pagkamaabi-abihon, pagpaubos ku anang kaugalingon sa pagserbi sa anang isigkapareho nga tumueuo, pagkamabinuligon sa mga nagakalisod, ag mahugod sa paghimo it bisan ano nga mayad.

Mga Hebreo 10:22

magpaeapit kita sa Dyos nga may sinsiro nga tagipusuon ag malig-on nga pagsalig ag pagtuo kana, ay ro atong tagipusuon hay pareho it ginwisikan it dugo ni Jesus, ag ro atong eawas hay pareho it ginhugasan eon it malimpyo nga tubi. Ngani malimpyo eo't-a ro atong konsensya.

1 Juan 1:7

Pero kon kita hay nagakabuhi sa kahayag, kapareho ku Dyos nga una sa kahayag hay may atong mayad nga pag-ililiba sa atong mga kaigmanghuran, ag ro pag-uea ku dugo ni Jesus kat gineansang imaw sa krus ro nagalimpyo sa tanan-tanan naton nga mga saea.

1 Juan 5:6

Ro Unga ngara it Dyos hay si Jesu-Kristo, ro Maneueuwas nga ginpadaea iya it Dyos. Nag-adto imaw iya sa kalibutan, ginbawtismuhan sa tubi, ag nag-uea ku anang dugo tag gineansang imaw sa krus. Owa eang imaw ginbawtismuhi kundi nag-uea man imaw ku ana nga dugo. Ro Espirito Santo mismo ro nagapamatuod kara, ag ro Espirito hay nagasugid permi it matuod.

Pahayag 7:14

Nagsabat ako, “Tao ngani, Sir, owa ako kasayod. Ikaw 't-a ro nakasayod karon.” Nagsabat imaw, “Daya ro mga nakaagi it grabi nga kalisdanan pero nakalibre. Gineabhan ag ginpaputi nanda ro andang mga eambong sa dugo it Tiyo it Karnero.