Juan 1:14 - Inkeanon

¹⁴ Ro Mensahi hay nagpakatawo ag nag-istar imaw iya sa kalibutan kaibahan namon. Hakita gid namon ro anang eangitnon nga pagkadaeayawon, nga tanda nga imaw ro Owa't Kapareho nga ginpadaea iya it Dyos Ama. Sobra gid ro anang kabuot ag matuod tanan ro anang ginasugid.

Juan 1:14 Iomraidhean Croise

Mateo 1:16

Si Jacob ro ama ni Jose ag si Jose ngara hay asawa ni Maria nga ina ni Jesus nga ginatawag nga Kristo, ro paadtunon iya it Dyos agod maghari.

Lucas 2:11

Makaron sa banwa nga natawuhan ni Haring David, natawo ro inyong Maneueuwas. Imaw ro Ginuo, ro *Kristo nga ginpromisa it Dyos.

Lucas 2:7

Nag-unga imaw ku anang panganay ag eaki rato. Ana ra nga ginputos it lampin ag ginpaya sa pasungan nga kaean-an it sapat ay owa it bakanti nga kwarto sa baeay nga andang ginsakaan.

Lucas 9:32

Hamuok gid ro tueog ni Pedro ag ku anang mga kaibahan pero habugtaw sanda it gulpi. Hakita nanda nga kasilaw-silaw si Jesus pati man ro daywa nga kaibahan nanang nagatindog.

Juan 1:1

Bago pa gintuga ro bisan ano hay una eo't-a ro ginatawag nga ro Mensahi. Ro Mensahi hay kaibahan eon it Dyos ag ro Mensahi hay Dyos.

Juan 11:40

Nagsabat si Jesus, “Bukon abi nga ginhambae ko kimo nga kon gapati ka hay makita mo ro makangawa-ngawa nga gahom it Dyos?”

Juan 14:6

Nagsabat si Jesus, “Ako mismo ro daean paadto sa Dyos Ama. Ako man ro gapahayag kon ano ro matuod parti sa Dyos ag ako ro gatao it kabuhi nga owa it katapusan. Owa it makapaeapit sa akon nga Ama kon indi mag-agi kakon.

Juan 14:9

Nagsabat si Jesus, “Felipe, mabuhay eon ro akong pag-iniba kinyo ag owa ka't-ing gihapon kakilaea kakon? Ro nakakita kakon hay nakakita man sa akong Ama. Ham-an it gahambae ka pa nga ipakita ko kinyo ro akong Ama?

Juan 17:22

Gintao ko kanda ro kadungganan nga gintao mo kakon agod maghiliugyon sanda pareho katon.

Juan 17:24

“Ama, gusto ko nga ro imong mga gintugyan kakon hay makaiba kakon sa ulihi kon siin ako, agod makita nanda ro akong pagkadaeayawon nga gintao mo kakon, tungod ginhigugma mo eon ako bago pa gintuga ro kalibutan.

Juan 18:37

Naghambae si Pilato, “Hay kon mawron, hari ka't-imo gali ron?” Nagsabat si Jesus, “Tama't-a ro imo nga ginhambae ngaron nga hari ako. Pero ro akong tuyo sa pag-adto ag pagpakatawo iya sa kalibutan hay agod magpamatuod parti sa kamatuuran nga halin sa Dyos. Ro tanan nga nagapahaega ag nagakabuhi suno sa kamatuuran hay nagapamati sa akong ginahambae.”

Juan 2:11

Ratong primero nga milagroso nga pamatuod kon sin-o gid imaw hay ginhimo ni Jesus sa banwa it Cana idto sa Galilea. Paagi dikato hay ana nga ginpahayag ro anang eangitnon nga pagkadaeayawon, ngani nagtuo gid kana ro anang mga sumueunod.

Juan 3:16

“Matuod ron ay makaraya kabahoe ro paghigugma it Dyos sa mga tawo iya sa kalibutan nga ana nga gintao ro anang Unga, ro Owa't Kapareho, agod mangin sakripisyo agod ro tanan nga magatuo kana hay indi mapaimpyerno kundi may kabuhi nga owa it katapusan.

Juan 3:18

Ngani ro tanan nga nagatuo kana hay indi eon gid pagsintinsyahan nga pinahan, pero ro mga owa nagatuo hay ginsintinsyahan eo't-a nga pinahan dahil owa sanda magtuo sa Unga it Dyos nga Owa't Kapareho.

Juan 6:51

Ako nga naghalin sa eangit rondayang pagkaon nga nagatao it minatuod nga kabuhi. Ag ro magakaon ku pagkaon ngara hay magakabuhi hasta sa owa it katapusan. Ag ro pagkaon ngani ngara nga itao nakon sa mga tawo sa kalibutan agod magakabuhi sanda hay ro akon nga eawas.”

Juan 8:32

Masayran gid dayon ninyo ro kamatuuran halin sa Dyos parti kakon, ag ruyon ro magahilway kinyo.”

Mga Binuhatan 13:33

Ro ana ngarang promisa hay gintuman it Dyos sa andang mga inapo, nga kita ngani ron, tag ginbanhaw nana si Jesus pareho sa nasueat sa ikaywa nga Salmo kon siin naghambae ro Dyos, ‘Ikaw hay akon nga unga. Makaron hay ginapakita ko gid nga ako ro imong Ama.’

Mga TagaRoma 8:3

Indi kita mangin matarong sa panueok it Dyos paagi sa pagtuman sa anang Kasuguan dahil mas pa ro atong kaila sa pagpakasaea kaysa sa atong kaila sa pagtuman sa Kasuguan. Pero ro indi mahimo sa pagtuman sa Kasuguan hay nahimo 't-a it Dyos tag ginpaadto nana ro ana mismong unga iya sa kalibutan. Nagpakatawo imaw ag may eawas ag kinaiya it tawo nga pareho katon. Anang ginhaead ro anang eawas bilang sakripisyo agod imaw ro pinahan por dahil katon nga mga makasasaea.

Mga TagaRoma 9:5

Sanda ro mga inapo it mga taeahuron nga kalolo-lolohan namong mga Judio. Ag sa amon man nga linahi naghalin ro Maneueuwas nga si Kristo tag nagpakatawo imaw. Imaw ro Dyos nga eabaw sa tanan ag dapat imaw nga dayawon hasta sa owa't katapusan. Amen.

1 Corinto 15:47

Ro hauna nga tawo nga si Adan hay halin iya sa kalibutan ay gintuga imaw halin sa eapok pero ro ulihi nga Adan nga si Kristo hay halin sa eangit.

2 Corinto 12:9

pero sinana kakon, “Salig eang sa akong bulig kimo ay bastanti ron nga makatakod ka, dahil kon nakahimo ro tawo it sangka bagay bisan owa imaw it ikasarang hay dikaron makita nga nahimo na rato dahil eang sa akong gahom.” Ngani malipayon ako sa pagpabugae ku akon nga kahinaan agod buligan ako permi ku gahom ni Kristo nga nagapabilin kakon.

Mga TagaGalacia 4:4

Pero pag-abot it oras nga gintaeana it Dyos hay ginpaadto nana iya sa kalibutan ro anang unga. Tawo gid imaw tungod gin-unga imaw it isaeang ka bayi nga Judio, ag nagkabuhi imaw nga hasakpan ku andang Kasuguan.

Mga TagaEfeso 3:8

Bisan ako ro pinakakubos sa tanan nga mga katawhan it Dyos, ginpakita gihapon nana kakon ro anang sobrang kabuot nga gintaw-an nana ako it pribilihiyo nga magwali sa mga bukon it Judio parti sa bugana ag indi matungkad nga pagpakamaayo ni Kristo.

Mga TagaColosas 1:19

dahil gusto gid it Dyos Ama nga ro tanan-tanan gid ku ana nga pagkaDyos hay una man kay Kristo.

Mga TagaColosas 2:3

Si Kristo eang ro makatao katon it kaaeam nga maeubtan ro mensahi halin sa Dyos nga pareho it maeahaeon nga manggad.

Mga TagaColosas 2:9

Ayaw kamo magpadaea-daea dahil una gid kay Kristo ro tanan-tanan gid nga pagkaDyos it Dyos.

1 Timoteo 3:16

Owa gid-a it makanigar nga grabi ro kahaega ku atong ginatuuhan parti kay Jesus nga ginpahayag eon it Dyos. Si Jesus hay nagpakatawo riya sa kalibutan, ginpamatud-an it Espirito kon sin-o gid imaw, nakita it mga anghel, ginwali sa bilog nga kalibutan, gintuuhan it mga tawo ag ginpakayab it Dyos sa eangit agod padunggan.

Mga Hebreo 1:3

Ro pagkadaeayawon ag kadungganan it Dyos hay makita man sa anang Unga. Kon mauno gid ro kinaiya it Dyos hay makaruyon gid ro anang Unga. Imaw ro nagapapadayon sa tama nga kaayusan ku tanan-tanan, ag nagakontrol ku tanan paagi sa gahom ku anang hambae. Paagi sa anang kamatayon hay ginlimpyuhan nana kita sa atong mga saea. Pagkahimo nana kato hay nagbalik imaw sa eangit ag nagpungko sa pinakadungganon nga pwesto sa tuo it eabing dungganon nga Dyos.

Mga Hebreo 1:5

Dahil owa gid it bisan sambilog sa mga anghel nga ginhambaean it Dyos it makaraya, “Ikaw hay akon nga Unga ag makaron, ipakita ko nga ako ro Ama nimo.” Ag bukon man it anghel ro anang ginapatungdan sa anang ginhambae nga, “Mag-ama kami; ako ro anang Ama ag imaw hay akong Unga.”

Mga Hebreo 10:5

Mawron nga tag madali eon lang magpakatawo si Kristo iya sa kalibutan hay naghambae imaw sa Dyos Ama, “Owa ka nalipay ku mga ginasakripisyo nga sapat, pati man ku mga ginasunog nga sapat sa altar ag ku iba pa nga mga haead, dahil indi ron makahimo sa tawo nga owa eon it saea sa imong mata. Ro kinahangean hay eawas it tawo nga owa it saea ngani ginpahauman mo ako it eawas nga makaruyon.

Mga Hebreo 2:11

Si Jesus nga nagahimo katon nga mga balaan nga katawhan it Dyos ag kita nga anang ginahimo nga balaan hay may sangka Ama eang, mawron nga owa si Jesus nahuya nga tawgon kita nga anang mga igmanghod.

Mga Hebreo 5:5

Si Kristo man ngani hay owa nagpadungog sa anang kaugalingon sa pagpungko bilang Pinakapinuno nga Saserdote kundi ro Dyos ro nagpadungog kana sa anang ginhambae nga, “Ikaw hay akon nga Unga ag makaron, ipakita ko nga ako ro Ama nimo.”

1 Juan 4:14

Hakita gid namon si Jesus. Ngani ginapamatud-an man namon nga ginpaadto iya it Dyos nga Ama ro anang Unga agod mangin Maneueuwas it kalibutan.

1 Juan 4:9

Makaraya ro pagpakita it Dyos ku anang gugma katon: ana nga ginpadaea riya sa kalibutan ro anang unga nga owa't kapareho, agod paagi kana hay magakabuhi kita hasta sa owa it katapusan.

2 Juan 1:7

Abo eon nga mga manogpataeang nga nagaeapnaag sa bisan siin nga parti it kalibutan, nga nagaturo nga si Jesu-Kristo hay owa nangin matuod nga tawo sa anang pag-adto iya sa kalibutan. Ro mga nagaturo it makaruyon hay may paino-ino pareho ku Manogpataeang ag Manogkuntra kay Kristo.

Pahayag 19:13

Ro anang eambong hay gintusmaw sa dugo. ag ginatawag imaw nga Ro Mensahi it Dyos.

Pahayag 21:3

May habatian dayon ako nga mabaskog nga limog nga halin sa trono. Hambae nana, “Pamati kamo, ro ilistaran it Dyos makaron hay sa ilistaran man it mga tawo. Una mismo imaw magaistar kaibahan nanda, ag sanda ro mangin anang mga katawhan. Imaw mismo ro magaiba kanda permi bilang andang Dyos.