2 Juan 1:5 - Inkeanon

⁵ Pero makaron, haeangdon nga bayi, ginapadumdum ko ikaw nga dapat nga maghigugmaanan kita. Bukon it bag-o nga sugo ro akon ngara nga ginasueat kimo, tungod hasayran eon naton ra umpisa pa ku pagtuo naton kay Jesus.

2 Juan 1:5 Iomraidhean Croise

Juan 15:12

“Raya ro akon nga sugo kinyo: Maghigugmaanan kamo pareho ku akong paghigugma kinyo.

Juan 15:17

Ginahambae ko it uman ro akong sugo kinyo, maghigugmaanan kamo.”

Mga TagaGalacia 5:22

Pero kon ginagiyahan kita ku Espirito Santo, makaraya ro bunga karon sa atong kabuhi: kita hay mahigugmaon, malipayon, may katawhayan, mapinasensyahon, mabuot, mayad magtratar sa isigkatawo, masaligan,

Mga TagaEfeso 5:2

Dapat nga higugmaon gid ninyo permi ro inyong isigkatawo pareho ku paghigugma ni Kristo katon. Ana pa ngani nga ginhaead ro anang kabuhi por dahil katon, bilang mahumot nga sakripisyo nga nakapalipay sa Dyos.

1 Tesalonica 4:9

Pero pag-abot sa paghigugma sa inyong kaigmanghuran sa pagtuo hay owa eon it kinahangean nga sueatan ko pa kamo parti karon, ay ro Dyos mismo ro nagturo kinyo nga maghigugmaanan.

Mga Hebreo 13:1

Padayuna ninyo ro inyong paghigugma sa inyong kaigmanghuran sa pagtuo.

1 Pedro 4:8

Eabaw sa tanan, maghigugmaanan kamo it hantop sa inyong tagipusuon. Kon ginahigugma abi ninyo ro inyong isigkatawo hay mapatawad gid ninyo imaw maskin man-o it abo ro anang saea kinyo.

2 Pedro 1:7

Ro pagkamatinumanon sa Dyos hay dugangan ninyo it pagpalangga sa mga kaigmanghuran sa pagtuo, ag ro paglangga ngaron sa mga kaigmanghuran hay dugangan pa gid ninyo it paghigugma sa tanan nga tawo.

1 Juan 3:11

Mga unga kita it Dyos ngani dapat kita hay maghigugmaanan, dahil raya ro mensahi nga inyong habatian halin pa ku pag-umpisa ninyo it pagtuo.

1 Juan 3:23

Daya ro pinakapunto ku mga sugo it Dyos katon: dapat nga magtuo gid kita sa anang unga nga si Jesu-Kristo, ro dungganon nga Maneueuwas, ag dapat kita nga maghigugmaanan pareho ku sugo katon ni Jesu-Kristo.

1 Juan 4:20

Pero kon may maghambae nga ginahigugma nana ro Dyos, pero ginakaugtan nana ro anang igmanghod sa pagtuo hay nagapinuril. Kon indi nana mahigugma ro anang igmanghod nga anang makita, mas kapin pa gid nga indi nana mahigugma ro Dyos nga indi nana makita.

2 Juan 1:1

Para kimo, haeangdon nga bayi nga pinili it Dyos, ag sa imo man nga mga unga. Ro nagasueat ngara kinyo hay tag ginakilaea nga Ro Magueang. Isaea ako sa mga magueang nga nagadumaea sa mga tumueuo. Hantop gid sa tagipusuon ro akong paghigugma kinyo, ag bukon eang it ako ro nagahigugma kinyo, kundi pati man ro tanan nga nakasayod ku matuod nga mensahi.