1 Juan 4:9 - Inkeanon

⁹ Makaraya ro pagpakita it Dyos ku anang gugma katon: ana nga ginpadaea riya sa kalibutan ro anang unga nga owa't kapareho, agod paagi kana hay magakabuhi kita hasta sa owa it katapusan.

1 Juan 4:9 Iomraidhean Croise

Marcos 12:6

Sa kaulihanan gid, sambilog lang ro anang puyding paadtunon sa anang ubasan. Rato hay ro ana nga palangga nga unga nga eaki. Ginsugo ra nana idto ay sinana sa anang isip, ‘Unga ko eon ron. Anda't-a ron nga tahaon.’

Lucas 4:18

“Ginagamhan ako ku Espirito it Ginuong Dyos tungod ana akong ginpili nga magwali ku Mayad nga Balita sa mga kubos. Ana ako nga ginpaadto iya agod ipahayag sa mga bihag nga puydi sandang mahilway ag sa mga bulag nga makakita sanda it uman ag sa mga matsa ginaeuok it kalisod nga puydi man sanda nga makatibawas.

Juan 10:10

Ro manakaw hay nagaadto iya agod magpanakaw, magpatay ag magpangsamad. Pero ako't-a hay nag-adto iya agod taw-an ro mga tawo it minatuod nga kabuhi nga ginapakamaayo it pwerti.”

Juan 14:6

Nagsabat si Jesus, “Ako mismo ro daean paadto sa Dyos Ama. Ako man ro gapahayag kon ano ro matuod parti sa Dyos ag ako ro gatao it kabuhi nga owa it katapusan. Owa it makapaeapit sa akon nga Ama kon indi mag-agi kakon.

Juan 3:16

“Matuod ron ay makaraya kabahoe ro paghigugma it Dyos sa mga tawo iya sa kalibutan nga ana nga gintao ro anang Unga, ro Owa't Kapareho, agod mangin sakripisyo agod ro tanan nga magatuo kana hay indi mapaimpyerno kundi may kabuhi nga owa it katapusan.

Juan 3:18

Ngani ro tanan nga nagatuo kana hay indi eon gid pagsintinsyahan nga pinahan, pero ro mga owa nagatuo hay ginsintinsyahan eo't-a nga pinahan dahil owa sanda magtuo sa Unga it Dyos nga Owa't Kapareho.

Juan 5:23

Gin-obra nana ron agod ako nga Unga hay tahuron it tanan nga tawo, pareho ku andang pagtahod kana nga akong Ama. Ro owa nagatahod kakon nga Unga hay owa man nagatahod sa akong Ama nga nagpadaea kakon iya.”

Juan 6:29

Ginsabat sanda ni Jesus, “Ro ginapangayo it Dyos nga obrahon ninyo hay tuuhan ninyo ako nga anang ginpadaea iya.”

Juan 6:51

Ako nga naghalin sa eangit rondayang pagkaon nga nagatao it minatuod nga kabuhi. Ag ro magakaon ku pagkaon ngara hay magakabuhi hasta sa owa it katapusan. Ag ro pagkaon ngani ngara nga itao nakon sa mga tawo sa kalibutan agod magakabuhi sanda hay ro akon nga eawas.”

Juan 6:57

Ginpadaea ako iya ku akong Ama nga ginahalinan it kabuhi, ag kon mauno nagakabuhi ako dahil kana, makaruyon man ro nagakaon kakon hay magakabuhi man dahil kakon.

Juan 8:29

Ro nagpadaea iya kakon hay kaibahan ko permi, owa nana ako ginaaywani dahil ginaobra ko permi kon ano ro gapalipay kana.”

Juan 8:42

Nagsabat dayon si Jesus, “Kon matuod kamo nga mga unga it Dyos hay higugmaon kunta ninyo ako ay kana ako naghalin. Owa ako nag-adto iya nga akon-akon eang, kundi imaw ro nagpadaea iya kakon.

Juan 9:3

Nagsabat si Jesus, “Ro anang pagkabulag hay bukon it dahil nagkasaea imaw o ro anang mga ginikanan kundi agod ikapakita ro gahom it Dyos sa pagpamayad kana.

Mga TagaRoma 8:32

Bisan ro ana mismo nga Unga hay owa nana ginlikaw sa kamatayon kundi gintugot nana nga mamatay para katon tanan. Ginhimo na eon ngani ron, indi pa baea nana itao nga owa it hawid-hawid ro tanan nga para sa atong kamaeayran?

Mga Hebreo 1:5

Dahil owa gid it bisan sambilog sa mga anghel nga ginhambaean it Dyos it makaraya, “Ikaw hay akon nga Unga ag makaron, ipakita ko nga ako ro Ama nimo.” Ag bukon man it anghel ro anang ginapatungdan sa anang ginhambae nga, “Mag-ama kami; ako ro anang Ama ag imaw hay akong Unga.”

1 Juan 3:16

Naintindihan naton kon ano ro kahueugan it gugma tungod hakita naton nga ginhaead ni Kristo ro anang kabuhi por dahil katon. Ngani dapat man naton nga ihaead ro atong kabuhi sa pagserbi sa atong mga igmanghod sa pagtuo, bisan ikamatay pa naton.

1 Juan 4:10

Ro matuod nga kahueugan it gugma hay bukon it tag makita sa atong paghigugma sa Dyos kundi sa anang paghigugma katon, tag ginpaadto na riya ro anang unga agod paagi sa ana ngara nga unga hay mapatawad ro atong mga saea.

1 Juan 4:16

Hasayran naton ag ginapatihan nga ginahigugma gid kita it Dyos. Ro ana gid nga kinaiya it Dyos hay ro pagkamahigugmaon, ag ro tawo nga mahigugmaon sa Dyos ag sa anang isigkatawo hay may padayon nga maeueot nga kaangtanan sa Dyos, ag ro Dyos hay padayon man nga maeueot kana.

1 Juan 5:11

Ro pamatuod it Dyos hay raya: gintaw-an nana kita it kabuhi nga owa it katapusan, ag mabaton ron naton paagi sa pagtuo sa anang unga.

1 Juan 5:13

Ginasueatan ko kamo kara nga nagatuo it hantop gid sa Unga it Dyos, ro dungganon nga Maneueuwas, agod makasiguro kamo nga may inyo nga kabuhi nga owa it katapusan,