1 Juan 4:4 - Inkeanon

⁴ Mga unga nakon sa pagtuo, kamo hay mga katawhan it Dyos ngani haperdi eon ninyo ro mga nagapakuno-kuno nga mga propeta, ay owa ninyo sanda pagpatihi. Owa ninyo sanda pagpatihi ay ro Espirito Santo nga una kinyo hay mas gamhanan kaysa kay Satanas nga nagagahom sa mga tawo iya sa kalibutan nga owa nagakilaea sa Dyos.

1 Juan 4:4 Iomraidhean Croise

Juan 12:31

Makaron eon ro oras nga sintinsyahan ro tanan nga nagakuntra kakon. Makaron man ro oras nga perdihon eon ro manogdumaea ku tanan nga nagakuntra sa Dyos.

Juan 14:30

Indi eon ako makaistorya pa kinyo it maeawig tungod si Satanas nga manogdumaea it mga owa nagatuo sa Dyos hay gaabot eon. Owa ako it nahimo nga saea nga magamit nana agod magamhan ako.

Juan 16:11

Ag hanungod sa paghukom it Dyos, pamatud-an nana nga hukman gid it Dyos ro andang saea. Ro pamatuod kara hay ginhukman eon it Dyos si Satanas nga nagadumaea sa tanan nga mga owa gatuo kakon.

Juan 17:23

Maeueot gid ro akong kaangtanan kanda ag makaruyon man ro imong kaangtanan kakon, ngani kabay pa nga mangin malig-on ro andang paghiliugyon nga matsa sambilog eang sanda. Ag kon hikita ron it mga tawo iya sa kalibutan hay masayran nanda nga ginpadaea mo ako iya, ag ginahigugma mo ro mga tawo ngara pareho ku imong paghigugma kakon.

Mga TagaRoma 8:31

Hay ano ro atong mahambae sa mga raya ngara? Raya ro atong mahambae kara: dahil ro Dyos ro kaapin naton hay owa gid it makaperdi katon.

Mga TagaRoma 8:37

Pero bisan nagaagi kita ku tanan ngarang kalisdanan hay nagadaog kita ag mas nagalig-on pa gid ro atong pagtuo paagi kay Kristo nga nagahigugma katon.

1 Corinto 2:12

Kita nga mga tumueuo hay bukon eon it pareho sa mga tawo iya sa kalibutan kon magpaino-ino ay gintaw-an eon kita it Espirito ngara it Dyos agod maeubtan naton ro mga pagpakamaayo nga gintao katon it Dyos hay dahil sa anang sobrang kabuot.

1 Corinto 6:13

May gahambae man nga kon nagutom kita hay bukon it saea nga magkaon dahil ro aton nga tiyan hay para sa pagkaon ag ro pagkaon hay para sa tiyan. Tama ron, pero sa ulihi, obrahon eon it Dyos nga owa eon it dapat ro tiyan o pagkaon. Pero bukon it tama nga ro atong eawas hay para sa paghulid bisan kanyo kundi para't-a ron sa Ginuo ag ro atong eawas hay mahaega gid kana.

2 Corinto 4:4

Ro andang paino-ino hay ginapadueom ni Satanas nga nagapadiyos-diyos sa rayang tyempo. Mawron nga indi sanda mahayagan it Mayad nga Balita nga nagasugid ku pagkadaeayawon ni Kristo nga imaw ro nagapakita kon mauno gid ro Dyos.

2 Corinto 6:16

Bagay baea nga ibutang ro mga ribulto it mga diyos-diyos sa templo nga ginasimbahan sa Dyos? Bukon 't-a ron. Kitang mga tumueuo hay pareho it templo nga ilistaran ku buhi nga Dyos. Pareho sa ginhambae nana nga, “Magaistar ako una kanda. Ibhan ko sanda sa andang pagpangabuhi. Mangin Dyos nanda ako ag mangin katawhan ko sanda.”

Mga TagaEfeso 2:2

Makaruyon anay kamo kato, ay nagasunod pa kamo sa maeain nga batasan ku mga tawo iya sa kalibutan. Ro inyong pagsunod ngaron hay pagsunod man sa pinuno it tanan nga maeain nga espirito nga nagagahom sa kahanginan, ag imaw man ro espirito nga nagatueod sa mga owa nagatuman sa Dyos nga magkasaea.

Mga TagaEfeso 3:17

agod padayon nga magaistar si Kristo sa inyong tagipusuon tungod sa inyong pagtuo. Ag ginapangamuyo ko man nga ro inyong paghigugma hay mangin kapareho it lig-on it kahoy nga nakapanggamot it husto, ag pareho man sa baeay nga malig-on ro pundasyon.

Mga TagaEfeso 6:10

Ro akong katapusan nga mga bilin kinyo hay raya. Magpakalig-on kamo permi paagi sa gahom it Ginuo ay ro anang gahom hay indi matupungan.

1 Juan 2:1

Mga unga nakon sa pagtuo, ginasueat ko kinyo ro mga bagay ngara agod indi kamo magkasaea. Pero kon may una gid man kinyo nga magkasaea hay may magabulig katon nga magapangabay sa Dyos nga Ama nga patawaron kita, ag ruyon hay si Jesu-Kristo, nga imaw ro matarong.

1 Juan 2:13

Nagasueat man ako kinyo, mga magueang, tungod nakakilaea gid kamo kana nga una eon bago pa gintuga ro bisan ano. Nagasueat man ako kinyo nga mga pamatan-on, tungod haperdi ninyo si Satanas, ro ginahalinan it kaeainan.

1 Juan 3:20

Kon amat abi hay ginakonsensya kita nga magpangamuyo sa Dyos tungod nakatagumpaaw kita nga kueang ro atong paghigugma sa atong isigkatawo. Pero tandaan naton nga ro Dyos nga nakasayod ku tanan-tanan hay mas masaligan kaysa sa atong konsensya, ag kaeuy-an nana kita.

1 Juan 3:24

Ro tanan nga nagatuman sa kasuguan it Dyos hay may padayon nga maeueot nga kaangtanan kana, ag ro Dyos hay padayon nga maeueot kana. Makasiguro kita kara tungod gintao nana katon ro Espirito Santo.

1 Juan 4:13

May aton nga kasiguruhan nga nagapadayon kita nga may maeueot nga kaangtanan sa Dyos, ag imaw hay padayon nga maeueot katon tungod gintao nana katon ro ana mismo nga Espirito.

1 Juan 4:16

Hasayran naton ag ginapatihan nga ginahigugma gid kita it Dyos. Ro ana gid nga kinaiya it Dyos hay ro pagkamahigugmaon, ag ro tawo nga mahigugmaon sa Dyos ag sa anang isigkatawo hay may padayon nga maeueot nga kaangtanan sa Dyos, ag ro Dyos hay padayon man nga maeueot kana.

1 Juan 4:6

Kita ma't-a hay mga katawhan it Dyos, ag owa sanda naila magpamati katon dahil bukon sanda it mga unga it Dyos. Ro mga maeapit sa Dyos hay naila magpamati katon. Ruyon ro basehan agod masayran naton kon ro ginaturo it sangka tawo hay halin matuod sa Espirito Santo, ukon halin kay Satanas, nga nagapataeang sa mga tawo.

1 Juan 5:19

Sayod man naton nga kita hay mga unga it Dyos, pero ro tanan nga owa nagatuo kay Kristo hay una sa gahom it ginahalinan it kaeainan.

1 Juan 5:4

dahil ro tanan nga gintaw-an ku Dyos it bag-ong kabuhi hay makaperdi sa kaeainan iya sa kalibutan. Ag ro makatao katon it kadaeag-an hay ro atong pagtuo kay Jesu-Kristo.

Pahayag 12:11

Pero ginperdi nanda imaw paagi sa dugo ku ginatawag nga Tiyo it Karnero nga ginsakripisyo para sa andang mga saea, ag paagi sa andang pagpamatuod parti kay Jesus, bisan sayod nanda nga andang ikamatay ron.