1 Juan 4:10 - Inkeanon

¹⁰ Ro matuod nga kahueugan it gugma hay bukon it tag makita sa atong paghigugma sa Dyos kundi sa anang paghigugma katon, tag ginpaadto na riya ro anang unga agod paagi sa ana ngara nga unga hay mapatawad ro atong mga saea.

1 Juan 4:10 Iomraidhean Croise

Juan 13:34

“Makaron hay may bag-o nga sugo nga akong ginabilin kinyo: maghigugmaanan kamo. Kon mauno ro akong paghigugma kinyo hay dapat makaruyon man ro inyong paghigugma sa kada isaea.

Juan 15:16

Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon. Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean.

Juan 3:16

“Matuod ron ay makaraya kabahoe ro paghigugma it Dyos sa mga tawo iya sa kalibutan nga ana nga gintao ro anang Unga, ro Owa't Kapareho, agod mangin sakripisyo agod ro tanan nga magatuo kana hay indi mapaimpyerno kundi may kabuhi nga owa it katapusan.

Juan 6:51

Ako nga naghalin sa eangit rondayang pagkaon nga nagatao it minatuod nga kabuhi. Ag ro magakaon ku pagkaon ngara hay magakabuhi hasta sa owa it katapusan. Ag ro pagkaon ngani ngara nga itao nakon sa mga tawo sa kalibutan agod magakabuhi sanda hay ro akon nga eawas.”

Mga Hebreo 2:17

Ngani agod makabulig matuod imaw hay dapat nga mangin matuod imaw nga tawo pareho gid katon nga anang mga igmanghod ag maagyan ro tanan natong ginaagyan. Paagi karon, nangin maeueuy-on ag masaligan imaw nga Pinakapinuno nga Saserdote nga nagarepresentar katon sa Dyos agod mapatawad ro mga saea naton nga mga tawo.

1 Pedro 2:24

Imaw mismo ro nagpanabat sa atong mga kasae-anan tag namatay imaw sa krus. Ginhimo ron nana agod mamatay ro atong kaila sa pagpakasaea ag magakabuhi kita it matarong. Paagi sa anang haagyan nga grabing kasakitan, kamo hay ginmayad.

1 Pedro 3:18

Ro halimbawa karon hay si Kristo nga nag-antos bisan owa gid imaw nagkasaea. Matarong gid imaw pero namatay imaw para sa mga bukon it matarong, agod ipaeapit kamo nana sa Dyos. Kaisaea eang imaw namatay pero tama eon rato para mapatawad ro mga kasae-anan it tawo. Ginpatay ro anang kalibutanon nga eawas pero ginbanhaw imaw nga may eawas nga espirituhanon.

1 Juan 2:2

Ag paagi sa kamatayon ni Jesu-Kristo hay ginpatawad eon kita sa atong mga saea. Namatay imaw bukon eang it dahil sa atong mga saea kundi dahil man sa saea it tanan nga mga tawo.

1 Juan 3:1

Grabi gid-a it bahoe ro paghigugma it Dyos nga Ama katon! Dahil sa kabahoe ku anang paghigugma ngaron hay ginbilang nana kita nga anang mga unga, ag matuod gid ma't-a nga mga unga kita it Dyos. Pero ro mga tawo riya sa kalibutan hay owa gakilaea katon bilang mga unga it Dyos, tungod owa man nanda ginakilan-a ro Dyos.

1 Juan 4:19

Nagahigugma kita ay ro Dyos ro unang naghigugma katon.

1 Juan 5:11

Ro pamatuod it Dyos hay raya: gintaw-an nana kita it kabuhi nga owa it katapusan, ag mabaton ron naton paagi sa pagtuo sa anang unga.