1 Juan 2:22 - Inkeanon

²² Hay sin-o ro pinakapurilon sa tanan? Ro pinakapurilon hay ro nagahambae nga si Jesus hay bukon it ro Maneueuwas nga ginpromisa it Dyos. Ro tawo nga makaraya ro anang ginahambae hay may paino-ino pareho ku Manogkuntra kay Kristo, ag owa nagabaton sa Dyos nga Ama ag sa anang Unga.

1 Juan 2:22 Iomraidhean Croise

Mateo 24:24

Ginapauna ko eagi ra kinyo dahil may mga magapakuno-kuno nga sanda ro Maneueuwas nga ginpromisa it Dyos. Ro iba ma't-a kanda hay magapakuno-kuno nga mga propeta it Dyos. Magahimo sanda it mga grabi nga milagro ag mga makangawa-ngawa nga mga bagay, bilang pamatuod kon sin-o kuno sanda agod hipataeang ro mga tawo ag kon mahimo, bisan pa ro mga pinili it Dyos nga anang mga katawhan.

Mateo 24:5

ay abo ro magaabot sa ulihi nga magagamit ku akon nga ngaean. Akuon nanda nga sanda gid ro Maneueuwas nga ginpromisa it Dyos ag abo gid ro andang pataeangon.

Juan 8:44

Si Satanas ro inyong ama, ngani naila kamo magtuman sa anang gusto. Halin pa ku umpisa hay manogpatay eon imaw ag ginakaugtan nana ro kamatuuran, ay maeayo ro kamatuuran sa anang kabubut-on. Kon gapinuril ngani imaw hay suno gid-a ron sa anang kinaiya, ay purilon imaw ag imaw man ro ginahalinan it tanan nga kapurilan.

1 Juan 1:6

Ngani kon ginahambae naton nga may aton nga pagpakig-iba sa Dyos pero nagapakasaea pa gihapon kita hay nagapinuril kita, tungod makita sa atong buhat nga owa naton ginatumana ro matuod nga mensahi. Ag kon makaruyon hay matsa nagakabuhi man gihapon kita sa kadueom.

1 Juan 2:18

Mga unga nakon sa pagtuo, makaron eon ro ulihing mga inadlaw. Ginsugid eon kinyo nga maabot anay ro Manogkuntra kay Kristo ag hara eon, nagainabo eon makaron ro nagakuntra kana, mawron nga sayod eon naton nga nag-abot eon ro ulihing mga inadlaw.

1 Juan 2:23

Tungod ro bisan sin-o nga owa nagabaton sa Unga it Dyos hay owa man it maeueot nga kaangtanan sa anang Ama, pero ro nagabaton sa Unga hay may maeueot man nga kaangtanan sa Dyos nga Ama.

1 Juan 2:4

Ngani ro bisan sin-o nga nagahambae nga nakakilaea gid imaw sa Dyos, pero owa man nagatuman sa anang mga kasuguan hay purilon, ag ro makaruyon nga tawo hay owa gid nakatanom sa anang paino-ino ro kamatuuran nga ginpahayag it Dyos.

1 Juan 4:20

Pero kon may maghambae nga ginahigugma nana ro Dyos, pero ginakaugtan nana ro anang igmanghod sa pagtuo hay nagapinuril. Kon indi nana mahigugma ro anang igmanghod nga anang makita, mas kapin pa gid nga indi nana mahigugma ro Dyos nga indi nana makita.

1 Juan 4:3

Pero ro tanan nga owa nagapati ku raya ngara parti kay Jesus hay gapakilaea nga ro andang ginaturo hay bukon it halin sa Espirito it Dyos, ag ro andang paino-ino hay pareho sa paino-ino it Manogkuntra kay Kristo. Ginsugid eon kinyo nga magaabot imaw iya, ag abo eon ngani iya sa kalibutan nga pareho kana it paino-ino.

1 Juan 5:1

Ro mga nagatuo nga si Jesus hay ro Maneueuwas nga ginpromisa it Dyos hay mga unga it Dyos. Ro mga nagahigugma sa Ama hay nagahigugma man sa rato nga anang ginakabig nga anang mga unga.

2 Juan 1:7

Abo eon nga mga manogpataeang nga nagaeapnaag sa bisan siin nga parti it kalibutan, nga nagaturo nga si Jesu-Kristo hay owa nangin matuod nga tawo sa anang pag-adto iya sa kalibutan. Ro mga nagaturo it makaruyon hay may paino-ino pareho ku Manogpataeang ag Manogkuntra kay Kristo.

Judas 1:4

Ginahambae ko ron ay may mga nakaintra eon kinyo nga mga owa it kahadlok sa Dyos ag owa ninyo masayri ro andang maeain nga tuyo. Anda nga ginabayluhan ro ginaturo parti sa sobrang kabuot it Dyos. Sinanda hay bisan owa kita gapugong-pugong sa atong kaueag hay owa it kaso ay patawaron 't-a kita it Dyos dahil sa anang sobrang kabuot. Ag anda man nga ginapanghiwaea si Jesu-Kristo nga atong solo nga Amo ag Ginuo. Nasueat eon kato-kato pa sa Sagrado nga Kasueatan nga sintinsyahan gid ron sanda nga pinahan.

Pahayag 3:9

Pamati kamo. May mga nagahambae inha nga mga katawhan kuno sanda it Dyos pero bukon, ay nagapinuril sanda ag ro minatuod hay mga katawhan sanda ni Satanas. Pero hueata eang ninyo ay paeudhon ko ron sanda sa inyong atubang, ag dikato nanda hisayran nga ginahigugma ko kamo.