1 Juan 2:16 - Inkeanon

¹⁶ Tungod ro tanan nga maeain nga pagginawi iya sa kalibutan hay owa maghalin sa Dyos nga Ama kundi sa kinalibutanon nga pagbinatasan. Ro mga halimbawa kara hay ro mga maeain nga handom nga halin sa makasasaea nga kinaiya it tawo, ro paghangad ku mga bagay nga hakikita, ag ro pagpabugae it tawo ku andang manggad.

1 Juan 2:16 Iomraidhean Croise

Mateo 4:8

Pagkatapos hay gindaea imaw ni Satanas sa kataas-taas nga bukid ag ginpakita kana ro tanan nga nasyon sa bilog nga kalibutan ag ro andang kadungganan.

Mateo 5:28

Pero ro akon 't-a nga ginahambae kinyo makaron hay ro bisan sin-o nga magtueok sa sangka bayi ag sa anang isip hay gusto nana ra nga huliran hay nagpangawatan eon sa anang isip, tungod pareho man ron nga hahuliran eon nana ro bayi ngato.

Lucas 4:5

Pagkatapos, gindaea imaw ni Satanas sa mataas nga lugar ag sa sang pamisok hay ginpakita kana ro tanan nga mga nasyon sa bilog nga kalibutan.

Mga TagaRoma 13:14

Dapat naton nga tuearon ro batasan ni Ginuong Jesu-Kristo ag indi gid kita magplano nga pasugtan ro atong makasasaea nga kinaiya.

1 Corinto 10:6

Ro mga nagkaeatabo ngaron kato hay paandam katon agod indi kita magtuead sa andang maeain nga batasan nga bukon it kuntento sa kon ano ro ginatao it Dyos kanda.

Mga TagaGalacia 5:17

Ro gusto ku atong makasasaea nga kinaiya hay kuntra sa gusto it Espirito Santo ag ro gusto it Espirito Santo hay kuntra sa gusto ku atong makasasaea nga kinaiya. Magkaaway ron sanda ag mawron nga indi ninyo mahimo ro inyong gustong obrahon.

Mga TagaGalacia 5:24

Ro mga sumueunod ni Kristo Jesus hay pareho man it nageansang eon sa krus ku andang makasasaea nga kinaiya, pati ku andang mga maeain nga handom ag kailigbon dahil nagtalikod eon sanda karon.

Mga TagaEfeso 2:3

Kita tanan hay kaibahan man kato nanda ag pareho man kanda nga nagatuman eang ku atong makasasaea nga kinaiya. Ginasunod naton kon ano ro gusto ku aton nga eawas, ag kon ano ro iya sa atong paino-ino. Pareho man kita kanda, makasasaea man kita halin pa ku aton nga pagkatawo, ag pina it Dyos ro atong dangatan.

Tito 2:12

Paagi sa anang sobrang kabuot ngaron hay maeubtan naton nga dapat natong isikway ro pagkabuhi nga owa kita it kahadlok kana, ag indi eon magpadaea-daea sa mga maeain nga handom iya sa kalibutan. Ag maeubtan man naton nga dapat may pagpugong kita sa atong kaugalingon, mangin matarong, ag mangin matinumanon sa Dyos samtang iya pa kita sa kalibutan.

Tito 3:3

Dumdumon naton nga kita man ngani kato hay owa kaeubot parti sa Dyos, bukon it masinueundon kana, ag ginpinataeang. Ulipon anay kita it mga sari-sari nga mga maeain nga handom nga nailaan ku atong eawas. Puro eang anay maeain ro atong ginaisip sa atong isigkatawo ag permi eang natong ginahisaan sanda. Ginakaugtan kita it mga tawo ag ginakaugtan man naton sanda.

Santiago 3:15

Bukon it makaruyon ro kaaeam nga nagahalin sa Dyos kundi kinalibutanon ron ag saea ron nga isip it mga tawo nga ginagiyahan it mga demonyo.

Santiago 4:16

Pero sige ro inyong pagpinabugae nga matsa kamo't-a ro nagabuyot ku inyong kabuhi. Ro tanan nga mga pagbinugae nga makaruyon hay maeain.

1 Pedro 1:14

Tumana permi ninyo ro Dyos bilang anang matinumanon nga mga unga. Ayaw eon ninyo pagpasugti ro inyong mga maeain nga handom nga inyo anay kato nga ginasinunod, kat owa pa kamo nagakilaea sa Dyos.

1 Pedro 2:11

Mga hinigugma, mga estranghero kamong nagapangabuhi bilang mga umaeagi iya sa ibabaw it kalibutan, ngani ginapangabay ko kamo nga indi eon magpadaog sa mga maeain nga handom it eawas nga perming nagaataki sa inyong pagtuo.

2 Pedro 2:10

Pinahan nana eabi eon gid ro mga nagapinagusto sa mga makangingil-ad ag maeain nga handom ku andang eawas ag ro mga nagabaliwala sa bisan anong otoridad. Ro mga manogturo ngaron it saea hay mga owa it huya ag mga matinaas-taason. Owa sanda nahadlok magpakaeain bisan sa mga dapat nandang padunggan.

2 Pedro 2:18

Duyon ro andang dangatan ay nagapangganyak sanda it mga tawo nga bag-o eang nakahilway sa makasasaea nga pagpangabuhi, ag sa impluwensya it mga maeain nga kaibahan nga magbalik sa owa it hawid-hawid nga pangueag. Gapangganyak sanda paagi sa andang mga pahabok-habok nga istorya nga owa it pueos, ag sa pagpukaw sa nagakatueog eon nga maeain nga handom it eawas ku mga tawo ngaron.