Yoˇhaˬ 9:16 - Akha

¹⁶ Paˬliˬsehˇ tsawˇ haˬ tiˬ paˆ na deuˬ ehˇ-eu, “Myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ Miˬyehˇ jawˇ gaˇ neh oe-euˬ tsawˇ haˬ maˬ ngeuˇ luꞈ-a. Aˬ jeˬ miˇ neh ehˇ naˇ, Jawˇ nah-ahˇ ya lah ya daw-eu zahˇ sahˇ kʼoꞈ-ahˇ maˬ caw teh ni, maˬ mˇ kʼmˬ-eu jeˬ aˬ yawꞈ mˇ-euˬ nga.” Ehˇ kʼawꞈ, tiˬ paˆ na deuˬ ehˇ-eu, “Iˬ baˇ zaˬ tiˬ gʼaˬ heu naˆ naˆ-ehˇ zahˬ lehˇ paˬ-ehˇ gʼeh-eu jeˬ aˬ joˆ-ehˇ mˇ nya ta.” Aˬ yawꞈ maꞈ kʼoeˇ loꞈ-ehˇ tiˬ gʼaˬ tiˬ jeˬ noeˬ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹⁶ Khoermirnae, Paqliqsaer tiqpavnav deuq aer-eu, “Tsawrhaq heughaq-aq, Miqyaer jawr-eu gar nae oe-euq maqngeur luf-a. Aqjeq mirnae aernar-aq, aqyawf landaw jawrnan maqtawq-eu beu.” Yawqdeuqyawq aer-eu, “Iqbaxzaq tiq ghaq heulof-aer ghae-eu bisiq bimawr-eu jeq aqjox-aer janrnya-eu?” Khoerngae, aqyawf maf-euq yawkaq armur pav-ir-euq mae.

Yoˇhaˬ 9:16 Iomraidhean Croise

Maꞈtehˬ 12:10

Aˬ laꞈ tiˬ pyawˬ shiˇ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. Yeˬsuˇ-ahˇ yaw lehˬ poˆ mawꞈ-eu tsawˇ haˬ deuˬ Yeˬsuˇ-ahˇ ehˇ-eu, “Jawˇ nah-ahˇ naˇ gawˇ laˆ taˬ nehˬ-eu Zahˇ dawˬ kʼoꞈ dawˬ-ahˇ maˬ bahˬ-a loˇ.”

Maꞈtehˬ 12:2

Paˬliˬsehˇ deuˬ kʼoeˇ gaˇ mawˇ ngeh, Yeˬsuˇ-ahˇ heu loꞈ-ehˇ ehˇ nehˬ-euˬ meh. “Haw sheˇ. Nawˬ-euˬ zaˬ lahˇ deuˬ Jawˇ nah-ahˇ maˬ mˇ kʼmˬ-eu jeˬ mˇ luꞈ ngaˇ.”

Luˇkaꞈ 13:14

Uˬ duˬ tahˬ nymˇ kʼoeˇ nymˇ-ahˇ uˆ lahˇ-eu aˬ yuiꞈ geuꞈ-eu gʼaˬ, Yeˬsuˇ Jawˇ nah ngeh nah naˇ gawˇ laˆ taˬ nehˬ-euˬ gaˇ nui ma pehˇ-awˇ ehˇ-eu, “Gaˇ mˇ nya-eu aˇ nah koꞈ nah jaˆ meh. Kʼoeˇ koꞈ nah laꞈ kʼoeˇ laˇ-awˇ naˇ gawˇ bi laˆ saˆ laˇ-awˬ. Jawˇ nah-ahˇ teu loꞈ-ehˇ taˬ jahˇ.”

Yoˇhaˬ 10:19

Yeˬsuˇ kʼoeˇ loꞈ-ehˇ ehˇ-eu miˇ neh, tsawˇ haˬ kʼoeˇ deuˬ tiˬ gʼaˬ tiˬ jeˬ noeˬ-eu meh.

Yoˇhaˬ 14:11

Aˬda-euˬ laꞈ kʼoeˇ ngaˇ jawˇ-awˇ, ngaˬ-euˬ laꞈ kʼoeˇ Aˬda jawˇ meh lehˇ ngaˇ ehˇ gaˇ naw maꞈ jah-awˬ. Toˆ-ehˇ maˬ ngeuˇ naˇ kʼawꞈ, ngaˬ neh mˇ-euˬ gaˇ deuˬ baˬ da neh jah-awˬ.

Yoˇhaˬ 15:24

Tsawˇ haˬ tiˬ gʼaˬ-iˬ maˬ mˇ haw-euˬ gaˇ heu deuˬ aˬ yawꞈ maꞈ jawˇ gaˇ ngaˇ maˬ mˇ-euˬ law nmˇ-aˬ, aˬ yawꞈ maꞈ iˬ baˇ maˬ ahˇ-aˇ. Ehˇ kʼawꞈ, ngaˬ neh mˇ-euˬ gaˇ-ahˇ aˬ yawꞈ maꞈ ya mawˇ-awˇ, ngaˬ-ahˇ maˬ ehˇ, ngaˬ Da-ahˇ maˬ ehˇ, aˬ yawꞈ maꞈ muiˇ-eu meh.

Yoˇhaˬ 2:11

Yeˬsuˇ-aˬ, Gaˬliˬlehˇ miˇ kʼahˬ Gaˬnaˬ meuˬ-ahˇ kʼaˆ jeˬ-ehˇ gʼeh-eu yaw beh hmˬ kʼoeˇ loꞈ-ehˇ mˇ mehˬ nehˬ-eu laꞈ kʼoeˇ, aˬ yawꞈ-euˬ yaw shehꞈ kʼahˬ sehˇ pah mehˬ nehˬ-awˇ, aˬ yawꞈ-euˬ zaˬ lahˇ deuˬ aˬ yawꞈ-ahˇ jah laˇ-euˬ meh.

Yoˇhaˬ 3:2

Tiˬ miˇ-aˬ, Yeˬsuˇ jawˇ gaˇ aˬ yawꞈ le-awˇ, heu loˬ-ehˇ ehˇ nehˬ-euˬ meh. “Saˬ laˬ-oˇ, nawˇ-aˬ Miˬyehˇ neh kʼehˇ gʼeh leꞈ-euˬ saˬ laˬ tiˬ gʼaˬ meh lehˇ nga maꞈ siˬ nya ma. Miˬyehˇ aˬ yawꞈ laꞈ kʼoeˇ maˬ jawˇ naˇ, tsawˇ haˬ tiˬ gʼaˬ-iˬ nawˬ neh mˇ-euˬ kʼaˆ jeˬ-ehˇ gʼeh-eu heu jeˬ maˬ mˇ mehˬ nya-aˇ.”

Yoˇhaˬ 5:10

Kʼoeˇ miˇ neh, Yuˇdaˆ tsawˇ haˬ aˬ yuiꞈ aˬ tsu deuˬ naˇ gawˇ taˬ leˇ-euˬ tsawˇ haˬ kʼoeˇ gʼaˬ-ahˇ ehˇ nehˬ-eu,“Iˬ nah Jawˇ nah pyeuꞈ-eu miˇ neh, nawˬ-euˬ gawˬ pu baꞈ-awˇ cah-eu teu zahˇ dawˬ kʼoꞈ dawˬ-ahˇ bahˬ-eu meh.”

Yoˇhaˬ 5:36

Ehˇ kʼawꞈ, Yoˇhaˬ neh saˇ kiˇ kamˬ-euˬ naˆ maˬ tseˇ huiˬ dzehˬ-eu ngaˬ-euˬ gaˇ kawˆ saˇ kiˇ kamˬ taˬ-euˬ jaˆ ma. Ngaˬ Da neh ngaˬ-ahˇ bi mˇ laꞈ-euˬ ngaˬ neh mˇ-euˬ gaˇ kʼoeˇ deuˬ ngaˬ-euˬ dah zaˇ dawˬ ngehˬ gaˇ duˇ ni, Aˬda neh ngaˬ-ahˇ kʼehˇ gʼeh leꞈ-euˬ meh lehˇ saˇ kiˇ kamˬ-eu jeˬ pyeuꞈ-eu meh.

Yoˇhaˬ 6:52

Yeˬsuˇ kʼoeˇ loꞈ-ehˇ ehˇ gaˇ tsawˇ haˬ kʼoeˇ deuˬ nui ma pehˇ laˇ-awˇ, aˬ yawꞈ maꞈ yaw kaˬ ja dui dui-awˇ ehˇ-eu, “Tsawˇ haˬ teu gʼaˬ aˬ yawꞈ-euˬ gʼawˇ mawˇ aˬ dui-ahˇ biꞈ-awˇ aˬ joˆ-ehˇ bi dzaˬ nya-eu lehˇ ehˇ ta.”

Yoˇhaˬ 7:12

Tsawˇ haˬ aˇ maꞈ laꞈ kʼoeˇ, aˬ yawꞈ-euˬ gaˇ kawˆ gʼawˬ mya jeˬ ja kʼoeˬ luꞈ-eu meh. Tiˬ paˆ na deuˬ-aˬ, aˬ yawꞈ muiˬ-eu gaˇ kawˆ ja-eu meh. Tiˬ paˆ na deuˬ-aˬ, kʼoeˇ loꞈ-ehˇ maˬ ja ni, aˬ yawꞈ aˬ cawˬ-ahˇ gaˇ ma sheuˬ bahˬ-eu tsawˇ haˬ meh lehˇ ja-eu meh.

Yoˇhaˬ 7:23

Jawˇ nah ngeh nah aˬ li tiˬ li-ahˇ baˆ kʼoˆ mehˬ dzaˬ yehˬ-euˬ kʼoeˇ Zahˇ dawˬ kʼoꞈ dawˬ-ahˇ maˬ bahˬ-a lehˇ ngeuˇ naˇ, Jawˇ nah ngeh nah tsawˇ haˬ tiˬ gʼaˬ-euˬ gʼawˇ mawˇ mawˇ lah-ehˇ muiˬ laˇ ni ngaˬ neh laˆ taˬ nehˬ-euˬ gaˇ, naw maꞈ aˬ jeˬ miˇ neh nui ma pehˇ te.

Yoˇhaˬ 7:43

Tsawˇ haˬ aˇ maꞈ kʼoeˇ maꞈ, Yeˬsuˇ gaˇ kawˆ tiˬ gʼaˬ tiˬ jeˬ kʼoeˇ loꞈ-ehˇ noeˬ-eu meh.

Yoˇhaˬ 9:24

Dehꞈ le ngeh neh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ aˬ yawꞈ maꞈ tiˬ poˆ paˇ kuˇ-awˇ ehˇ nehˬ-eu, “Nawˇ dawˇ coe ni ehˇ ma lehˇ Miˬyehˇ mehˬ shi kamˬ-awˬ. Nawˬ-ahˇ myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ iˬ baˇ zaˬ meh lehˇ nga maꞈ siˬ nya ma.”

Gʼaˬkʼehˇ 14:4

Meuˬ kʼoeˇ meuˬ-ahˇ jawˇ-eu tsawˇ haˬ deuˬ nyiˬ paˆ paˆ-iˇ-euˬ meh. Tiˬ paˆ na deuˬ Yuˇdaˆ tsawˇ haˬ deuˬ jawˇ paw pyawˬ-awˇ, tiˬ paˆ na deuˬ-aˬ, gʼaˬ kʼehˇ kʼoeˇ nyiˬ gʼaˬ jawˇ paw pyawˬ-euˬ meh.